ການສອບເສັງ ຈົບຊັ້ນມັດທະຍົມຕອນປາຍ ມ7 ໄດ້ເລີ່ມຂຶ້ນຢ່າງເປັນການ ພ້ອມກັນໃນທົ່ວປະເທດ ໃນລະຫວ່າງວັນທີ່ 20-21 ມິຖຸນານີ້, ສະເພາະຢູ່ແຂວງຫຼວງພະບາງແມ່ນໄດ້ກໍານົດເອົາສະໂມສອນຂອງພະແນກສຶກສາທິການ ແລະ ກິລາແຂວງຫຼວງພະບາງເປັນສະຖານທີໄຂການສອບເສັງ, ໂດຍການເປັນປະທານຂອງ ທ່ານ ວົງສະຫວັນ ເທບພະຈັນ ຮອງເຈົ້າແຂວງຫຼວງພະບາງ, ມີຕາງໜ້າກົມທີ່ກ່ຽວຂ້ອງ, ຫົວໜ້າພະແນກການອ້ອມຂ້າງ, ຄະນະກຳມະການຮັບຜິດຊອບການສອບເສັງຕະຫຼອດຮອດຄູ-ອາຈານ ແລະ ນັກສອບເສັງປະຈຳສູນສອບເສັງໂຮງຮຽນມັດທະຍົມສົມບູນສັນຕິພາບເຂົ້າຮ່ວມ.
ທ່ານ ວົງສະຫວັນ ເທບພະຈັນ ຂຶ້ນກ່າວໄຂການສອບເສັງພ້ອມທັງຕັດຫົວບົດສອບເສັງ ຢ່າງເປັນທາງການ ໂດຍທ່ານໄດ້ຮຽກຮ້ອງມາຍັງຄະນະຮັບຜິດຊອບການສອບເສັງຈົ່ງພ້ອມກັນເອົາໃຈໃສ່ໃນການປະຕິບັດຕາມກົດລະບຽບຂອງການສອບເສັງເຂັ້ມງວດ, ສຳລັບນັກສອບເສັງໝົດທຸກຄົນຈົ່ງພ້ອມກັນສຸມສະຕິປັນຍາເຂົ້າໃນການແກ້ບົດສອບເສັງຂອງຕົນໃຫ້ສຳເລັດ ແລະ ຖ່ວງທັນຕາມກົດນົດເວລາ.
ສໍາລັບການສອບເສັງຈົບຊັ້ນມັດທະຍົມຕອນປາຍ ມ 7 ສາຍສາມັນ ປະຈຳສົກຮຽນ 2016-2017 ທົ່ວແຂວງຫຼວງພະບາງ ມີສູນສອບເສັງທັງໝົດ 37 ສູນ, ມີ 224 ຫ້ອງສອບເສັງ, ມີນັກສອບເສັງທັງໝົດ 4.372 ຄົນ, ຍິງ 1.915 ຄົນ, ລວມມີ 4 ວິຊາສອບເສັງຄື: ວິຊາຄະນິດສາດ, ພະສາລາວ-ວັນນະຄະດີ, ຟີຊິກສາດ ແລະ ວິຊາປະຫວັດສາດ, ສະເພາະຢູ່ສູນສອບເສັງໂຮງຮຽນມັດທະຍົມສົມບູນສັນຕິພາບ ມີ 4 ໂຮງຮຽນເຂົ້າຮ່ວມສອບເສັງຄື: ໂຮງຮຽນມັດທະຍົມສົມບູນພັນຫຼວງ, ປະຊາທິປະໄຕ, ເດັກກຳພ້າ ແລະ ໂຮງຮຽນມັດທະຍົມສົມບູນສັນຕິພາບ ມີນັກສອບເສັງທັງໝົດ 982 ຄົນ, ຍິງ 472 ຄົນ.
ໃນພິທີໄດ້ມອບໃບຍ້ອງຍໍ ແລະ ເງິນລາງວັນໃຫ້ນັກຮຽນເກັ່ງທີ່ເປັນຕົວແທນໄດ້ເຂົ້າສອບເສັງແຂ່ງຂັນນັກຮຽນເກັ່ງລະດັບຊາດ ທີ່ນະຄອນຫຼວງວຽງຈັນ ແລະ ໄດ້ຮັບລາງວັນ 5 ຄົນ,ໃນນັ້ນ ລາງວັນທີ 1 ມີ 2 ລາງວັນຄື: ວິຊາຄະນິດສາດ ແມ່ນ ທ້າວ ພອນແກ້ວ ຊົງມີຢາລີຊົງ ແລະ ວິຊາເຄມີ ແມ່ນທ້າວ ປໍ່ທໍ່ ຈ່າລີ ຈາກໂຮງຮຽນ ມສ ສັນຕິພາບ,ລາງວັນທີ 3 ວິຊາຟີຊິກສາດ ແມ່ນ ທ້າວ ຫວາຊົງ ຈົງດົວ ຈາກ ມສ ສາມສຸມ ເມືອງວຽງຄໍາ, ລາງວັນຊົມເຊີຍມີ 2 ລາງວັນຄື: ວິຊາຟີຊິກສາດ ແມ່ນ ທ້າວ ຄໍາດີ ຢາເຈ່ຍຢ່າງ ຈາກ ມສ ສັນຕິພາບ,ວິຊາເຄມີສາດ ແມ່ນທ້າວ ຕົງວ່າງ ເນັ່ງຟາ ຈາກ ມສ ບ້ານຈີມ ເມືອງພູຄູນ
ລວມແລ້ວແຂວງຫຼວງພະບາງສົ່ງນັກຮຽນເຂົ້າສອບເສັງແຂ່ງຂັນນັກຮຽນເກັ່ງລະດັບຊາດຄັ້ງວັນທີ່ 25-28/4/2016 ສາມາດຍາດໄດ້ຫຼຽນຄໍາ 2 ຫຼຽນ, ທອງ 1 ຫຼຽນ ແລະ ລາງວັນຊົມເຊີຍ 2 ລາງວັນ ຈັດເປັນອັນດັບທີ 2 ຂອງປະເທດ ແລະ ຈາກນັ້ນກໍ່ໄດ້ມອບໃບຍ້ອງຍໍ ພ້ອມດ້ວຍເງິນສົດ ຄູ-ອາຈານທີ່ສອນບໍາລຸງໃຫ້ແກ່ນັກຮຽນເກັ່ງດັ່ງກ່າວ ຈໍານວນ 8 ທ່ານ, ຍິງ 2 ທ່ານ.
Editor: ກຳປານາດ ລັດຖະເຮົ້າ
