ການໄຂສົກຮຽນໃໝ່ 2017-2018 ທົ່ວປະເທດ ກໍ່ຄືນະຄອນຫຼວງວຽງຈັນ ຈະເລີ່ມໄຂຂຶ້ນຢ່າງເປັນທາງການໃນວັນທີ 1 ກັນຍາ 2017 ກໍ່ຄືມື້ອື່ນນີ້.
ຊຶ່ງທ່ານ ຊົມພູ ແກ້ວປັນຍາ, ຫົວໜ້າພະແນກສຶກສາທິການ ແລະ ກີລາ ນະຄອນຫຼວງວຽງຈັນ ໃຫ້ສຳພາດວ່າ: ສະເພາະການຫ້າງຫາກະກຽມການເປີດສົກຮຽນໃໝ່ໃນປີນີ້ ໂດຍລວມແລ້ວ ພາຍຫຼັງທີ່ໄດ້ມີການຈັດການສອບເສັງເລື່ອນຊັ້ນ ຈົບຊັ້ນ ປ5 ມ4 ມ7 ໄດ້ອອກແຈ້ງການໃຫ້ກັບບັນດາໂຮງຮຽນແຕ່ລະແຫ່ງທີ່ຂຶ້ນກັບເມືອງ ພາຍໃນ ນວ ໃຫ້ຫ້າງຫາກະກຽມບູລະນະສ້ອມແປງອາຄານສະຖານທີ່ຕະຫຼອດ ເຖິງໂຕະ-ຕັ່ງຄວາມພ້ອມຫຼາຍໆດ້ານໃນການກະກຽມເປີດສົກຮຽນໃໝ່.
ພາຍຫຼັງທີ່ໄດ້ມີການແຈ້ງການລົງໄປ ທາງພະແນກສຶກສາທິການ ແລະ ກີລາ ນວ ໄດ້ມີການຈັດຕັ້ງການລົງຕິດຕາມກວດກາຊຸກຍູ້ວຽກງານດັ່ງກ່າວ ມາເຖິງເດືອນກໍລະກົດ 2017 ໃຫ້ແຕ່ລະເມືອງເປີດກອງປະຊຸມຜູ້ບໍລິຫານການສຶກສາຂັ້ນເມືອງຂຶ້ນ ພ້ອມທັງເຜີຍແຜ່ຈຸດປະສົງທີ່ກະຊວງສຶກສາທິການ ແລະ ກີລາ ໄດ້ແນະນຳຈັດເຜີຍແຜ່ໃຫ້ບັນດາຄູ-ອາຈານ ແລະ ພະນັກງານໃນຫ້ອງການສຶກສາທິການ ແລະ ກີລາ ແຕ່ລະເມືອງໄດ້ຮັບຊາບ ເຊິ່ງໃນສົກຮຽນນີ້ ວຽກງານຈຸດສຸມ ແມ່ນຂະຫຍາຍໂອກາດການເຂົ້າຮຽນຂອງເດັກ ເດັກກ່ອນໄວຮຽນ ໂດຍສະເພາະແມ່ນເດັກ 5 ປີ ໃຫ້ໄດ້ເຂົ້າຮຽນຢ່າງທົ່ວເຖິງ ເພາະເປັນເດັກກຽມປະຖົມ ຖ້າຢູ່ໃນອະນຸບານກໍ່ແມ່ນອະນຸບານ 3 ເພື່ອກຽມຄວາມພ້ອມໃນການເຂົ້າຮຽນຊັ້ນປະຖົມ ພ້ອມລະດົມໃຫ້ພໍ່ແມ່ຜູ້ປົກຄອງ ເວົ້າລວມ ເວົ້າສະເພາະ ຄະນະພັດທະນາການສຶກສາຂັ້ນບ້ານ ໃຫ້ເອົາໃຈໃສ່ພໍ່ແມ່ປະຊາຊົນໃນບ້ານຂອງຕົນ ນຳເອົາລູກຫຼານເດັກ ອາຍຸ 6 ປີ ໃຫ້ໄດ້ເຂົ້າຮຽນ ເພີ່ມອັດຕາສຸດທິການເຂົ້າຮຽນໃຫ້ມັນສູງ ພ້ອມທັງ ປັບປຸງຄຸນະພາບການຮຽນ-ການສອນໃນຊັ້ນປະຖົມ ໃຫ້ມີຄຸນະພາບດີ ອີງໃສ່ອຸປະກອນການຮຽນ-ການສອນ ທີ່ທາງຂັ້ນເຖິງສາມາດສະໜອງໃຫ້ຢ່າງພຽງພໍ ແລະ ກ່ອນການໄຂສົກຮຽນໃໝ່ໄດ້ມີການລະດົມນັກຮຽນທີ່ຮຽນຈົບຊັ້ນ ປ5 ໃຫ້ໄດ້ເຂົ້າຮຽນຊັ້ນມັດທະຍົມຕົ້ນໃຫ້ຫຼາຍຂຶ້ນ ເຊິ່ງໄລຍະຜ່ານມາຍັງບໍ່ທັນດີເທົ່າທີ່ຄວນ ເພື່ອບໍ່ໃຫ້ປະລະການຮຽນ ແລະ ເອົາໃຈໃສ່ບັນຫາສົ່ງເສີມສຸຂະພາບເດັກໃນໂຮງຮຽນ ເປັນຕົ້ນ ການລ້າງມື ຖູແຂ້ວ ແລະ ສຸຂະອະນາໄມຕ່າງໆ ພ້ອມດຽວກັນວຽກງານກີລາມ່ວນຊົນກໍ່ໃຫ້ທົ່ວເຖິງ ໄປຄຽງຄູ່ກັນກໍ່ຍົກລະດັບທາງດ້ານແນວຄິດການເມືອງ ດ້ານວິຊາສະເພາະໃຫ້ກັບຄູ-ອາຈານ ມີການກວດຄືນ ການປັບປຸງການຈັດຕັ້ງໃຫ້ເປັນລະບົບຄົບຊຸດ ກຽມພ້ອມທັງຄູ-ອາຈານ ວັດຖຸອຸປະກອນຕ່າງໆໃຫ້ຄົບຖ້ວນສົມບູນ ແລະ ໂຮງຮຽນຫຼາຍແຫ່ງກໍ່ມີການລົງທະບຽບຮັບສະໝັກນັກຮຽນກັນເປັນທີ່ຮຽບຮ້ອຍແລ້ວ.
ມາຮອດປັດຈຸບັນ ຖືວ່າການຫ້າງຫາກະກຽມການເປີດສົກຮຽນໃໝ່ຂອງນະຄອນຫຼວງ ມີຄວາມພ້ອມໃນການໄຂສົກຮຽນໃໝ່ຢ່າງເປັນທາງການພ້ອມກັນ ໃນວັນທີ 1 ກັນຍາ 2017 ໂອກາດນີ້ ທ່ານໄດ້ຮຽກຮ້ອງມາຍັງຄູ-ອາຈານ ເອົາໃຈໃສ່ປະຕິບັດຕາມລະບຽບແບບແຜນຄົບຕາມ 5 ຫຼັກມູນຂອງການສຶກສາ 3 ລັກສະນະ ແລະ 3 ຂໍ້ແຂ່ງຂັນຂອງກະຊວງວາງອອກ ລູກຫຼານນັກຮຽນກໍ່ໃຫ້ຕັ້ງໃຈສຶກສາຄົ້ນຄວ້າຮ່ຳຮຽນ ແລະ ຮຽກຮ້ອງມາຍັງທຸກພາກສ່ວນຕ່າງໆ ໂດຍສະເພາະພໍ່ແມ່ຜູ້ປົກຄອງໃຫ້ເອົາໃຈໃສ່ຕື່ມ ໃນການແນະນຳຕິດຕາມໃກ້ຊິດ ແລະ ຮຽກຮ້ອງມາຍັງທຸກພາກສ່ວນເອົາໃຈໃສ່ດູແລລູກຫຼານນັກຮຽນ ຖ້າເຫັນສິ່ງໃດບໍ່ຖືກຕ້ອງ ກໍ່ຊ່ວຍກັນຕັກເຕືອນ ເພື່ອປະກອບສ່ວນເຮັດໃຫ້ການພັດທະນາປັບປຸງຄຸນະພາບການສຶກສາຂອງນະຄອນຫຼວງ ໃຫ້ນັບມື້ດີຂຶ້ນ.

Editor: ຕະວັນ ແສງສະຫວັນ