ສົກປິຮຽນ 2017-2018 ນີ້, ມະຫາວິທະຍາໄລແຫ່ງຊາດ ຮັບເອົານັກສຶກສາ ທີ່ຜ່ານການສອບເສັງ ເຂົ້າສຶກສາຕໍ່ວິຊາຊີບ ໃນຄະນະວິຊາຕ່າງໆ ຫລາຍກວ່າ 4 ພັນກວ່າຄົນ, ນອກນັ້ນ, ຍັງມີນັກສຶກສາໃນແຜນ ອີກຈຳນວນ 919 ຄົນ.

ທ່ານ ສົມສີ ຍໍພັນໄຊ ວ່າການອະທິການບໍດີ ມະຫາວິທະຍາໄລແຫ່ງຊາດ ໃຫ້ສຳພາດຕໍ່ສື່ມວນຊົນ ໃນວັນທີ 29 ສິງຫາ ຜ່ານມານີ້ ວ່າ: ການສອບເສັງ ເຂົ້າມະຫາວິທະຍາໄລແຫ່ງຊາດ ສົກປີ 2017-2018 ໄດ້ສໍາເລັດໃນຕົ້ນເດືອນ ສິງຫາ 2017 ທີ່ຜ່ານມາ, ໂດຍມີນັກສຶກສາ ສະໝັກເຂົ້າສອບເສັງ ທັງໝົດ 18.193 ຄົນ, ສຳລັບ ມຊ ມີຄວາມສາມາດຮັບເຂົ້າຮຽນ ໄດ້ພຽງ 4.838 ຄົນ, ໂດຍມີ ຄະນະສຶກສາສາດ ຮັບເອົາ 283 ຄົນ, ຄະນະອັກສອນສາດ 434 ຄົນ, ຄະນະວິທະຍາສາດ-ສັງຄົມ 576 ຄົນ, ຄະນະເສດຖະສາດ ບໍລິຫານທຸລະກິດ 600 ຄົນ, ຄະນະນິຕິສາດ-ລັດຖະສາດ 240 ຄົນ, ຄະນະວິທະຍາສາດ ທໍາມະຊາດ 432 ຄົນ, ຄະນະວິສະວະກຳສາດ 728 ຄົນ, ຄະນະກະເສດສາດ 192 ຄົນ, ຄະນະວິທະຍາສາດປ່າໄມ້ 204 ຄົນ, ຄະນະສະຖາປັດຕະຍະກຳສາດ 224 ຄົນ, ຄະນະວິທະຍາສາດ ສິ່ງແວດລ້ອມ 192 ຄົນ, ຄະນະຊັບພະຍາກອນນ້ຳ 173 ຄົນ ແລະ ຄະນະວິທະຍາສາດ ການກິລາ ແລະ ກາຍະກຳ ຮັບເອົາພຽງ 72 ຄົນ. ທ່ານ ສົມສີ ຍໍພັນໄຊ ຍັງໄດ້ໃຫ້ຮູ້ຕື່ມວ່າ: ນອກຈາກນັກສຶກສາ ທີ່ເສັງເຂົ້າແລ້ວ ຍັງມີນັກສຶກສາ ທີ່ມາໃນແຜນ ມີທັງໝົດ 919 ຄົນ. ໃນນັ້ນ, ມີພະນັກງານ 6 ຄົນ ແລະ ນັກຮຽນ ຊົນເຜົ່າ 10 ຄົນ. ປັດຈຸບັນ ພວມເປີດໃຫ້ນັກສຶກ ເຂົ້າມາລົງທະບຽນ ຕາມແຕ່ລະສາຂາວິຊາຮຽນ ເຊິ່ງຈະ ເລີ່ມເປີດສົກຮຽນໃໝ່ ໃນຕົ້ນເດືອນຕຸລາ 2017 ນີ້.

Editor: ກຳປານາດ ລັດຖະເຮົ້າ