ການໄຂສົກຮຽນໃຫມ່ 2017 – 2018 ໃນທົ່ວປະເທດ ໄດ້ໄຂຂື້ນຢ່າງເປັນທາງການ ໃນວັນ ທີ 1 ກັນຍາ 2017 ນີ້, ສະເພາະຢູ່ທີ່ນະຄອນຫລວງວຽງຈັນ ກ່ອນຫນ້ານີ້ ທາງພະແນກສືກສາ ທິການ ແລະ ກິລາ ນະຄອນຫຼວງວຽງຈັນ ໄດ້ມີການຈັດຕັ້ງຕິດຕາມກວດກາຊຸກຍູ້ວຽກງານດັ່ງກ່າວ ພ້ອມທັງເຜີຍແຜ່ຈຸດປະສົງ ທີ່ ກະຊວງສຶກສາທິການ ແລະ ກິລາ ໄດ້ແນະນໍາ ຈັດຕັ້ງເຜີຍແຜ່ໃຫ້ຄູບາ - ອາຈານ ແລະ ພະນັກງານ ໃນຫ້ອງການສຶກສາທິການ ແລະ ກິລາ ແຕ່ລະເມືອງໃຫ້ຮັບຊາບ ເຖິງ ວຽກງານຈຸດສຸມ ໂດຍສະເພາະແມ່ນຂະຫຍາຍໂອກາດ ການເຂົ້າຮຽນຂອງເດັກ ເດັກກ່ອນໄວຮຽນ ໂດຍສະເພາະ ແມ່ນເດັກ 5 ປີ ໃຫ້ໄດ້ເຂົ້າຮຽນຢ່າງທົ່ວເຖິງເພາະເປັນເດັກກຽມປະຖົມ ຖ້າຢູ່ໃນອະນຸບານກໍແມ່ນ ອະນຸບານ 3 ເພື່ອກຽມຄວມາພ້ອມໃນການເຂົ້າໂຮງຮຽນຊັ້ນປະຖົມ ພ້ອມລະດົມໃຫ້ພໍ່-ແມ່ຜູ້ປົກຄອງ ເວົ້າສະເພາະ ຄະນະພັດທະນາການສຶກສາ ໃຫ້ເອົາໃຈໃສ່ພໍ່ - ແມ່ປະຊາຊົນໃນບ້ານຂອງຕົນ ນໍາເອົາລູກຫຼານ ເດັກ ອາຍຸ 6 ປີ ໃຫ້ໄດ້ເຂົ້າຮຽນເພື່ອເພີ່ມອັດຕາສຸດທິການເຂົ້າຮຽນ ໃຫ້ມັນສູງ ພ້ອມທັງປັບປຸງຄຸນນະພາບການຮຽນ-ການສອນ ໃນຂັ້ນປະຖົມ-ຂັ້ນມັດທະຍົມ ໃຫ້ມີຄຸນນະພາບດີ ອີງໃສ່ອຸປະກອນການຮຽນ-ການສອນ ທີ່ທາງຂັ້ນເທິງສາມາດສະໜອງ ໃຫ້ຢ່າງພຽງພໍ

ພ້ອມດຽວກັນວຽກງານກິລາມວນຊົນ ກໍໃຫ້ທົ່ວເຖິງ ໄປຄຽງຄູ່ກັນກໍຍົກລະດັບທາງດ້ານແນວຄິດການເມືອງ ດ້ານວິຊາສະເພາະ ໃຫ້ກັບຄູ - ອາຈານ ມີການກວດຄືນການປັບປຸງການຈັດຕັ້ງ ໃຫ້ເປັນລະບົບຄົບຊຸດ ກຽມພ້ອມທັງຄູອາຈານ ວັດຖຸອຸປະກອນຕ່າງໆ ໃຫ້ຄົບຖ້ວນສົມບູນ ມາຮອດປະຈຸບັນ ການເປີດສົກຮຽນໃຫມ່ຂອງນະຄອນຫຼວງ ໄດ້ເປີດຢ່າງເປັນທາງການ ພ້ອມກັນທຸກໆແຫ່ງ ໃນວັນທີ 1 ກັນຍາ 2017 ນີ້ ສ່ວນພະແນກສຶກສາທິການ ແລະ ກິລາ ນະຄອນຫຼວງວຽງຈັນ ຍັງໄດ້ຖືເອົາໂອກາດນີ້ ຮຽກຮ້ອງມາຍັງບັນດາຄູ - ອາຈານ ພ້ອມກັນເອົາໃຈໃສ່ປະຕິບັດຕາມລະບຽບແບບແຜນ ຄົບຕາມ 5 ຫຼັກມູນການສຶກສາ 3 ລັກສະນະ ແລະ 3 ຂໍ້ແຂ່ງຂັ້ນ ທີ່ທາງກະຊວງ ສຶກສາທິການ ແລະ ກິລາ ວາງອອກ ສຳລັບລູຸກຫລານນັກຮຽນ ກໍ່ໃຫ້ຕັ້ງໃຈສຶກສາຄົ້ນຄົ້ວຮໍ່າຮຽນ.

Editor: ກຳປານາດ ລັດຖະເຮົ້າ