ນັກສຶກສາສະຖາບັນພັດທະນາກຳມະບານລາວ ສຳເລັດການສຶກສາກົດໝາຍລະບົບຊັ້ນສູງຮຸ້ນທີ I ສົກປີ 2016-2017 ພິທີມອບໃບປະກາສະນີຍະບັດ ໃຫ້ແກ່ສະຖາບັນພັດທະນາກໍາມະບານລາວ ເປັນກຽດເຂົ້າຮ່ວມ ແລະ ມອບໃບປະກາສະນີຍະບັດ ໂດຍທ່ານ ເສີມສຸກ ສິມພະວົງ, ຮອງລັດຖະມົນຕີກະຊວງຍຸຕິທຳ, ມີທ່ານ ສີມູນ ອຸ່ນລາສີ ຮອງປະທານສູນກາງສະຫະພັນກຳມະບານລາວ, ມີບັນດາ ຫົວໜ້າກົມ, ຫົວໜ້າສະຖາບັນ, ພະນັກງານຄູ-ອາຈານ ແຂກຖືກເຊີນ ພ້ອມດ້ວຍນັກສຶກສາເຂົ້າຮ່ວມ.
ໃນພິທີ ທ່ານ ສົມນຶກ ສຸວັນນະສານ ຫົວໜ້າສະຖາບັນພັດທະນາກຳມະບານລາວ ກ່າວເຖິງຜົນສໍາເລັດໃນການກໍ່ສາ້ງນັກສຶກສາກົດໝາຍລະດັບຊັ້ນສູງ ເຊິ່ງຊຸດນີ້ແມ່ນໝາກຜົນອັນສຳຄັນ ໃນການຮ່ວມມືຊ່ວຍເຫຼືອເຊິ່ງກັນ ແລະ ກັນ ລະຫວ່າງ ສະຖາບັນພັດທະນາກຳມະບານລາວ ແລະ ສະຖາບັນຍຸຕິທຳແຫ່ງຊາດ ເຊິ່ງເປັນບົດຮຽນອັນລ້ຳຄ່າໃຫ້ແກ່ການຈັດຕັ້ງ ແລະ ການເຄື່ອນໄຫວວຽກງານພະນັກງານຂອງ ຄູ-ອາຈານ ພາຍໃນສະຖາບັນພັດທະນາກຳມະບານລາວ. ນັກສຶກສາທີ່ໄດ້ຮັບໃບປະກາສະນີຍະບັດຄັ້ງນີ້ ມີທັງໝົດ 329 ຄົນ, ຍິງ 139 ຄົນ, ຈາກຜົນການສຶກສາມສາມາດຈັດລະດັບການສຶກສາໄດ້ໃນລະດັບດີເລີດ ຫຼື ເກຣດ A ຈຳນວນ 125 ຄົນ, ລະດັບດີຫຼາຍ ຫຼື ເກຣດ B ບວກ ຈໍານວນ 158 ຄົນ, ລະດັບເກຣດ B ຈຳນວນ 41 ຄົນ ແລະ ເກຣດ C ບວກ ຈໍານວນ 5 ຄົນ,
ໃນໂອກາດດຽວກັນນີ້ ຍັງໄດ້ມອບຫຼຽນກາກໍາມະບານໃຫ້ແກ້ພະນັກງານຄູ-ອາຈານ ຈາກສະຖາບັນຍຸຕິທຳແຫ່ງຊາດ ແລະ ສະຖາບັນພັດທະນາກຳມະບານລາວ ທີ່ມີຜົນງານດີເດັ່ນໃນການສິດສອນຖ່າຍທອດຄວາມຮູ້ທາງດ້ານກົດໝາຍໃຫ້ກັບນັກສຶກສາສະຖາບັນພັດທະນາກຳມະບານລາວ ໃນໄລຍະຜ່ານມາ ແລະ ໄດ້ມອບໃບຍ້ອງຍໍໃຫ້ແກ່ນັກສຶກສາທີ່ມີຜົນງານດີເດັ່ນ ຮຽນດີ, ຮຽນເກັ່ງ ແລະ ປະກອບສ່ວນການເຄື່ອນໄຫວວຽກງານພາຍໃນສະຖາບັນພັດທະນາກຳມະບານລາວ ຕະຫຼອດໄລຍະການຄົ້ນຄ້ວາຮ່ຳຮຽນ.
ບັນດານັກສຶກສາທີ່ເຂົ້າຮ່ວມ ຍັງໄດ້ຮັບຟັງການໂອ້ລົມຈາກທ່ານ ເສີມສຸກ ສິມພະວົງ, ຮອງລັດຖະມົນຕີກະຊວງຍຸຕິທຳ, ເຊິ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນສໍາເລັດ ທີ່ສະຖາບັນພັດທະນາກຳມະບານລາວ ຍາດມາໄດ້ໃນໄລຍະຜ່ານມາ ແລະ ທ່ານ ຍັງໄດ້ສະແດງຄວາມຍ້ອງຍໍຊົມເຊີຍ ມາຍັງນັກສຶກສາທີ່ໄດ້ເອົາໃຈໃສ່ສຶກສາຄົ້ນຄ້ວາຮ່ຳຮຽນ, ຝຶກຝົນຫຼໍ່ຫຼອມຕົນເອງຜ່ານຜ່າຄວາມຫຍຸ້ງຍາກໃນຕະຫຼອດໄລຍະການສຶກສາຮ່ຳ ຮຽນ ໄດ້ເນັ້ນໜັກໃຫ້ນັກສຶກສານຳເອົາຄວາມຮູ້ຄວາມສາມາດໄປຜັນຂະຫຍາຍໃນການປະກອບອາຊີບ, ໃນອົງການ ຈັດຕັ້ງລັດ ແລະ ເອກະຊົນໃຫ້ສຳເລັດ.
ໃນພິທີທ່ານ ເສີມສຸກ ສິມພະວົງກໍ່ໄດ້ໃຫ້ກຽດມອບໃບປະກາສະນີຍະບັດໃຫ້ແກ່ນັກສຶກສາທີ່ສຳເລັດຈາກສະຖາບັນພັດທະນາກຳມະບານລາວ ຈຳນວນ 329 ຄົນ, ຍິງ 139 ຄົນ.

Editor: ຕະວັນ ແສງສະຫວັນ