ພິທີປະກາດ ເມືອງວຽງໄຊ ເປັນເມືອງຈົບຊັ້ນມັດທະຍົມຕອນຕົ້ນບຳລຸງ ຢ່າງເປັນທາງການ ໄດ້ໄຂຂຶ້ນໃນຕອນເຊົ້າວັນທີ 3 ຕຸລາ 2017 ນີ້ ຢູ່ທີ່ສະໂມສອນຂອງ ໂຮງຮຽນ ມສ ວຽງໄຊ ໂດຍເປັນກຽດເຂົ້າຮ່ວມຂອງ ທ່ານ ຮອງສາດສະດາຈານ, ປະລິນຍາເອກ ຄຳຜາຍ ສີສະຫວັນ ຮອງລັດຖະມົນຕີ ກະຊວງສຶກສາທິການ ແລະ ກິລາ, ມີ ທ່ານ ພູໂຊນ ທຳມະວິໄຊ ຮອງເຈົ້າແຂວງຫົວພັນ ຜູ້ຊີ້ນຳວຽກງານຂົງເຂດວັດທະນາທຳ, ສັງຄົມຂັ້ນແຂວງ, ທ່ານ ແອງສອນ ນາມມະນີນິນ ເຈົ້າເມືອງວຽງໄຊ, ທ່ານ ເຄນທະນູ ພຸດທະວົງສາ ຮອງຫົວໜ້າ ພະແນກສຶກສາທິການ ແລະ ກິລາແຂວງ, ພ້ອມດ້ວຍເຈົ້າເມືອງ, ຫົວໜ້າຫ້ອງການສຶກສາທິການ ແລະ ກິລາ ມາຈາກ 10 ເມືອງ ທົ່ວແຂວງ, ຫົວໜ້າໜ່ວຍງານການສຶກສານອກໂຮງຮຽນ 10 ເມືອງທົ່ວແຂວງ, ບັນດາຫົວໜ້າກົມກອງຫ້ອງການ, ພະນັກງານລັດຖະກອນ, ທະຫານ, ຕຳຫຼວດ, ພະນັກງານປະຕິວັດອາວຸໂສບຳນານ, ຄະນະພັກກຸ່ມບ້ານ, ອໍານາດການປົກຄອງບ້ານ, ນັກທຸລະກິດ-ພໍ່ຄ້າຊາວຂາຍ, ຄູ-ອາຈານ, ພໍ່-ແມ່ປະຊາຊົນ ແລະ ນ້ອງຫຼານ ນັກຮຽນ-ນັກສຶກສາ ເຂົ້າຮ່ວມຢ່າງຫຼວງຫຼາຍ.
ໃນພິທີ, ທ່ານ ອອນ ແພງພູວັນ ກຳມະການພັກເມືອງຫົວໜ້າ ຫ້ອງການສຶກສາທິການ ແລະ ກິລາເມືອງວຽງໄຊ ໄດ້ຂຶ້ນຜ່ານບົດສະຫຼຸບ ຜົນສໍາເລັດການຈັດຕັ້ງປະຕິບັດ ການຮຽນ - ການສອນ ຊັ້ນມັດທະຍົມສຶກສາຕອນຕົ້ນບຳລຸງທົ່ວເມືອງວຽໄຊ ແລະ ທິດທາງແຜນການສຶກສາໃນຕໍ່ໜ້າ, ເຊິ່ງເມືອງດັ່ງກ່າວໄດ້ປະກາດຈົບຊັ້ນປະຖົມບຳລຸງທົ່ວເມືອງ ໃນວັນທີ 4 ມີນາ ປີ 2010 ເຊິ່ງພາຍຫຼັງ ຫ້ອງການສຶກສາທິການ ແລະ ກິລາເມືອງ ໄດ້ລົງເກັບກຳສະຖິຕິປະຊາກອນທີ່ມີເກນອາຍຸ 15-35 ປີ ທີ່ຍັງບໍ່ທັນຈົບຊັ້ນມັດທະຍົມຕອນຕົ້ນ ຈຳນວນ 2.490 ຄົນ, ຍິງ 874 ຄົນ ທີ່ຍັງຕົກຫຼົ່ນມາຈາກສາຍສາມັນສຶກສາ. ມາຮອດ ສົກຮຽນ 2015-2016 ຜ່ານມານີ້ໄດ້ຈັດຕັ້ງ ການຮຽນ-ການສອນ ຊັ້ນມັດທະຍົມຕົ້ນບຳລຸງ 28 ບ້ານ, ມີກຸ່ມເປົ້າໝາຍຜູ້ຮຽນທັງໝົດ 552 ຄົນ, ຍິງ 173 ຄົນ, ໄດ້ຮຽນຈົບ ແລະ ຜ່ານການປະເມີນ ແລະ ສອບເສັງຕົວຈິງແມ່ນໄດ້ 100% ສະເພາະການປະກາດຈົບຊັ້ນມັດທະຍົມຕອນຕົ້ນບຳລຸງຄັ້ງນີ້ ແມ່ນເປັນເມືອງທີ 7 ຂອງແຂວງຫົວພັນ ແລະ ເປັນເມືອງທີ 100 ໃນທົ່ວປະເທດ
ຕອນທ້າຍພິທີ, ທ່ານ ຮອງສດສະດາຈານ, ປະລິນຍາເອກ ຄຳຜາຍ ສີສະຫວັນ ຮອງລັດຖະມົນຕີ ກະຊວງສຶກສາທິການ ແລະ ກິລາ ໄດ້ມອບໃບຢັ້ງຢືນ ປະກາດຈົບຊັ້ນ ມັດທະຍົມຕອນຕົ້ນບຳລຸງ ທົ່ວເມືອງຊຳໃຕ້ ໃຫ້ແກ່ ເມືອງວຽງໄຊ ຮັບໂດຍ ທ່ານ ແອງສອນ ນາມມະນີນິນ ເຈົ້າເມືອງວຽງໄຊ ແລະ ໄດ້ມີການມອບໃບຢັ້ງຢືນ, ໃບຍ້ອງຍໍຂັ້ນກະຊວງ, ຂັ້ນແຂວງ ໃຫ້ບັນດາກົມກອງຫ້ອງການ, ຄອບຄົວ ແລະ ບຸກຄົນ, ນາຍບ້ານ ຕາມລຳດັບ ຫຼັງຈາກນັ້ນ, ຄະນະນໍາໄດ້ຕັດແຖບຜ້າ, ເປີດປ້າຍ ແລະ ລັ່ນຂ້ອງ 9 ບາດ ເພື່ອເປັນສັນຍາລັກໃນການປະກາດ ເມືອງວຽງໄຊ ແຂວງຫົວພັນ ເປັນເມືອງ ຈົບຊັ້ນມັດທະຍົມຕອນຕົ້ນບຳລຸງຢ່າງເປັນທາງການ.
Editor: ກຳປານາດ ລັດຖະເຮົ້າ
