ງານສະຫຼອງວັນຄູແຫ່ງຊາດ ຄົບຮອບ 23 ປີ ເມືອງທ່າແຕງ,ແຂວງເຊກອງ ໄດ້ຈັດຂື້ນໃນວັນທີ 6 ຕຸລາ 2017 ຜ່ານມານີ້. ທີ່ສະຫນາມກິລາເມືອງທ່າແຕງ ໂດຍມີ ທ່ານ ຄຳສອນ ກອນເຍີ ເຈົ້າເມືອງ-ເມືອງທ່າແຕງ, ແລະ ທ່ານນາງ ດວງຈັນ ເທບບົວລະບັດ ຫົວໜ້າຫ້ອງການສຶກສາທິການ ແລະ ກິລາເມືອງ, ມີຄະນະປະຈຳພັກເມືອງ, ກຳມະການພັກເມືອງ, ຫົວໜ້າຫອງການ, ຄູອາຈານ ແລະ ນ້ອງນັກຮຽນເຂົ້າຮ່ວມຢ່າງຫຼວງຫຼາຍ.

ພາຍໃນພິທີ ທ່ານນາງ ດວງຈັນ ເທບບົວລະບັດ ຫົວໜ້າຫ້ອງການສຶກສາທິການ ແລະ ກິລາເມືອງທ່າແຕງ ໄດ້ຍົກໃຫ້ເຫັນວ່າ: ເພື່ອເຮັດໃຫ້ການລະນຶກເຖິງຄຸນງາມຄວາມດີຂອງນາຍຄູຄຳ ກໍຄືນາຍຄູໃນທົ່ວສັງຄົມ ໃຫ້ກາຍເປັນຄວາມລະນຶກອັນຊົງຈຳ ອັນລໍ້າຄ່າ ຈິ່ງມີຄວາມຈຳເປັນໃຫ້ມີວັນຄູແຫ່ງຊາດ ໂດຍກຳນົດເອົາ ວັນຮັບລາດສະການຄູ ຂອງນາຍຄູຄຳ ເຊິ່ງແມ່ນຄູສັນຊາດລາວຄົນທຳອິດ ຄື ວັນທີ 7 ຕຸລາ ເປັນວັນຄູແຫ່ງຊາດ. ການຈັດໃຫ້ມີວັນຄູແຫ່ງຊາດຂຶ້ນເພື່ອໃຫ້ຄົນລາວທຸກເຜົ່າຊົນ ທຸກຊັ້ນຄົນ ໃນວົງຄະນະຍາດແຫ່ງຊາດລາວ ໄດ້ມີໂອກາດທົບທວນເຖິງວິວັດທະນາການແຫ່ງຊີວິດ ຂອງຕົນໃນແຕ່ລະໄລຍະ ໂດຍເລີ່ມຈາກຊີວິດໃນໄວເດັກກຳເນີດມາ ຢູ່ໃນການລ້ຽງດູຂອງຜູ້ເປັນພໍ່-ແມ່, ສ່ວນຄູອາຈານ ໄດ້ຖ່າຍທອດຄວາມຮູ້ໃຫ້ແກ່ຕົນ ແລະ ໃນຄະນະທີ່ທຸກຄົນຄິດເຖິງບນຸຄຸນດັ່ງກ່າວນັ້ນ ກໍເຮັດໃຫ້ທຸກຄົນສະດຸ້ງຂຶ້ນວ່າ ຕົນເອງໄດ້ກະທຳຫຍັງແດ່ ເພື່ອສະແດງເຖິງຄວາມກະຕັນຍູກະຕະເວທີຕໍ່ຄູ-ອາຈານ, ຈະມີສິ່ງໃດປະກອບສ່ວນຕໍ່ຄູ ເຊີ່ງເປັນການເຊີີດຊູກຽດສັກສີ ຖານະບົດບາດຂອງຄູ ຕໍ່ສັງຄົມ, ຄຸນປະໂຫຍດ ແລະ ຄຸນງາມຄວາມດີຂອງຄູ ທີ່ມີຕໍ່ປະເທດຊາດ ຈະໄດ້ຮັບການຍົກສູງ ຈາລຶກຢູ່ໃນສັງຄົມໄວ້ໃຫ້ນານຕະຫຼອດໄປ. ແລະ ໃນໂອກາດນີ້ ທ່ານ ຄໍາສອນ ກອນເຍີ ເຈົ້າເມືອງ-ເມືອງທ່າແຕງ ໄດ້ຮຽກຮ້ອງໃຫ້ອຄູອາຈານໃນທົ່ວສັງຄົມພ້ອມກັນປະຕິບັດໜ້າທີ່ຂອງຕົນດ້ວຍຄວາມຮັບຜິດຊອບສູງ, ເອົາໃຈໃສ່ສືບຕໍ່ຮັກສາຜົນງານການສິດສອນ ແລະ ຖ່າຍທອດຄວາມຮູ້ ໃຫ້ແກ່ນັກຮຽນເພື່ອອະນາຄົດຂອງປະເທດຊາດ.

Editor: ກຳປານາດ ລັດຖະເຮົ້າ