ພະແນກສຶກສາທິການ ແລະ ກິລາແຂວງໄຊຍະບູລີ. ໄດ້ຈັດພິທີສະເຫຼມສະເຫຼອງວັນຄູແຫ່ງຊາດຄົບຮອບ 23 ປີ ຂື້ນໃນຕອນເຊົ້າວັນທີ 10 ຕຸລາ 2017 ຜ່ານມາທີ່ຫ້ອງປະຊຸມພະແນກສຶກສາທິການ ແລະ ກິລາແຂວງໄຊຍະບູລີ, ໂດຍໃຫ້ກຽດເຂົ້າຮ່ວມຂອງທ່ານນາງ ບຸນພັກ ອິນທະປັນຍາ ກຳມະການປະຈຳພັກແຂວງ, ຮອງເຈົ້າແຂວງໄຊຍະບູລີ. ຜູ້ຊີ້ນໍາຂົງເຂດວັດທະນະທໍາສັງຄົມ, ມີບັນດາກໍາມະການປະຈໍາພັກແຂວງ, ກຳມະການພັກແຂວງ, ຜູ້ບໍລິຫານການສຶກສາ, ຄູອາວຸໂສບຳນານ, ຄູອາຈານ, ນັກຮຽນ, ນັກສຶກສາ, ພ້ອມດ້ວຍແຂກຖືກເຊີນເຂົ້າຮ່ວມ.

ກ່ອນຈະເຂົ້າສູ່ພິທີທາງການນັ້ນແຂກທີ່ເຂົ້າຮ່ວມ ໄດ້ຊົມການສະແດງສິນລະປະ-ວັນນະຄະດີທັງໝົດ ຈຳນວນ 3 ລາຍການ, ຫຼັງຈາກນັ້ນ ທ່ານນາງ ບຸນພັກ ອິນທະປັນຍາ ຮອງເຈົ້າແຂວງໄຊຍະບູລີ ໄດ້ຂື້ນປາໄສ ເນື່ອງໃນໂອກາດພິທີສະເຫຼີມສະຫຼອງວັນຄູແຫ່ງຊາດ 7 ຕຸລາ ຄົບຮອບ 23 ປີ ( 7ຕຸລາ 1994 - ວັນທີ 7 ຕຸລາ 2017 ) ເຊິ່ງທ່ານໄດ້ກ່າວບາງຕອນວ່າ: ວັນທີ 7 ຕຸລາຂອງທຸກໆ ປີແມ່ນມີຄວາມໝາຍຄວາມສຳຄັນຫຼາຍບໍສະເພາະແຕ່ຂົງເຂດການສຶກສາແລະກິລາເທົ່ານັ້ນ ຫາກຍັງເປັນຂີດໝາຍສຳຄັນທີ່່ບົ່ງອອກໃຫ້ທຸກໆຄົນໃນສັງຄົມ. ໄດ້ທົບທວນຄືນວິວັດທະນາການຊີວິດຕົນທີ່ໄດ້ຮັບການລ້ຽງດູຈາກພໍ່ແມ່, ໄດ້ສຶກສາຮໍ່າຮຽນແຕ່ຊັ້ນລ້ຽງເດັກ - ອານຸບານ, ປະຖົມ, ມັດທະຍົນຕອນຕົ້ນ- ຕອນປາຍແລະສືບຕໍ່ຮຽນວິຊາຊີບໃດໜຶ່ງ ເຊິ່ງໄດ້ສ້າງເງື່ອນໄຂອັນດີແກ້ຕົນເອງໄດ້ມີວິຊາສະເພາະກາຍເປັນພະນັກງານການນຳຂັ້ນຕ່າງໆ ເປັນຊ່ຽວຊານ, ເປັນພະນັກງານ, ທະຫານ,ຕໍ່າຫຼວດມີຊັ້ນຕໍ່າແໜ່ງສູງ, ເປັນນັກທຸລະກິດ, ຊາວຄ້າຂາຍຮັ່ງມີລໍ້າລວຍຄືທຸກວັນນີ້ ກໍ່ຍ້ອນທຸກຄົນໄດ້ຮັບການສຶກສາຮໍ່າຮຽນໂດຍມີຄູ- ອາຈານເປັນຜູ້ສິດສອນ. ພ້ອມກັນນີ້ ໄດ້ມີຕາງໜ້ານ້ອງນັກຮຽນ ຂື້ນອ່ານສານອວຍພອນຄູ, ຕໍ່ຈາກນັ້ນ ຕາງໜ້າອົງການຈັດຕັ້ງກໍ່ໄດ້ຂື້ນມອບກະຕ່າຂອງຂັວນໃຫ້ກັບ ຫົວໜ້າ-ຮອງຫົວໜ້າພະແນກ ທີ່ເປັນການນຳ ຂະແໜງສຶກສາທິການ ແລະ ກິລາເພື່ອເປັນການຍ້ອງຍໍຊົມເຊີຍ ເປັນຊວັນກຳລັງໃຈ ໃນການນຳພາວຽກງານການສຶກສາ ໃຫ້ໄດ້ຮັບການພັດທະນາ ເປັນກ້າວກ້າວ.

Editor: ກຳປານາດ ລັດຖະເຮົ້າ