ກາງເດືອນ ຕຸລາ 2017 ນີ້, ທີ່ຫ້ອງປະຊຸມໃຫ່ຍຂອງມະຫາວິທະຍາໄລຈຳປາສັກ ໄດ້ມີພິທີເປີດສົກຮຽນ 2017-2018 ພ້ອມທັງສະເຫຼີມສະຫລອງວັນຄູແຫ່ງຊາດ 7 ຕຸລາ 1994-2017 ຄົບຮອບ 23 ປີ ຂື້ນ. ໂດຍການເປັນປະທານຂອງ ທ່ານ ປະລິນຍາເອກ ບຸນມີ ພອນສະຫັວນ ອະທິການບໍດີມະຫາວິທະຍາໄລຈຳປາສັກ ມີພະນັກງານ ຄູ- ອານຈານ ພາຍໃນມະຫາວິທະຍາໄລຈໍາປາສັກ, ແຂກຖືກເຊີນ ພ້ອມດ້ວຍນັກສຶກສາເຂົ້າຮ່ວມຢ່າງພ້ອມພຽງ.

ໃນພິທີໄດ້ຮັບຟັງການລາຍງານການຈັດຕັ້ງການເຄື່ອນໄຫວປະຕິບັດແຜນພັດທະນາຂອງມະຫາວິທະຍາໄລຈຳປາສັກ ໃນໄລຍະ 1 ປີຜ່ານມາ, ໄດ້ສະຫຼຸບຕີລາຄາດ້ານດີ, ດ້ານອອ່ນ ຂໍ໊ຄົງຄ້າງ ເປັນຕົ້ນແມ່ນວຽກງານການເມືອງແນວຄິດ, ວຽກງານການຮຽນການສອນ ແມ່ນປະຕິບັດຕາມທິດຊີ້ນຳຂອງກະຊວງສຶກສາທິການ ແລະ ກິລາ ວາງອອກຢ່າງເຂັ້ມງວດ, ໄດ້ຈັດຕັ້ງການຮຽນ-ການສອນ ທັງລະດັບອະນຸປະລິນຍາ ແລະ ປະລິນຍາຕີ ລວມທັງລະບົບຕໍ່ເນື່ອງ, ໃນ 06 ຄະນະວິຊາ ຄື: ນິຕິສາດ, ລັດຖະສາດ, ພາສາອັງກິດທົ່ວໄປ, ບໍລິຫານການທ່ອງທ່ຽວ, ລ້ຽງສັດ, ປູກຝັງ, ການປ່າໄມ້, ຄູ້ມຄອງ, ເສດຖະສາດ, ຄູຄະນິດສາດ ວິສະວະກຳໂຍທາ ແລະ ວິສະວະກຳໄຟຟ້າ ແລະ ວຽກງານອື່ນໆ.

ໃນສົກປີ 2016-2017 ມີນັກສຶກສາທັງໝົດ 4,775 ຄົນ, ຍິງ 2,158 ຄົນ, ພອ້ມທັງຜ່ານແຜນທິດທາງການເຄື່ອນໄຫວ ຂອງມະຫາວິທະຍາໄລຈຳປາສັກ ໃນຕໍ່ໜ້າ, ຈາກນັ້ນ ກໍ່ໄດ້ຜ່ານປະຫວັດຄວາມເປັນມາ ຄວາມໝາຍສຳຄັນຂອງວັນຄູແຫ່ງຊາດລາວ, ຄຳວ່າ: ຄູແມ່ນເປັນແມ່ພີມຂອງຊາດ, ການຮຽນ-ການສອນ ແລະ ປະຫວັດຄວາມເປັນມາຂອງນາຍຄູຄຳ ເຊິງແມ່ນຄູຄົນລາວຜູ້ທຳອິດທີ່ໄດ້ອຸທິດຕົ້ນເຂົ້າໃນພາລະກິດສິດສອນຢ່າງຫ້າວຫັນໄປພ້ອມໆກັບການປຸກລະດົມພໍ່ແມ່ປະຊາຊົນບັນດາເຜົ່າ ເຂົ້່າຮ່ວມພາລະກິດຕໍ່ສູ້ກູ້ຊາດຕ້ານຈັກກະພັດລ່າເມືອງຂື້ນທັງແບບເກົ່າ ແລະ ໃໝ່ ຢ່າງພິລະອາດຫານ. ພາຍຫລັງປະເທດຊາດໄດ້ຮັບການປົດປ່ອຍຈິ່ງເຮັດໃຫ້ພື້ນຖານການສຶກສາໃນຖັນແຖວຄູໄດ້ຮັບການພັດທະນາດີຂື້ນ, ດັ່ງນັ້ນ, ເພື່ອເປັນການລະນຶກເຖິງຄຸນງາມຄວາມດີຂອງຄູໃນທົ່ວສັງຄົມ ພັກລັດຖະບານຈິ່ງໄດ້ກຳນົດໃຫ້ມີວັນຄູແຫ່ງຊາດ ໂດຍຖືເອົາວັນເຂົ້າລາດຊະການຂອງນາຍຄູຄຳ ວັນທີ່ 7 ຕຸລາ ແລະ ໄດ້ຈັດຕັ້ງສະເຫຼີມສະຫລອງແຕ່ປີ 1994 ມາຮອດປັດຈຸບັນຄົບຮອບ 23 ປີ ເພຶ່ອໃຫ້ທຸກພາກສ່ວນໄດ້ພ້ອມກັນສະເຫຼີມສະຫລອງ ສະແດງຄວາມກະຕັນຍູຮູ໊ບຸນຄຸນຕໍ່ຄູ ແລະ ອາຈານ ທີ່ໄດ້ສິດສອນມາ ແລະ ເປັນການປູກຈິດສຳນຶກໃຫ້ນັກຮຽນ ນັກສຶກສາ ໄດ້ຮັບຮູ້ຄວາມໝາຍຄວາມສຳຄັນຂອງຄູຕະຫລອດໄປ.

ທີມຂ່າວແຂວງຈໍາປາສັກ

Editor: ກຳປານາດ ລັດຖະເຮົ້າ