ເພື່ອເປັນການພັດທະນາຊັບພະຍາກອນມະນຸດ ຕາມທິດຊີ້ນໍາຂອງພັກ - ລັດຖະບານ ກໍຄື ກະຊວງສືກສາທິການ ແລະ ກິລາ ຕາມແຜນຍຸດທະສາດການພັດທະນາ ການສຶກສາຂອງ ສປປລາວ, ຍົກສູງມາດຕະຖານການສຶກສາ ໃຫ້ໃກ້ຄຽງ ແລະ ທຽບເທົ່າສາກົນ ສະນັ້ນ ໃນວັນທີ 8 ພະຈິກ 2017 ຈຶ່ງໄດ້ມີການ ເປີດນໍາໃຊ້ຫຼັກສູດ ປະລີນຍາໂທ ສາຂາພັດທະນາໃນເຂດສ້າງເຄື່ອນໄຟຟ້າພະລັງນໍ້າແບບຍືນຍົງຂື້ນ ໂດຍການເປັນປະທານຂອງທ່ານ ສາດສະດາຈານ ສົມສີ ຍໍພັນໄຊ ອະທິການບໍດີ ມະຫາວິທະຍາໄລແຫ່ງຊາດ, ເຂົ້າຮ່ວມມີ ຮອງກົມສຶກສາຊັ້ນສູງ ກະຊວງສືກສາ ທິການ ແລະ ກິລາ, ຜູ້ອໍານວຍການອົງການ ຈີໄອແຊັດ ປະຈໍາ ສປປ ລາວ, ມີບັນດາ ຕາງຫນ້າກະຊວງອ້ອມຂ້າງ ແລະ ພາກສ່ວນກ່ຽວຂ້ອງເຂົ້າຮ່ວມ.

ຄືທີ່ຮູ້ກັນແລ້ວວ່າ ໃນການພັດຂອງ ສປປ ລາວເຮົາ ເຊິ່ງຖືເອົາການພັດທະນາເຄື່ອນໄຟຟ້າ ເປັນທ່າແຮງອັນສໍາຄັນ ໃນໄລຍະ 10 ປີຜ່ານມາ ແລະ ໃນປະຈຸບັນກໍ່ ມີການສໍາຫຼວດ, ກໍ່ສ້າງ ແລະ ພັດທະນາເຄື່ອນໄຟຟ້າຢ່າງແຜ່ຫຼາຍ ແລະ ກ້ວາງຂວາງ ເພື່ອເປັນໝໍໄຟໃນອາຊຽນ, ດັ່ງນັ້ນການ ສ້າງບຸກຄະລາກອນ ເພື່ອຮັບໃຊ້ວຽກງານດັ່ງກ່າວຈຶ່ງມີຄວາມສໍາຄັນ ແລະ ຈໍາເປັນຫຼາຍ, ການປັບປຸງຫຼັກສູດເກົ່າ ແລະ ສ້າງຫຼັກສູດໃຫມ່ກໍ່ເຊັ່ນດຽວກັນ ເພື່ອສ້າງຊັບພະຍາກອນມະນຸດທີ່ມີຄວາມຮູ້-ຄວາມສາມາດ, ມີຄຸນສົມບັດທີ່ດີ ຮັບໃຊ້ສັງຄົມ ປະກອບສ່ວນເຂົ້າໃນການສ້າງສາພັດທະນາປະເທດຊາດ ໃຫ້ຫລຸດພົ້ນອກຈາກຄວາມທຸກຍາກ ແລະ ມີຄວາມສີວິໄລໄປຄຽງຄູ່ກັບ ຄວາມຍືນຍົງທາງດ້ານສິ່ງແວ້ດລ້ອມ

ຫຼັກສູດ ປະລີນຍາໂທ ສາຂາພັດທະນາໃນເຂດສ້າງເຄື່ອນໄຟຟ້າພະລັງນໍ້າແບບຍືນຍົງ ແມ່ນໄດ້ຜ່ານ ກອງປະຊຸມປຶກສາຫາລື ແລະ ສືກສາຄວາມຕ້ອງການທາງສັງຄົມ ຈຶ່ງໄດ້ຮັບອະນຸຍາດ ຈາກກະຊວງສຶກສາທິການ ແລະ ກິລາ ເພື່ອນໍາໃຊ້ ໃນວັນທີ 31 ຕຸລາ 2017 ຫຼັກສູດດັ່ງກ່າວນີ້ແມ່ນ ພາຍໃຕ້ການຮ່ວມມື ລະຫວ່າງ ມະຫາວິທະຍາໄລແຫ່ງຊາດ ແລະ ອົງການຮ່ວມມືລາວເຢຍລະມັນເພື່ອການພັດທະນາ ຫຼື ຈີໄອແຊັດ ໃນການເປີດນໍາໃຊ້ຫຼັກສູດດັ່ງກ່າວນີ້ ມະຫາວິທະຍາໄລແຫ່ງຊາດ ຈະເປັນເຈົ້າການໃນການຈັດຕັ້ງປະຕິບັດ, ສ່ວນຜູ້ທີ່ຈະເຂົ້າສຶກສາ ແລະ ຂອບເຂດການຮຽນຮູ້ ແມ່ນກວມເອົາຫຼາຍພາກສ່ວນ ນັບຕັ້ງແຕ່ຊັບພະຍາກອນທໍາມະຊາດ ແລະ ສິງແວດລ້ອມ, ດ້ານກະສິກໍາ - ປ່າໄມ້, ເສດຖະກິດ - ສັງຄົມ ແລະ ອື່ນໆ. ໃນພິທີດັ່ງກ່າວຍັງໄດ້ມີການ ເປີດໂອກາດ ໃຫ້ບັນດາຜູ້ຕາງຫນ້າຈາກກະຊວງ ແລະ ທຸກພາກສ່ວນທີ່ເຂົ້າຮ່ວມໃນໃນພິທີ ປະກອບຄໍາຄິດເຫັນ ເພື່ອເປັນທິດທາງໃນການຈັດຕັ້ງປະຕິບັດ ໃຫ້ມີຜົນສໍາເລັດ.

ສໍາລັບເງື່ອນໄຂຜູ້ທີ່ຈະເຂົ້າຮຽນ ໃນຫຼັກສູດ ປະລີນຍາໂທ ສາຂາພັດທະນາໃນເຂດສ້າງເຄື່ອນໄຟຟ້າພະລັງນໍ້າແບບຍືນຍົງ ແມ່ນຈະໄດ້ມີການຂັດເລືອກ ໂດຍອີງໃສ່ຂໍ້ຕົກລົງວ່າດ້ວຍມາດຕາຖານ ຫຼັກສູດແຫ່ງຊາດລະດັບປະລີນຍາໂທຂອງ ກະຊວງສຶກສາທິການ ແລະ ກິລາ ດັ່ງນີ້: ສໍາລັບນັກດສຶກສາທີ່ ຮຽນຈົບປະລີນຍາຕີແລ້ວໜ້ອຍກວ່າ 2 ປີ ຕ້ອງມີຄະແນນ 3,00 ຂື້ນໄປ ແລະ ສໍາລັບນັກດສຶກສາທີ່ ຮຽນຈົບປະລີນຍາຕີແລ້ວຫລາຍກວ່າ 2 ປີ. ຕ້ອງມີຄະແນນ 2,00 ຂື້ນໄປ ແລະ ຕ້ອງຮຽນຈົບປະລີນຍາຕີ ສາຂາຕ່າງໆ ໃນມະຫາວິທະຍາໄລແຫ່ງຊາດ ໂດຍສະເພາະແມ່ນຄະນະກະເສດສາດ, ຄະນະວິທະຍາສາດປ່າໄມ້, ຄະນະວິທະຍາສາດສິ່ງແວ້ດລ້ອມ, ຄະນະວິທະຍາສາດສັງຄົມ, ຄະນະວິທະຍາສາດທໍາມະຊາດ, ຄະນະຊັບພະຍາກອນນໍ້າ, ຄະນະເສດທະສາດ-ບໍລິຫານທຸລະກິດ, ຄະນະວິສະວະກໍາສາດ ແລະ ຕ້ອງມີຄຸນສົມບັດດີ, ບໍ່ເຄີຍມີຄະດີ ຫຼື ຖືກລົງໂທດ ຕັດອິດສະລະພາບມາກ່ອນ, ມີຄວາມຮູ້ພື້ນຖານທາງດ້ານພາສາອັງກິດ - ຄອມພິວເຕີ້ ແລະ ມີຄວາມສາມາດໃນການປະຕິບັດພັນທະ ແລະ ຄ່າຮຽນ.

Editor: ກຳປານາດ ລັດຖະເຮົ້າ