ໃນທ້າຍອາທິດຜ່ານມາ ທີ່ໂຮງຮຽນປະຖົມ ສົມບູນດອນກອຍ, ໂດຍຫ້ອງການຂ່າວສານ ຄະນະລັດຖະບານ ສາທາລະນະລັດ ປະຊາຊົນຈີນ ຮ່ວມກັບ ສະຖານທູດ ສປ ຈີນ ປະຈຳລາວ ແລະ ກະຊວງສຶກສາທິການ ແລະ ກິລາ ສປປ ລາວ ເຊິ່ງຕາງໜ້າ ໃນການຈັດຕັ້ງປະຕິບັດ, ໂດຍກອງທຶນສາທາລະນະ ຈົງຕ້າວປັກກິ່ງ ແລະ ບໍລິສັດ ຕາຂ່າຍໄຟຟ້າພາກໃຕ້ຈີນ ຈຳກັດ. ໄດ້ມອບເຄື່ອງອຸປະກອນ ການສຶກສາຈຳນວນໜຶ່ງ ໃຫ້ແກ່ໂຮງຮຽນປະຖົມສົມບູນດອນກອຍ ນະຄອນຫລວງວຽງຈັນ.
ຕາງໜ້າມອບໂດຍ ທ່ານ ກົ່ວ ເວີ້ຍ ໝິິນ (Cuo Wei Min) ຮອງຫົວໜ້າຫ້ອງວ່າການ ຖະແຫລງຂ່າວ ຄະນະລັດຖະບານຈີນ ແລະ ຮັບໂດຍ ທ່ານ ຄອນສັນ ແສງປະເສີດ ອຳນວຍການໂຮງຮຽນ ປະຖົມສົມບູນດອນກອຍ. ໃຫ້ກຽດເປັນເຂົ້າຮ່ວມໂດຍ, ທ່ານ ຄຳໄພ ສີສະຫວັນ ຮອງລັດຖະມົນຕີ ກະຊວງສຶກສາທິການ ແລະ ກິລາ, ພ້ອມດ້ວຍບັນດາຄູອາຈານ ແລະ ນ້ອງນັກຮຽນ.
ສຳລັບ ເຄື່ອງອຸປະກອນຊ່ວຍເຫລືອ ການສຶກສາໃນຄັ້ງນີ້, ແມ່ນຄັ້ງທຳອິດທີ່ເປັນນ້ຳໃຈ ຈາກ ສປ ຈີນ ທີ່ໄດ້ໃຫ້ ການຊ່ວຍເຫລືອ ແກ່ໂຮງຮຽນດັ່ງກ່າວ, ໃນນັ້ນ ມີຖົງປື້ມສຳລັບນ້ອງນັກຮຽນ, ອຸປະກອນການຮຽນ-ການສອນ ຈຳນວນໜຶ່ງ ແລະ ມີໂຄມໄຟຕັ້ງໂຕະ ທີ່ເຮັດຈາກພະລັງງານແສງອາທິດ 1 ໜ່ວຍ ສຳລັບ ໃຊ້ໃນຫ້ອງການ. ທັງນີ້ ກໍ່ເພື່ອເພີ່ມທະວີການຮ່ວມມື ດ້ານຂະແໜງການສຶກສາ ລະຫວ່າງ ສອງປະເທດ ລາວ-ຈີນ ແລະ ທັງເປັນການຊ່ວຍເຫລືອ ໃຫ້ບັນດາໂຮງຮຽນທ້ອງຖີ່ນຕື່ມອີກ. ນອກຈາກນີ້, ຄະນະດັ່ງກ່າວ, ຍັງມີແຜນການ ຈະເດີນທາງໄປມອບເຄື່ຶອງຊ່ວຍ ເຫລືອ ໃຫ້ກັບ 4 ໂຮງຮຽນທ້ອງຖິ່ນ ທີ່ເມືອງນາໝອກ, ແຂວງ ອຸດົມໄຊ.

Editor:  ຂ່າວສານປະເທດລາວ