ແຂວງ ສາລະວັນ ໃຊ້ງົບປະມານ 19.451 ລ້ານກວ່າກີບ ໃສ່ໂຄງການປັບປຸງ-ກໍ່ສ້າງພື້ນຖານໂຄງລ່າງສະ ໜາມກິລາຂອງແຂວງ ເພື່ອກະກຽມຄວາມພ້ອມຮັບໃຊ້ງານມະຫາກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ VII ທີ່ແຂວງ ສາລະວັນ ເປັນເຈົ້າພາບໃນປີ 2020.
ໃນທ້າຍອາທິດຜ່ານມານີ້ ຢູ່ສະໝາມກິລາແຂວງ ສາລະວັນ ໄດ້ມີພິທີວາງສີລາລຶກໂຄງການປັບປຸງ ກໍ່ສ້າງສະໝາມກິລາແຂວງ, ໂດຍການເຂົ້າຮ່ວມຂອງ ທ່ານ ສີສຸວັນ ວົງຈອມສີ ເຈົ້າແຂວງໆ ສາລະວັນ, ທ່ານ ພູທົງ ຄໍາມະນີວົງ ຮອງເຈົ້າແຂວງ ປະທານສະມາຄົມກິລາກາຍະກຳແຂວງ, ມີ ທ່ານ ຈື ຈູ ກັງ ບໍລິສັດ ອິນທະສິດກໍ່ສ້າງເຄສະຖານຈຳກັດຜູ້ດຽວ, ມີບັນດາຄະນະປະຈຳພັກແຂວງ, ກຳມະການພັກແຂວງ, ພະແນກການອ້ອມຂ້າງ ແລະ ພາກສ່ວນຕ່າງໆທີ່ກ່ຽວ ຂ້ອງເຂົ້າຮ່ວມ.
ທ່ານ ສີລີສັກ ຖະໜອມຮັກ ຫົວໜ້າພະແນກສຶກສາທິການ ແລະ ກິລາແຂວງ ທັງເປັນເຈົ້າຂອງໂຄງການດັ່ງກ່າວ ໄດ້ລາຍງານກ່ຽວກັບການເຄື່ອນໄຫວປະຕິບັດໂຄງການດັ່ງກ່າວໃຫ້ຮູ້ວ່າ: ໂຄງການປັບປຸງ, ກໍ່ສ້າງ ແລະ ສ້ອມແປງສະໜາມກິລາແຂວງ ເປັນໂຄງການໜຶ່ງ ທີ່ບັນຈຸເຂົ້າໃນແຜນພັດທະນາເສດຖະກິດ-ສັງຄົມ 5 ປີ ຂອງແຂວງ ສົກປີ 2016-2020 ແລະ ໄດ້ສຳຫຼວດອອກແບບມາແຕ່ປີ 2016. ສໍາລັບ ການກໍ່ສ້າງສະໜາມກິລາ ເປີດ-ປິດ ມີມູນຄ່າ 19 ຕື້ກວ່າກີບ ແລະ ຈະປະຕິບັດໃນ 4 ໜ້າວຽກໃຫຍ່ ຄື: ກໍ່ສ້າງອັດສະຈັນບ່ອນນັ່ງຊົມ, ກໍ່ສ້າງສະໜາມກິລາ(ເດີ່ນເຕະບານ), ກໍ່ສ້າງຮ່ອງແລ່ນອ້ອມສະໜາມ ແລະ ກໍ່ສ້າງຮ່ອງລະບາຍນ້ຳ ໂດຍແມ່ນ ບໍລິສັດ ອິນທະສິດກໍ່ສ້າງເຄຫາສະຖານ ຈຳກັດ ຜູ້ດຽວ ເປັນຜູ້ຮັບເໝົາກໍ່ສ້າງ ກຳນົດເວລາການກໍ່ສ້າງ 9 ເດືອນ ນັບແຕ່ມື້ວາງສີລາລຶກເປັນຕົ້ນໄປ ແລະ ຄາດວ່າຈະໃຫ້ສຳເລັດໃນປີ 2019.
ໃນຕອນທ້າຍພິທີ ທ່ານ ສີສຸວັນ ວົງຈອມສີ ເຈົ້າແຂວງໆສາລະວັນ, ທ່ານ ຈື ຈຸງ ກັງ ກໍ່ໄດ້ຮ່ວມຕັດແຖບຜ້າ, ວາງສີລາລືກ ແລະ ລັ່ນຄ້ອງ 9 ບາດ ເອົາເລີກເອົາໄຊ ພ້ອມດ້ວຍແຂກທຸກພາກສ່ວນເຂົ້າຮ່ວມເປັນສັກຂິພິຍານ.

Editor: ດາວໄຊ ສີວິໄລ