ສູນວັດທະນະທຳຈີນ ປະຈຳລາວ ຈັດງານວາງສະແດງຮູບພາບ ລຽບຕາມປະເທດ “ໜຶ່ງແລວທາງໜຶ່ງເສັ້ນທາງ” ຂອງ ທ່ານ ຫລິວ ຢ້ຽນ ໜິງ, ສີລະປິນແຕ້ມຮູບມ້າ ຍຸກໃໝ່ ທີ່ມີຊື່ສຽງຈາກ ສປ ຈີນ, ເຊິ່ງໄດ້ຈັດຂຶ້ນ ໃນວັນທີ 14 ທັນວາ 2017 ທີ່ສູນວັດທະນະທຳຈີນ, ໂດຍມີ ທ່ານ ບົວເງິນ ຊາພູວົງ,ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ທ່ານ ວາງ ເວີນ ທຽນ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປ ຈີນ ປະຈຳລາວ, ທ່ານ ນາງ ຕິ່ງ ຊິ່ງ, ຫົວໜ້າສູນ ວັດທະນະທຳຈີນ ປະຈຳລາວ, ພ້ອມດ້ວຍແຂກຖືກເຊີນ ເຂົ້າຮ່ວມ.
ໃນໂອກາດດັ່ງກ່າວ, ທ່ານ ໄມສິງ ຈັນບຸດຕີ ປະທານສະມາຄົມວິຈິດສິນແຫ່ງຊາດ, ຜູ້ອຳນວຍ ການສະຖາບັນວິຈິດສິນແຫ່ງຊາດລາວ ກ່າວວ່າ: ການວາງສະແດງຮູບພາບຄັ້ງນີ້, ເປັນການສົ່ງເສີມການພົວພັນຮ່ວມມືດ້ານຂະແໜງວິຈິດສິນ ລະຫວ່າງ ສູນວັດທະນະທຳ ສປ ຈີນ ກັບສະຖາບັນວິຈິດສິນແຫ່ງຊາດ ເພື່ອເຜີຍແຜ່ ແລະ ຖ່າຍທອດຄວາມຮູ້ທາງດ້ານເຕັກນິກ ການແຕ້ມຮູບມ້າດ້ວຍນ້ຳມຶກຈີນ ເຊິ່ງເປັນສີລະປະ ແລະ ວັດທະນະທຳອັນລ້ຳຄ່າທີ່ມີຊື່ສຽງຂອງຈີນ. ນອກຈາກນີ້, ຍັງເປັນການແລກປ່ຽນຄວາມຮູ້ ເພື່ອນຳໄປເສີມຂະຫຍາຍ ນໍາໃຊ້ເຂົ້າໃນການຮຽນ-ການສອນ ເພື່ອປະກອບເປັນວິຊາຊີບໃນຂະແໜງສິລະປະວິຈິດຕະກຳຕື່ມອີກ.
ໃນງານວາງສະແດງຄັ້ງນີ້, ໄດ້ລວບລວມເອົາຮູບແຕ້ມມ້າທີ່ແຕ້ມດ້ວຍນ້ຳມຶກຈີນ ຈຳນວນ 40 ຮູບ ມາວາງສະແດງ, ເຊິ່ງການແຕ້ມຮູບມ້າ ດ້ວຍນ້ຳມຶກຈີນ ເປັນຂະແໜງໜຶ່ງຂອງສິລະປະພື້ນເມືອງຂອງຊາວຈີນ ທີ່ມີມາແຕ່ດົນນານແລ້ວ ແລະ ປັດຈຸບັນ ການແຕ້ມຮູບດັ່ງກ່າວ, ໄດ້ກາຍເປັນມໍລະດົກອັນລໍ້າຄ່າຂອງຈີນ. ພິເສດ ໃນງານຜູ້ເຂົ້າຮ່ວມຍັງໄດ້ຊົມການແຕ້ມຮູບສົດ ຈາກ ທ່ານ ຫລິວ ຢ້ຽນ ໜິງ ສິລະປິນແຕ້ມຮູບມ້າຍຸກໃໝ່ ຈາກ ສປ ຈີນ, ເຊິ່ງໄດ້ຮັບຄວາມສົນໃຈ ແລະ ສ້າງຄວາມຕື່ນຕາຕື່ນໃຈໃຫ້ກັບແຂກທີ່ເຂົ້າຮ່ວມຊົມເປັນຢ່າງຍິ່ງ.

Editor: ຂ່າວສານປະເທດລາວ