ວາລະສານວັນນະສີນ ຮ່ວມກັບ ສະມາຄົມນັກປະພັນລາວ ໄດຈັດພິທີມອບຮັບ ລາງວັນ ສີນໄຊ ຂື້ນ ພາຍໃນງານເທດສະການປື້ມ 2017 ໃນວັນທີ 22 ທັນວາ 2017 ຜ່ານມາທີ່ ສູນການຄ້າໄອເຕັກມໍ ນະຄອນຫຼວງວຽງຈັນ. ໂດຍການເປັນປະທານຂອງ ທ່ານນາງ. ບົວໄຂ ເພັງພະຈັນ ຫົວຫນ້າກົມພີມຈໍາໜ່າຍ, ມີ ທ່ານ ທອງໃບ ໂພນທິສານ ປະທານສະມາຄົມນັກປະພັນລາວ. ພ້ອມດ້ວຍບັນດານັກປະພັນ, ນັກກາວີ, ຄູບາ-ອາຈານ ແລະ ນັກຮຽນນັກສືກສາເຂົ້າຮ່ວມ.

ເພື່ອເປັນການສົ່ງເສີມການປະດິດແຕ່ງຂອງນັກປະພັນ ນັກກາວີ ໃນການນໍ້າໃຊ້ຄວາມສາມາດ ແລະ ພອນສະຫວັນຂອງຕົນເຂົ້າໃນການປະກອບສ່ວນ ສ້າງສັນບົດປະພັນວັນນະຄະດີ ທັງເປັນການປຸກລະດົມການປະດິດແຕ່ງ ດ້ານວັນນະກໍາ ໃຫ້ເປັນຊະບວນຟົດຟື້ນ ແລະ ຂະຫຍາຍຕົວຢ່າງກ້ວາງຂວາງ, ສໍາລັບການປະກວດລາງວັນ ສີນໄຊ ລາງວັນວັນນະກໍາສ້າງສັນດີເດັ່ນ ປະຈໍາປີ 2017 ໄດ້ເລີ່ມ ປະກາດຮັບບົດຕັ້ງແຕ່ວັນທີ 16 ມີນາ 2017 ແລະ ໄດ້ປີດ ໃນວັນທີ 10 ພະຈິກ 2017 ຜ່ານມາ ຊຶ່ງມີຜູ້ສົ່ງບົດເຂົ້າປະກວດທັງໝົດ 242 ບົດ ໃນນັ້ນມີ ເລື່ອງສັ້ນ 102 ບົດ, ບົດກະວີ 138 ບົດ ແລະ ນະວະນິຍາຍ 2 ບົດ. ຜ່າການກວດສອບຂອງຄະນະກໍາມະການ ສາມາດເລືອກໄດ້ບົດທີ່ໄດ້ຮັບ ລາງວັນຊະນະເລີດປະເພດເລື່ອງສັ້ນ ໄດ້ແກ່ບົດທີ່ມີຊື່ວ່າ: ປີທີ4 ຂອງ ທ່ານ ອໍາມະຕະ ທົດຊະຣາຊ, ພ້ອມດ້ວຍຜູ້ທີ່ໄດ້ຮັບລາງວັນຊົມເຊີຍອີກ 2 ລາງວັນ ແລະ ບົດທີ່ໄດ້ຮັບລາງວັນຊະນະເລີດ ປະເພດກະວີ ໄດ້ແກ່ບົດທີ່ມີຊື່ວ່າ: ຫອມແຜນດີນລາວ ຂອງ ພະໄພວັນ ມາລາວົງ ພ້ອມກັບຜູ້ທີ່ໄດ້ຮັບລາງວັນຊົມເຊີຍອີກ 5 ລາງວັນ.

Editor: ກຳປານາດ ລັດຖະເຮົ້າ