ກະຊວງສຶກສາທິການ ແລະ ກິລາ ຮ່ວມກັບ ເອັສຊີຈີ ໄດ້ຈັດພິທີມອບທຶນຊຸກຍູ້ການສຶກສາ ແບ່ງປັນຄວາມຝັນກັບ ເອັສຊີຈີ ໃຫ້ນ້ອງນັກຮຽນຈໍານວນ 300 ທຶນ ຂຶ້ນໃນທ້າຍເດືອນທັນວານີ້, ທີ່ນະຄອນຫຼວງວຽງຈັນ. ເຂົ້າຮ່ວມມີ ທ່ານ ຊົມພູ ແກ້ວເປັນຍາ ຫົວໜ້າພະແນກສຶກສາທິການ ແລະກິລາ ນະຄອນຫຼວງວຽງຈັນ, ທ່ານ ປໍລະເມກ ນິສາກອນເສນ ຮອງປະທານຝ່າຍທຸລະກິດໃນພູມີພາກ SCG, ເປັນກຽດເຂົ້າຮ່ວມໂດຍ ທ່ານອັກຄະລະຊະທູດໄທ ປະຈໍາ ສປປ ລາວ, ມີຫົວໜ້າກົມວຽກງານ ກະຊວງສຶກສາທິການ ແລະ ກິລາ, ມີພາກສ່ວນກ່ຽວກ່ຽວຂ້ອງ, ແຂກຮັບເຊີນ, ຄູອາຈານພ້ອມດ້ວຍນັກຮຽນທີ່ໄດ້ຮັບທຶນດັ່ງກ່າວເຂົ້າຮ່ວມ.

ທ່ານ ຊົມພູ ແກ້ວປັນຍາ ຫົວໜ້າພະແນກສຶກສາທິການ ແລະ ກິລາ ນະຄອນຫລວງວຽງຈັນກ່າວວ່າ: ໂຄງການຊຸກຍູ້ທຶນການສຶກສາ SCG Sharing The Dream ແມ່ນໂຄງການທີ່ໃຫ້ທຶນແກ່ນັກຮຽນມັດທະຍົມຕອນປາຍ, ມັດທະຍົມສົມບູນທີ່ຮຽນດີ, ເປັນຜູ້ທີ່ມີຄຸນສົມບັດມີການຮຽນລະດັບປານກາງຂຶ້ນໄປ ແຕ່ຂາດເຂີນດ້ານເສດຖະກິດ. ປະຈຸບັນໂຄງການດັ່ງກ່າວໄດ້ດໍາເນີນມາເປັນຄັ້ງທີ 6 ໂດຍໄດ້ມອບທຶນການສຶກສາໃຫ້ນັກຮຽນຜູ້ດ້ອຍໂອກາດດ້ານເສດຖະກິດ 809 ທຶນ, ລວມມູນຄ່າ 1 ຕື້ 294 ລ້ານກວ່າກີບ. ໃນ 47 ໂຮງຮຽນທົ່ວນະຄອນຫຼວງວຽງຈັນ. ສໍາລັບສົກປີ 2017-2018 ນີ້, ມີຜູ້ເຂົ້າຮ່ວມໂຄງການ 200 ຄົນ, ແລະ ໄດ້ລົງຕິດຕາມສະພາບຕົວຈິງຂອງຄອບຄົວນັກຮຽນ ແລະ ຄັດເລືອກເອົາ 160 ຄົນ.

ສໍາລັບສົກປີ 2017-2018 ນີ້, ໄດ້ມອບທຶນການສຶກສາໃຫ້ນ້ອງນັກຮຽນທັງໝົດ 300 ທຶນ, ໃນນັ້ນ, ນະຄອນຫຼວງວຽງຈັນ 160 ທຶນ, ແຂວງຄໍາມ່ວນ 140 ທຶນ. ນອກຈາກນີ້, ຍັງມອບລາງວັນພິເສດສໍາລັບນັກຮຽນທີ່ເຄີຍໄດ້ຮັບທຶນໃນປີຜ່ານມາທີ່ມີຜົນງານດີເດັ່ນໃນດ້ານການຮຽນ, ກິລາ, ສິນລະປະ ຫຼື ຄວາມສາມາດພິເສດອື່ນໆທີ່ສ້າງຊື່ສຽງໃຫ້ແກ່ໂຮງຮຽນ ຫຼື ລະດັບປະເທດ ຈໍານວນ 12 ທຶນ. ໃນນັ້ນ, ນະຄອນຫຼວງ 7 ທຶນ ແລະ ແຂວງຄໍາມ່ວນ 5 ທຶນ. ປະຈຸບັນໂຄງການດັ່ງກ່າວໄດ້ມອບທຶນການສຶກສາໃຫ້ນັກຮຽນທົ່ວອາຊຽນ ຈຳນວນ 6.000 ກວ່າຄົນ.

Editor: ກຳປານາດ ລັດຖະເຮົ້າ