ເພື່ອປະຕິບັດຕາມ 3 ລັກສະນະ 5 ຫຼັກມູນການສຶກສາ, ແຜນພັດທະນາວຽກງານກິລາ – ກາຍະກຳ ແລະ ວຽກງານສິນລະປະ – ວັນນະຄະດີ ຂອງຫ້ອງການສຶກສາທິການ ແລະ ກິລາເມືອງ ແຕ່ນີ້ຮອດ ປີ 2020. ພິທີເປີດການແຂ່ງຂັນກິລາ ແລະ ສິລະປະ – ວັນນະຄະດີ ນັກຮຽນມັດທະຍົມສຶກສາ ຄັ້ງທີ 5 ທົ່ວເມືອງຫີນເຫີບ, ແຂວງວຽງຈັນ ໄດ້ໄຂຂື້ນ ທ່າມກາງບັນຍາກາດເບີກບານມ່ວນຊື່ນ ໂດຍກິດຈະກຳມີການເດີນສວນສະໜາມຂອງນ້ອງໆນັກຮຽນຈາກ 7 ໂຮງຮຽນ ແລະ ກຳມະການຕັດສິນ, ໂດຍການເປັນປະທານຂອງ ທ່ານ ຄໍາສອນ ຈັນທະລັງສີ ກໍາມະການພັກເມືອງ ຫົວໜ້າຫ້ອງການສຶກສາທິການ ແລະ ກິລາເມືອງຫີນເຫີບ, ໃຫ້ກຽດເຂົ້າຮ່ວມໂດຍ ທ່ານ ຄໍາຫຼ້າ ບຸນຍະສິນ ຄະນະປະຈໍາພັກເມືອງ ຮອງເລຂາພັກເມືອງ ປະທານກວດກາພັກລັດເມືອງຫີນເຫີບ, ມີຮອງຫົວໜ້າຫ້ອງການກິລາເມືອງ, ແຂກຖືກເຊີນ, ຄູອາຈານ ແລະ ນ້ອງໆນັກຮຽນທົ່ວເມືອງຫີນເຫີບເຂົ້າຮ່ວມ.
ທ່ານ ຄຳສອນ ຈັນທະລັງສີ ຫົວໜ້າຫ້ອງການສຶກສາທິການ ແລະ ກິລາ ເມືອງຫີນເຫີບ ໄດ້ຂື້ນກ່າວລາຍງານການກະກຽມການຈັດການແຂ່ງຂັນໃນຄັ້ງນີ້ວ່າ : ການແຂ່ງຂັນກິລາ ແລະ ສິນລະປະ – ວັນນະຄະດີ ນັກຮຽນມັດທະຍົມສຶກສາທົ່ວເມືອງຫີນເຫີບໃນຄັ້ງນີ້ ເພື່ອເປັນສ້າງຂະບວນການຂໍ່ານັບຮັບຕ້ອນວັນສຳຄັນຕ່າງໆຂອງຊາດ ໃຫ້ມີຂະບວນຟົດຟື້ນມ່ວນຊື່ນ, ທັງເປັນການຄັດເລືອກນັກກິລາ ແລະ ນັກສິນລະປະຜູ້ມີພອນສະຫວັນດີເດັ່ນ ເປັນຕົວແທນໃຫ້ແກ່ເມືອງເຂົ້າຮ່ວມການແຂ່ງຂັນລະດັບແຂວງ ແລະ ພ້ອມທັງເປັນການຮັດແໜ້ນຄວາມສາມັກຄີ ແລກປ່ຽນບົດຮຽນເຊິ່ງກັນ ແລະ ກັນພາຍໃນເມືອງ. ການແຂ່ງຂັນກິລາ ແລະ ສິນລະປະ – ວັນນະຄະດີ ນັກຮຽນມັດທະຍົມສຶກສາທົ່ວເມືອງຫີນເຫີບ ໃນຄັ້ງນີ້ມີທັງໝົດ 7 ໂຮງຮຽນທົ່ວເມືອງເຂົ້າຮ່ວມ ຄື: ມສ ຫີນເຫີບ, ມສ ຄອນແກ້ວ, ມສ ນາຊໍາ, ມຕ ວຽງຄຳ, ມຕ ປ່ອງຊ່ອງ, ມຕ ວັງຄີ, ມຕ ສົມສະນຸກ ແລະ ມຕ ຜາບ່ອງ. ເຊິ່ງການແຂ່ງຂັນກິລາມີທັງໝົດ 5 ປະເພດ ຄື: ກິລາບານເຕະຊາຍ, ບານສົ່ງຍິງ-ຊາຍ, ກະຕໍ້ຊາຍ, ເປຕັງຍິງ-ຊາຍ ແລະ ກິລາແລ່ນ ໂດຍການແຂ່ງຂັນແຕ່ລະປະເພດແບ່ງເປັນ 2 ລຸ້ນ ຄື ມຕົ້ນ ແລະ ມປາຍ ສຳລັບຂອງຂວັນລາງວັນໃນຄັ້ງນີ້ – ກິລາບານເຕະ ຊະນະເລີດຈະໄດ້ຮັບຂັນລາງວັນ 1 ໜ່ວຍ ແລະ ເງິນລາງວັນ 600,000 ກີບ, ຮອງຊະນະເລີດ 500,000 ກີບ, ແລະ ອັນດັບ3 400,000 ກີບ.
ບານສົ່ງ ຊະນະເລີດຈະໄດ້ຮັບຂັນ 1 ໜ່ວຍ ແລະ ເງິນ 300,000 ກີບ, ຮອງຊະນະເລີດ 400,000 ກີບ ແລະ ອັນດັບ3 300,000 ກີບ – ກະຕໍ້ ຊະນະເລີດ ໄດ້ຮັບຂັນ ແລະ ເງິນລາງວັນ 400,000 ກີບ, ຮອງຊະນະເລີດ 300,000 ກີບ, ອັນດັບ3 200,000 ກີບ. ເປຕັງ ຊະນະເລີດໄດ້ຮັບຂັນ ແລະ ເງິນລາງວັນ 400,000 ກີບ, ຮອງຊະນະເລີດ 300,000 ກີບ, ອັນດັບ3 200,000 ກີບ ກິລາແລ່ນ ຊະນະເລີດໄດ້ຮັບເງິນລາງວັນ 300,000 ກີບ, ຮອງຊະນະເລີດ 200,000 ກີບ ແລະ ອັນດັບ3 100,000 ກີບ.
ສຳລັບການປະກວດການແຂ່ງຂັນສິນລະປະ – ວັນນະຄະດີ ມີ 2 ປະເພດຄື : ບົດເພງ ແລະ ບົດຟ້ອນ ບົດຟ້ອນ ຊະນະເລີດຈະໄດ້ຮັບເງິນລາງວັນ 500,000 ກີບ, ຮອງຊະນະເລີດ 400,000 ກີບ, ອັນດັບທີ3 ເງິນລາງວັນ 300,000 ກີບ ; ບົດເພງ ຊະນະເລີດ 300,000 ກີບ, ຮອງຊະນະເລີດ 200,000 ແລະ ອັນດັບ3 ແມ່ນ 100,000 ກີບ; ກິດຈະກຳໃນຄັ້ງນີ້ແມ່ນຈະດຳເນີນໄປເປັນເວລາ 5 ວັນຈື່ງຈະອັດລົງ.
Editor: ກຳປານາດ ລັດຖະເຮົ້າ
