ໃນວັນທີ 13 ກຸມພາ 2018 ຢູ່ທີຫ້ອງປະຊຸມຫ້ອງວ່າການປົກຄອງເມືອງວຽງທອງ ແຂວງບໍລິຄຳໄຊ. ໄດ້ຈັດພິທີປະກາດຈົບຊັ້ນມັດທະຍົມຕອນຕົ້ນບຳລຸງທົ່ວເມືອງ ໂດຍການເຂົ້າຮ່ວມຂອງ ທ່ານ ບຸນມາ ບຸຈະເລີນ ຮອງເລຂາພັກແຂວງ, ຮອງເຈົ້າແຂວງບໍລິຄຳໄຊ, ທ່ານ ຄຳພວງ ບຸນມີໄຊ ຫົວໜ້າຫ້ອງການ, ຄະນະພັກກະຊວງສຶກສາທິການ-ກິລາ, ທ່ານ ວົງສີ ທອງສີ ອິນທິປັນຍາ ເລຂາພັກເມືອງ, ເຈົ້າເມືອງວຽງທອງ, ມີຫົວໜ້າພະແນກສຶກສາທິການ-ກິລາແຂວງ, ຫົວໜ້າຄະນະສຶກສາທິການ-ກິລາເມືອງ, ຄູ ອາຈານ, ແຂກຖືກເຊີນ ແລະ ນາຍບ້ານ 41 ບ້ານເຂົ້າຮ່ວມ.
ໃນພິທີ ທ່ານ ລີ ເບຼຍໄຊຊົ່ງ ໄດ້ຜ່ານບົດສະຫຼຸບການຈັດຕັ້ງບໍາລຸງຊັ້ນມັດທະຍົມສຶກສາຕອນຕົ້ນສຳລັບປະຊາຊົນ ແລະ ທິດທາງແຜນການໃນຊຸມປີຕໍ່ໜ້າ, ຊຶ່ງໃນທົ່ວເມືອງມີໂຮງຮຽນອະນຸບານ 4 ແຫ່ງ, ເອກະຊົນ 1 ແຫ່ງ, ມີນັກຮຽນທັງໝົດ 343 ຄົນ, ຍີງ 140 ຄົນ, ມີນັກຮຽນຫ້ອງກຽມທັງໝົດ 471 ຄົນ, ຍີງ 215 ຄົນ, ມີໂຮງຮຽນປະຖົມ ທັງໝົດ 45 ແຫ່ງ, ມີນັກຮຽນທັງໝົດ 5.258 ຄົນ, ຍີງ 2.513 ຄົນ, ມີໂຮງຮຽນມັດທະຍົມຕົ້ນ 6 ແຫ່ງ, ມີ ມສ ສົມບູນ 2 ແຫ່ງ ມີນັກຮຽນທັງໝົດ 3.919 ຄົນ, ຍີງ 1.660 ຄົນ. ຜ່ານໄລຍະເວລາ 3 ປີ ທີ່ໄດ້ເອົາໃຈໃສ່ສູ້ຊົນບໍາລູງຍົກລະດັບການສືກສາຊັນມັດທະຍົມຕອນຕົ້ນ ໃຫ້ແກ່ປະຊາຊົນໃນເກນອາຍຸ 15-35 ປີ ຊື່ງມີກຸ່ມເປົ້າໝາຍຜູ້ຮຽນທັງໝົດ 1.183 ຄົນ, ຍີງ 593 ຄົນ ແລະ ໄດ້ຈັດຕັ້ງການຮຽນ-ການສອນເປັນ 3 ສົກຮຽນຄື: ສົກປີ 2013-2014 ໄດ້ຈັດການຮຽນ-ການສອນສໍາເລັດ 5 ບ້ານ, ມີຜູ້ເຂົ້າຮຽນທັງໝົດ 263 ຄົນ, ຍີງ 126 ຄົນ ສອບເສັງຈົບ 100%, ສົກປີ 2014-2015 ສໍາເລັດ 17 ບ້ານ, ມີຜູ້ເຂົ້າຮຽນທັງໝົດ 445 ຄົນ, ຍີງ 230 ຄົນ ສອບເສັງຈົບ 100%, ສົກປີ 2015-2016 ສໍາເລັດ 19 ບ້ານ, ມີຜູ້ເຂົ້າທັງໝົດ 475 ຄົນ, ຍີງ 237 ຄົນ ລວມທັງສາມສົກຮຽນມີຜູ້ສອບເສັງ ຈົບຊັ້ນບຳລຸງມັດທະຍົມຕົ້ນປະຊາຊົນ ທັງໝົດ 1.183 ຄົນ, ຍີງ 593 ຄົນ ຖ້າທຽບໃສ່ກຸ່ມເປົ້າໝາຍ ປະຕິບັດໄດ້ 100%.
ພິທີດັ່ງກ່າວໄດ້ມອບໃບຢັ້ງຢືນໃຫ້ເມືອງ, ບ້ານ ພ້ອມມອບໃບຍ້ອງຍໍຈາກກະຊວງສຶກສາທິການ-ກິລາ, ຂັ້ນແຂວງ, ຂັ້ນເມືອງໃຫ້ກົມກອງ ຫ້ອງການ ແລະ ບຸກຄົນທີ່ມີຜົນງານປະກອບສ່ວນເຂົ້າຮ່ວມວຽກງານຂະບວນການຮຽນ-ການສອນບຳລູງຍົກລະດັບຊັ້ນມັດທະຍົມຕອນຕົ້ນ ຕື່ມອີກ.

Editor:  ນັກຂ່າວເມືອງວຽງທອງ