ເມື່ອບໍ່ດົນມານີ້, ຢູ່ທີ່ ວັດບ້ານນາລ້ອງກວ້າງ, ເມືອງວັງວຽງ ແຂວງວຽງຈັນ. ໄດ້ມີພິທີ ປ່ອຍສັດ-ປ່ອຍປາ ແລະ ບວດປ່າ. ເພື່ອຄຶນຄວາມອຸດົມສົມບູນແກ່ທໍາມະຊາດ ແລະ ລະບົບນິເວດວິທະຍາ ເຊີ່ງໃນພິທີຄັ້ງນີ້ ໂດຍການເຂົ້າຮ່ວມຂອງ ທ່ານ ມີໄຊ ທັນຕະວົງ ຫົວໜ້າຫ້ອງການຊັບພະຍາກອນແລະ ສິ່ງແວດລ້ອມເມືອງວັງວຽງ, ມີບັນດາ ທ່ານ ທອງນິນ ຫຼວງປັນຍາ ຮອງຫົວໜ້າຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວເມືອງ, ມີ ທ່ານ ອໍາພອນ ອຸໄທທິດ ເລຂາຄະນະພັກຮາກຖານ ຫົວໜ້າກຸ່ມບ້ານນາລ້ອງກວ້າງ. ພ້ອມດ້ວຍອຳນາດການປົກຄອງບ້ານ ແລະ ພໍ່ແມ່ປະຊາຊົນເຂົ້າຮ່ວມຢ່າງພ້ອມພຽງ. 

ໃນພິທີ ທ່ານ ມະນີວົງ ຫຼວງປັນຍາ ພະນັກງານບຳນານ ແລະ ຜູ້ຊົງຄຸນວຸດທິບ້ານນາລ້ອງກວ້າງ ໄດ້ໃຫ້ກຽດຂຶ້ນລາຍງານຄວາມເປັນມາຂອງພິທີ ປ່ອຍສັດ-ປ່ອຍປາ ແລະ ບວດປ່າ ວ່າ: ບ້ານນາລ້ອງກວາງ ເປັນບ້ານທຳອິດທີ່ມາຕັ້ງຢູ່ໃນຂົງເຂດນີ້ ໂດຍແມ່ນພໍ່ເຖົ້າ ຫຼວງນໍນິນ ເປັນຜູ້ນຳພາມາສ້າງ ໃນໄລຍະປີ 1868 ມາຮອດປະຈຸບັນໄດ້ 150 ປີ. ການປ່ອຍສັດ-ປ່ອຍປາ ແລະ ບວດປ່າ ກໍ່ເພື່ອເປັນການປູກຈິດສຳນຶກໃຫ້ລູກຫຼານ ຊ່ວຍອະນຸລັກຮັກສາຄວາມສົມບຸນຊັບພະຍາກອນ ທຳມະຊາດ ແລະ ສິ່ງແວດລ້ອມໃຫ້ຢູ່ຄຽງຄູ່ກັບເຂດບ້ານນາລ້ອງກວາງ, ເຊິ່ງມີເນື້ອທີ່ປະມານ 3 ເຮັກຕາ. ຈຳນວນສັດທີ່ນຳມາປ່ອຍໃນຄັ້ງນີ້ ມີ: ປາ, ນົກ, ແລນ, ອຽນ, ເຕົ່າ ລວມທັງໝົດ : 1537 ໂຕ ແລະມີເບ້ຍໄມ້ 10 ຕົ້ນ.

ທ່ານ ມະນີວົງ ຫຼວງປັນຍາ ຍັງສະເໜີມາຍັງການຈັດຕັ້ງທຸກພາກສ່ວນພາຍໃນບ້ານນາລ້ອງກວ້າງ ຈົ່ງຊ່ວຍກັນ ປົກປັກສາ ແລະ ພັດທະນາ ເພື່ອເຮັດໃຫ້ເຂດບ້ານນາລ້ອງກ້ວາງ ກາຍເປັນແຫຼ່ງທ່ອງທ່ຽວ ຕິດພັນກັບທຳມະຊາດທີ່ຍືນຍົງຕໍ່ໄປ ພ້ອມກັບ ໃຫ້ກາຍເປັນປ່າ ແລະ ນ້ຳວັງສະຫງວນ ຂອງບ້ານໃນອານາຄົດ. ພາຍຫລັງສໍາເລັດພິທີກ່າວເປີດຄະນະປະທານ ແລະ ບັນດາແຂກທີ່ເຂົ້າຮ່ວມ ກໍ່ໄດ້ພ້ອມກັນຮ່ວມ ປ່ອຍສັດ-ປ່ອຍປາ ແລະ ບວດປ່າ ຢ່າງເປັນຂະບວນ

ແຫລ່ງຂ່າວ ຈາກທີມຂ່າວເມືອງວັງວຽງ

Editor: ກຳປານາດ ລັດຖະເຮົ້າ