ກອງປະຊຸມຜູ້ບໍລິຫານການສຶກສາສົກທົ່ວເມືອງໂພນໂຮງ ປີ 2018 ແລະ ຜ່ານທິດທາງແຜນການສົກປີ 2019 ໄດ້ຈັດຂື້ນ ໃນວັນທີ 17-18 ພຶດສະພາ 2018 ນີ້ຢູ່ທີ່ສະໂມສອນໃຫຍ່ຂອງເມືອງ ພາຍໄຕ້ການເປັນປະທານຂອງທ່ານ ນາງ ອິ່ນຄຳ ພັນດາລາ ກຳມະການພັກແຂວງ ເລຂາພັກເມືອງ ເຈົ້າເມືອງໂພນໂຮງ, ປະທານຄະນະພັດທະນາການສຶກສາຂັ້ນເມືອງ, ມີທ່ານ ອິ່ນໂຖ ວິໄລສານ ຮອງຫົວໜ້າພະແນກສຶກສາທິການ-ກິລາແຂວງວຽງຈັນ, ມີທ່ານ ວັນໄຊ ພົມມະຈັກ ກຳມະການພັກເມືອງຫົວໜ້າຫ້ອງການສຶກສາທິການ-ກິລາ ເມືອງໂພນໂຮງ ,ມີບັນດາຜູ້ອຳນວຍການໂຮງຮຽນ, ຜູ້ບໍລິຫານການສຶກສາ, ມີຄະນະພັດທະນາກາກສຶກສາຂັ້ນເມືອງ ແລະ ບ້ານເຂົ້າຮ່ວມ.
ໃນພິທີ ທ່ານ ແກ້ວອຸດົມ ພໍເພັດຜູ້ໄທ ຮອງຫົວໜ້າຫ້ອງການສຶກສາທິການ-ກິລາເມືອງໂພນໂຮງ ໄດ້ຂື້ນຜ່ານການຈັດຕັ້ງປະຕິບັດແຜນພັດທະນາການສຶກສາ ປີ 2017-2018 ແລະ ຜ່ານ ທິດທາງແຜນການປີ 2018 -2019 ໃຫ້ຮູ້ວ່າ: ໄລຍະ 1 ປີຜ່ານມາ ຫ້ອງການສຶກສາທິການ- ກິລາ ເມືອງໂພນໂຮງ ກໍ່ຄືຄະນະພັດທະນາການສຶກສາທຸກຂັ້ນໄດ້ເອົາໃຈໃສ່ປະຕິບັດແຜນພັດທະນາ ການສຶກສາທີ່ວາງອອກຢ່າງຕັ້ງໜ້າເຮັດໃຫ້ ວຽກງານການສຶກສາ ຢູ່ ພາຍໃນເມືອງໂພນໂຮງ ມີທ່າກ້າວຂະຫຍາຍຕົວ ທາງດ້ານປະລິມານ ແລະ ຄຸນນະພາບດີຂື້ນສະແດງອອກ ອັດຕາເຂົ້າຮຽນຂອງເດັກ 5 ປີ ເພີ່ມຈາກ 44,9 %ເປັນ 83,1%, ອັດຕາຈົບຊັ້ນປະຖົມບັນລຸໄດ້ 99,3%,ອັດຕາຈົບຊັ້ນມັດທະຍົມຕອນຕົ້ນບັນລຸໄດ້ 98,7%, ອັດຕາຈົບຊັ້ນມັດທະຍົມປາຍ ບັນລຸໄດ້ 97,1%, ຄຽງຄູ່ກັນນີ້ຍັງໄດ້ຊຸກຍູ້ຕິດຕາມ ສືບຕໍ່ການຮຽນ-ການສອນບຳລຸງ ຍົກລະດັບການສຶກສາຊັ້ນມັດທະຍົມຕົ້ນໃນກຸ່ມເປົ້າໝາຍອາຍຸ 15 ປີ-25 ປີ ທີ່ຈົບປະຖົມ ແລະ ປະກາດເມືອງໂພນໂຮງເປັນເມືອງຈົບຊັ້ນມັດທະຍົມຕົ້ນບຳລຸງສຳເລັດ. ສິງພົ່ນເດັ່ນ ການສຶກສາຢູ່ເມືອງໂພນໂຮງ ຕາໜ່າງການສຶກສາທຸກຂັ້ນ ໄດ້ຮັບການປັບປຸງພັດທະນາດີຂື້ນທັງພື້ນຖານໂຄງລ່າງ ແລະ ຄຸນນະພາບການຮຽນ-ການສອນ ຈົນສາມາດສ້າງໄດ້ນັກຮຽນເກັ່ງຊັ້ນຕ່າງໆເປັນຕົວແທນຂອງເມືອງ,ແຂວງ ເຂົ້າຮ່ວມສອບເສັງນັກຮຽນເກັ່ງລະດັບແຂວງ ແລະ ລະດັບປະເທດ.
ຜູ້ແທນກອງປະຊຸມກໍ່ໄດ້ປະກອບຄຳຄິດຄຳເຫັນ ແລະ ແລກປ່ຽນບົດຮຽນການບໍລິຫານວຽກງານສຶກສາແຕ່ລະໂຮງຮຽນ ຍົກໃຫ້ເຫັນຂໍ້ສະດວກ ແລະ ຂໍ້ຫຍຸ້ງຍາກ ເພື່ອເຮັດໃຫ້ການບໍລິຫານການສຶກສາຢູ່ເມືອງໂພນໂຮງ ໄດ້ຮັບການປັບປຸງພັດທະນາດີຂື້ນ ດີຂື້ນໃນຕໍ່ໜ້າ.
ຕອນທ້າຍພິທີ ທ່ານ ເຈົ້າເມືອງໆໂພນໂຮງກໍ່ ໄດ້ເນັ້ນໜັກໃຫ້ຄະນະບໍລິຫານການສຶກສາທຸກຂັ້ນຈົ່ງເປັນເຈົ້າການໃນການຄຸ້ມຄອງບໍລິຫານວຽກງານການສຶກສາພາຍໃນເມືອງ ໃຫ້ມີປະສິດທິພາບ ແລະ ບັນລຸຕາມແຜນການທີ່ວາງອອກ ,ເອົາໃຈໃສ່ຍົກສູງຄຸນນະພາບການສຶກສາ, ແກ້ໄຂປະກົດການຫຍໍ້ທໍ້ຕ່າງໆເກີດຂື້ນຢູ່ນຳໂຮງຮຽນ ແລະ ປະກົດການຫຍໍ້ທໍ່ອື່ນໆໃຫ້ໝົດໄປ ເຮັດໃຫ້ວຽກງານການສຶກສາຢູ່ເມືອງໂພນໂຮງ ແຂວງວຽງຈັນ ໃຫ້ມີການຂະຫຍາຍຕົວມີ ຄຸນນະພາບນັບມື້ດີຂື້ນ.
Editor: ຕະວັນ ແສງສະຫວັນ
