ພິທີເປີດການສອບເສັງຈົບຊັ້ນປະຖົມສຶກສາຊັ້ນ ປ.5 ທົ່ວເມືອງໂພນທອງ ແຂວງຫລວງພະບາງ ໄດ້ເລີ່ມຂຶ້ນຢ່າງເປັນການ,ໃນຕອນເຊົ້າຂອງວັນທີ 22 ພຶດສະພາ 2018 ຜ່ານມາ ຢູ່ທີ່ໂຮງຮຽນປະຖົມສົມບູນ ວັງຊຽງ 1 , ເຊີ່ງໄດ້ເປີດພິທີ ການສອບເສັງຈົບຊັ້ນປະຖົມສຶກສາຊັ້ນ ປ. 5 ຂຶ້ນຢ່າງເປັນທາງການ ໂດຍກໍານົດເອົາໂຮງຮຽນປະຖົມສົມບູນ ວັງຊຽງ 1 ເປັນສະຖານທີ່ເປີດການສອບເສັງທົ່ວເມືອງ, ພາຍໃຕ້ການເປັນປະທານ ຂອງ ທ່ານ ອຳຄາ ແກ້ວອຳພອນ ຮອງຫົວໜ້າຫ້ອງການສຶກສາທິການ ແລະ ກິລາ ເມືອງໂພນທອງ , ເປັນກຽດເຂົ້າຮ່ວມ ຂອງ ທ່ານ ສົມມາລີ ຄໍາເກັ່ງ ເຈົ້າເມືອງ-ເມືອງໂພນທອງ, ມີ ທ່ານ ຊາຍສະຫວັນ ຈັນມານິດ ຮອງຫົວໜ້າພະແນກສຶກສາທິການແລະ ກິລາແຂວງຫຼວງພະບາງ, ມີບັນດາ ຄູອາຈານ ອົງການປົກຄອງ ບ້ານສະມາຄົມພໍ່ແມ່ນັກຮຽນ ຕະຫຼອດຮອດ ນ້ອງນັກຮຽນ ໝວດປະຖົມວັງຊຽງ1 , ໝວດປະຖົມວັງຊຽງ 2 ແລະ ໝວດປະຖົມ ປຸ່ງບໍ່ ເຂົ້າຮ່ວມຢ່າງພ້ອມພຽງ.

ທ່ານ ບຸນໜຽວ ແກ້ວວຽງຄໍາ ຫົວໜ້າໝ່ວຍງານຈັດຕັ້ງພະນັກງານ ຫ້ອງການສຶກສາທິການແລະ ກິລາ ເມືອງໂພນທອງ ກໍ່ໄດ້ຂຶ້ນຜ່ານຂໍຕົກລົງຂອງທ່ານເຈົ້າເມືອງໆໂພນທອງ ແລະ ຂໍຕົກລົງຂອງພະແນກສຶກສາທິການແລະກິລາແຂວງຫຼວງພະບາງ ວ່າດ້ວຍການອານຸມັດແຕ່ງຕັ້ງຄະນະຮັບຜິດຊອບການເຝົ້າກວດກາຫ້ອງສອບເສັງ ຈົບຊັ້ນ ປະຖົມສຶກສາ ຊັ້ນ ປ.5 , ແລະ ກົດລະບຽບການສອບເສັງ ໃຫ້ຖືກຕ້ອງສຸຈະລິດໃນການສອບເສັງ, ວິຊາໃນການສອບເສັງ ປະກອບ ວິຊາພາສາລາວ, ວິຊາຄະນິດສາດ ແລະ ວິຊາໂລກອ້ອມຕົວ . ຈາກນັ້ນກໍ່ໄດ້ຮັບຟັງການໂອລົມຂອງ ທ່ານ ສົມມາລີ ຄໍາເກັ່ງ ເຈົ້າເມືອງ-ເມືອງໂພນທອງ ກ່ອນອື່ນ ທ່ານ ກໍ່ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ພົ້ນເດັ່ນຂອງວຽກງານສືກສາທິການແລະກິລາຢ່າງສຸດໃຈ, ທ່ານຍັງໄດ້ເໜັ້ນໜັກ ໃຫ້ບັນດາ ຄະນະຮັບຜິດຊອບການເຝົ້າຫ້ອງສອບເສັງທັງ 14ໝວດ 5 ກຸ່ມ ພາຍໃນທົ່ວເມືອງ ໃຫ້ມີການເຂັມງວດສອດຄ້ອງຕາມຫຼັກການນະໂຍບາຍຂອງພັກລັດວາງອອກ, ການວາງແຜນງານປະຕິບັດການສອບເສັງໃຫ້ໄດ້ຮັບຜົນດີ, ມີຄຸນນະພາບ ແລະ ຍັງໄດ້ ພ້ອມເປີດຊ່ອງຫົວຂໍບົດສອບເສັງຊັ້ນ ປ.5 ສົກປີ 2017-2018 ຢ່າງເປັນທາງການ.

Editor: ກຳປານາດ ລັດຖະເຮົ້າ