ໃນຕອນເຊົ້າຂອງວັນທີ 17 ພຶດສະພາ 2018 ຜ່ານມາ ເມືອງໝື່ນໄດ້ຈັດກອງປະຊຸມປິດຊຸດອົບຮົມວິທີປູກເຫັດນາງລົມ ຂື້ນຢ່າງເປັນທາງການ ຢູ່ທີສະໂມສອນຫ້ອງວ່າການປົກຄອງເມືອງໝື່ນ ແຂວງວຽງຈັນ ໃຫ້ກຽດເຂົ້າຮ່ວມໂດຍ ທ່ານ ພອນເທີດ ສຸຫວັດດີ ຄະນະປະຈຳພັກເມືອງ ຮອງເຈົ້າເມືອງ-ເມືອງໝື່ນ, ມີ ທ່ານ ຍົມສອນ ຄຳມາສີ ຫົວໜ້າພະແນກແຮງງານ ສະຫວັດດີການ ແລະ ສັງຄົມ ແຂວງວຽງຈັນ ພ້ອມທັງນັກຝຶກອົບຮົມເຂົ້າຮ່ວມຢ່າງພ້ອມພຽງ.
ໃນພິທີ ທ່ານ ນາງຄໍາແວວ ໂພທິສານ ກໍມະການພັກເມືອງ ຫົວຫນ້າຫ້ອງການແຮງງານ ສະຫວັດດີການ ແລະ ສັງຄົມ ເມືອງຫມື່ນ ໄດ້ຂື້ນຜ່ານບົດລາຍງານໃນການຈັດຕັ້ງປະຕິບັດແຜນຝຶກອົບຮົມວິຊາຊີບ ຊຶ່ງທ່ານໃດ້ຍົກໃຫ້ເຫັນຄວາມໝາຍຄວາມສຳຄັນຂອງຜູ້ທີ່ວ່າງງານ ແມ່ນເພື່ອຊອກຫາອາຊີບໃຫ້ແກ່ປະຊາຊົນຜູ້ທີວ່າງງານໃຫ້ມີວຽກເຮັດງານທຳ, ມີອາຊີບເສີ່ມ, ສ້າງລາຍຮັບໃຫ້ແກ່ຄອບຄົວ ເພື່ອຕອບສະໜອງຄວາມຕ້ອງການຂອງຕະຫຼາດແຮງງານ,ສົ່ງເສີ່ມປະຊາຊົນຜູ້ທີ່ທຸກຍາກ, ຊາວໜຸ່ມຜູ້ທີ່ດ້ອຍໂອກາດໃນເຂດຫ່າງໃກຊອກລີກ ເພື່ອຕ້ານປະກົດການຫຍໍ້ທໍ້ຕ່າງໆ ໂດຍສະເພາະແມ່ນການໄປອອກແຮງງານຢູ່ຕ່າງປະເທດແບບຜິດກົດໝາຍ, ຊຸດການຝຶກອົບຮົມໄດ້ຮຽນທິດສະດີ ແລ້ວກໍ່ລົງປະຕິບັດຕົວຈິງ ມີນັກຝຶກອົບຮົມມາຈາກ 7 ບ້ານເປົ້າໝາຍສາມສ້າງ ນອກນັ້ນກໍ່ມີ ລູກເມຍພະນັກງານ, ຜູ້ທີ່ມີຄວາມສະມັກໃຈ ແລະ ພະນັກງານຈຳນວນໜື່ງເຂົ້າຮ່ວຝຶກອັບຮົມ.
ໃນຕອນທ້າຍພິທີ ທ່ານ ຍົມສອນ ຄຳມາສີ ຫົວໜ້າພະແນກແຮງງານ ສະຫວັດດີການ ແລະ ສັງຄົມ ແຂວງວຽງຈັນ ໄດ້ຂື້ນໂອ້ລົມເໜັ້ນໜັກໃຫ້ພໍ່ແມ່ປະຊາຊົນຜູ້ທີ່ໃດ້ຝຶກອົບຮົມຄັ້ງນີ້ ຈົ່ງນຳເອົາບົດຮຽນຄັ້ງນີ້ ໄປນຳໃຊ້ປະຕິບັດຕົວຈິງໃຫ້ເກີດດອກອອກຜົນ, ໃຫ້ທຸກຄົນສ້າງລາຍຮັບເຂົ້າສູ່ຄອບຄົວ ໃຫ້ຫຼຸດຜົນອອກຈາກຄວາມທຸກຍາກ ແລ້ວທ່ານກໍ່ໃດ້ໃຫ້ກຽດກ້າວມອບໃບຢັ້ງຢືນໃຫ້ແກ່ຜູ້ທີ່ສຳເລັດການຝືກອົບຮົມຄັ້ງນີ້ ຈຳນວນ 53 ໃບ.

Editor:  ນັກຂ່າວເມືອງຫມື່ນ