ເພື່ອເປັນການຢັ້ງລະດັບຄວາມຮູ້ ແລະ ຄວາມສາມາດຂອງນັກຮຽນປະຖົມ ປ5 ປີສຸດທ້າຍ ເພື່ອໃຫ້ໄດ້ໃບປະກາດສະນີຍາບັດ ໄວ້ເປັນຫລັກຖານໃນຊັ້ນລະດັບການຮຽນຕໍ່ໄປໃນທົ່ວເມືອງທຸລະຄົມ.
ຕອນເຊົ້າວັນທີ 23 ພຶດສະພາ 2018 ທ່ານ ນາງ ວົງເດືອນ ວັດຕະໂສ ຮອງເລຂາພັກເມືອງ ຮອງເຈົ້າເມືອງໆ ທຸລະຄົມ ສົມທົບຫ້ອງການສຶກສາການ-ກິລາເມືອງ ລົງກວດກາຄວາມເອົາໃຈໃສ່ໃນການສອບເສັງຈົບຊັ້ນປະຖົມ ປ5 ໃນທົ່ວເມືອງທຸລະຄົມແຂວງວຽງຈັນ ເພື່ອເປັນການວັດປະເມີນຜົນການສອບເສັງຂອງນັກຮຽນ ແລະ ການສອນຂອງຄູອາຈານໃນໄລຍະຜ່ານມາ, ພ້ອມທັງ ເປັນການຊຸກຍູ້ທີ່ຄຽງຄູ່ກັບການພັດທະນາການສຶກສາ ເວົ້່າລວມເວົ້າສະເພາະ ກໍ່ຄືການພັດທະນາກາສຶກສາຢູ່ເມືອງທຸລະຄົມ.
ເຊິ່ງໄດ້ກຳນົດເວລາ 3 ວັນ 21-23 ພຶດສະພາ 2018 ແລະ ໃນທົ່ວເມືອງແມ່ນໄດ້ແບ່ງອອກເປັນ 8 ສູນສອບເສັງຄື: ສູນສອບເສັງໂຮງຮຽນໄຊປັນຍາ, ໂຮງຮຽນບ້ານນາລ້າ, ໂຮງຮຽນບ້ານນາຫວ້າ, ໂຮງຮຽນບ້ານຕານປ່ຽວ, ໂຮງຮຽນບ້ານຫາດໄຊ, ໂຮງຮຽນບ້ານຫາດສ້ຽວ, ໂຮງຮຽນປະຖົມບ້ານວັງເຮືອ ແລະ ໂຮງຮຽນປະຖົມພູເກົ້ານາງ, ລວມມີນັກສອບເສັງທັງໝົດ 1087 ຄົນ, ຍິງ 538 ຄົນ, ມີ 50 ຫ້ອງສອບ, ມີ 5 ວິຊາໃນການສອບ ຄື: ວິຊາ ຄະນິດສາດ, ວິຊາໂລກອ້ອມຕົວ, ຫັດແຕ່ງ, ຂຽນທວາຍ ແລະ ພາສາອັງກິດ
ສຳລັບ ການຈັດຕັ້ງກາບສອບເສັງຈົບຊັ້ນປະຖົມ ປ5 ໃນທົ່ວເມືອງ ປະຈຳສົກຮຽນ 2017-2018 ແມ່ນຜ່ານມະຕິຄຳສັງແນະນຳຂອງຫົວໜ້າພະແນກສຶກສາທິການ ແລະ ກິລາແຂວງວຽງຈັນ ສະບັບເລກທີ 46/ສກຂວຈ,ລົງວັນທີ 27 ທັນວາ 2017.

Editor: ຕະວັນ ແສງສະຫວັນ