ໃນຕອນເຊົ້າມື້ນີ້ວັນທີ 25 ພຶດສະພາ 2018 ທີ່ເດີນກີລາໃນຮົ່ມ ວິທະຍາໄລ ເຕັກນິກ-ວິຊາຊີບ ມິດຕະພາບ ວຽງຈັນ-ຮ່າໂນ້ຍ ໄດ້ຈັດໃຫ້ມີງານສັບປະດາວິທະຍາສາດ ຄັ້ງທີ 1 ຂື້ນຢ່າງເປັນທາງການ ໂດຍການເຂົ້າຮ່ວມຂອງທ່ານ ຫນູພັນ ອຸດສາ ຫົວໜ້າກົມອະຊີວະສຶກສາ, ກະຊວງສຶກສາທິການ ແລະ ກີລາ, ທ່ານ ນາງ ນິວອນ ມຸງຄຸນສະຫວັດ ຜູ້ອໍານວຍການ ວິທະຍາໄລ ເຕັກນິກ-ວິຊາຊີບ ມິດຕະພາບ ວຽງຈັນ-ຮ່າໂນ້ຍ, ມີບັນດາຕາງໜ້າກະຊວງ, ພະແນກສຶກສາທິການ ແລະ ກິລານະຄອນຫຼວງວຽງຈັນ, ສະຖາບັນ, ວິທະຍາໄລຕ່າງໆ ແລະ ບໍລິສັດຫ້າງຮ້ານເຂົ້າຮ່ວມ.
ທ່ານນາງ ນິວອນ ມຸງຄຸນສະຫວັດ ຜູ້ອໍານວຍການ ວິທະຍາໄລ ເຕັກນິກ-ວິຊາຊີບ ມິດຕະພາບ ວຽງຈັນ-ຮ່າໂນ້ຍ ກ່າວວ່າ: ຈຸດປະສົງຂອງການຈັດງານສັບປະດາວິທະຍາສາດ ຄັ້ງທີ 1 ຄັ້ງນີ້ ແມ່ນເພື່ອເຜີຍແຜ່ຂໍ້ມູນກ່ຽວກັບການຈັດຕັ້ງ ການຮຽນ-ການສອນ ຢູ່ພາຍໃນວິທະຍາໄລ ແລະ ເປັນການວັດ, ການປະເມີນຜົນຫຼັກສູດ ການຮຽນ-ການສອນ ຂອງແຕ່ລະພາກວິຊາໃຫ້ສອດຄ່ອງ, ແທດເໝາະ ແລະ ຕອບສະໜອງຕາມຄວາມຮຽກຮ້ອງຕ້ອງການຂອງຕະຫຼາດແຮງງານໃນປັດຈຸບັນ, ເປີດໂອກາດໃຫ້ພະນັກງານຄູ-ອາຈານ, ນັກສຶກສາພາກວິຊາຕ່າງໆ ໄດ້ນໍາເອົາຜົນງານທີ່ພົ້ນເດັ່ນຂອງຕົນມາວາງສະແດງໃຫ້ມະຫາຊົນຮັບຊາບ ແລະ ນຳເອົາຄວາມຮູ້, ຄວາມສາມາດ ວິຊາສະເພາະຂອງຕົນມາແລກປ່ຽນ ຖອດຖອນບົດຮຽນ ແລະ ສ້າງຄວາມສາມັກຄີ, ຊ່ວຍເຫຼືອເຊິ່ງກັນ ແລະ ກັນ ພາຍໃນວິທະຍາໄລດ້ວຍກັນ, ໃຫ້ນັກສຶກສາພາຍໃນວິທະຍາໄລ ໄດ້ມີເວທີໃນການສະແດງຄວາມຮູ້, ຄວາມສາມາດຕາມລາຍວິຊາຮຽນທີ່ໄດ້ສຶກສາຮໍ່າຮຽນ ສາມາດນໍາເອົາຄວາມຮູ້ດັ່ງກ່າວໄປຮັບໃຊ້ສັງຄົມ ແລະ ກາຍເປັນຊັບພະຍາກອນມະນຸດທີ່ມີຄຸນນະພາບ ໃນການສືບທອດພາລະກິດໃນການສ້າງສາ ພັດທະນາປະເທດຊາດ ໃນອານາຄົດ.
ທັງເປັນການສ້າງໂອກາດໃຫ້ນັກຮຽນຊັ້ນ ມັດທະຍົມຕອນຕົ້ນ ແລະ ຕອນປາຍ ໄດ້ມາພົບປະກັນ ຊອກຮູ້ຂໍ້ມູນຕ່າງໆກ່ຽວກັບພາກວິຊາຕ່າງໆ ທີ່ທາງວິທະຍາໄລໄດ້ຈັດຕັ້ງການຮຽນ-ການສອນ, ໃຫ້ອາດີດນັກສຶກສາທີ່ຮຽນຈົບຈາກແຫ່ງນີ້ ມາຮ່ວມສົນທະນາ, ແລກປ່ຽນບົດຮຽນ, ປະສົບການທີ່ປະສົບຜົນສໍາເລັດໃນການປະກອບອາຊີບ ແລະ ເປັນເຈົ້າຂອງທຸລະກິດຂອງຕົນເອງໄດ້ ແລະ ສ້າງໂອກາດໃຫ້ແກ່ອົງກອນ, ຜູ້ປະກອບການຕ່າງໆ ທັງພາກລັດ ແລະ ເອກະຊົນ ມາຮ່ວມວ່າງສະແດງຜົນງານ ແລະ ຜະລິດຕະພັນຂອງຕົນ ແລະ ສ້າງຄວາມຮ່ວມມືສາມັກຄີ ແລະ ຮ່ວມມືກັບວິທະຍາໄລ.

Editor: ດາວໄຊ ສີວິໄລ