ໃນທ້າຍອາທິດທີ່ຜ່ານມາ ຢູ່ໂຮງຮຽນປະຖົມສົມບູນ ນໍ້າຢ້າງ, ເມືອງ ວຽງທອງ, ແຂວງ ບໍລິຄໍາໄຊ ໄດ້ມີພິທີເປີດບັ້ນສອບເສັງຈົບຊັ້ນປະຖົມ ຊັ້ນ ປ 5 ທົ່ວເມືອງ ວຽງທອງ. ໂດຍເປັນກຽດເຂົ້າຮ່ວມຂອງ ທ່ານ ອາລຸນສັກ ປະທໍາມະວົງ ຄະນະປະຈໍາພັກເມືອງ, ຮອງເຈົ້າເມືອງວຽງທອງ, ມີຄະນະພັກບ້ານ, ຄະນະກໍາມະການຮັບຜິດຊອບບັ້ນສອບເສັງ,ຄູ-ອາຈານ ຕະຫຼອດຮອດ ນັກສອບເສັງ ເຂົ້າຮ່ວມ.
ໃນພິທີໄດ້ຜ່ານຂໍ້ຕົກລົງຂອງທ່ານເຈົ້າເມືອງ, ຂໍ້ຕົກລົງແຕ່ງຕັ້ງຄະນະກໍາມະການຮັບຜິດຊອບບັ້ນສອບເສັງ, ຜ່ານລະບຽບການສອບເສັງ. ການສອບເສັງຄັ້ງນີ້ຈະເລີ່ມແຕ່ວັນທີ 22 – 23 ພຶດສະພາ 2018. ທົ່ວເມືອງມີ: 11 ສູນສອບເສັງມີ 50 ຫ້ອງມີນັກຮຽນ ປໍ 5 ເຂົ້າສອບເສັງຈໍານວນ 1.050 ຄົນ ຍີງ 519 ຄົນ, ສະເລ່ຍ ລວມ 21 ຄົນຕໍ່ຫ້ອງ, ມີຄະນະກຳມະການຍາມຫ້ອງ 100 ຄົນ, ຍີງ 56 ຄົນ, ສະເພາະສູນສອບເສັງປະຖົມສົມບູນນ້ຳຢ້າງ ປະກອບມີ 7 ໂຮງຮຽນ ຄື: ໂຮງຮຽນປະຖົມສົມບູນນໍ້າຢ້າງ, ປະຖົມຜາທອງ, ປະຖົມວັງຫີນ, ປະຖົມທ່າແພ, ປະຖົມວັງມາກ, ປະຖົມຜາບໍ່ ແລະ ປະຖົມຈະເລີນຮຸ່ງເຮືອງ. ມີນັກສອບເສັງທັງໝົດ 188 ຄົນ, ຍິງ 103 ຄົນ, ປະກອບ ດ້ວຍ 8 ຫ້ອງສອບເສັງ, ກໍາມະການຍາມຫ້ອງສອບເສັງ 16 ທ່ານ, ຍິງ 15 ທ່ານ. ວິຊາທີ່ນໍາເຂົ້າສອບເສັງມີ: ວິຊາພາສາລາວ(ຫັດແຕ່ງ), ວິຊາພາສາລາວ(ຫັດຂຽນທວາຍ+ຄໍາຖາມ), ວິຊາຄະນິດສາດ ແລະ ວິຊາໂລກອ້ອມຕົວ.
ຕອນທ້າຍໄດ້ຮັບຟັງການໂອ້ລົມຈາກທ່ານ ອາລຸນສັກ ປະທໍາມະວົງ ຮອງເຈົ້າເມືອງ ໂດຍທ່ານໄດ້ເນັ້ນໃຫ້ຄະນະກໍາມະການຮັບຜິດຊອບໃຫ້ເພີ່ມທະວີຄວາມຮັບຜິດຊອບຕໍ່ການສອບເສັງ ແລະ ໃຫ້ນັກສອບເສັງ ຈົ່ງປະຕິບັດລະບຽບການສອບເສັງ ໂດຍປະຕິບັດຕາມໂມງເວລາຢ່າງເຂັມງວດ ເພື່ອເຮັດໃຫ້ການສອບເສັງໄດ້ຮັບຜົນຢ່າງມີປະສິີດຕິພາບຕາມຄາດໝາຍ.

Editor: ເມືອງວຽງທອງ