ໃນວັນທີ 30 ພຶດສະພາ 2018 ນີ້ຢູ່ທີ່ຫ້ອງປະຊຸມຫ້ອງການສຶກສາທິການ ແລະ ກິລາເມືອງ ຊະນະຄາມ ແຂວງວຽງຈັນ ໄດ້ເປີດກອງປະຊຸມ ຜູ້ບໍລິຫານການສຶກສາ ປະຈຳປີ 2017-2018 ໂດຍພາຍໃຕ້ການເປັນປະທານ ຂອງທ່ານ ສະໝານ ວິເສດຍະພົງ ເລຂາພັກເມືອງ ເຈົ້າເມືອງໆຊະນະຄາມ ຜູ້ຊີ້ນໍາວຽກງານ ວັດທະນະທໍາ-ສັງຄົມ,ມີທ່ານ ຈັບ ຊະນະເລີດ ກຳມະການພັກເມືອງ ຫົວໜ້າຫ້ອງການສຶກສາທິການ ແລະ ກິລາເມືອງ, ມີຫົວໜ້າຫ້ອງການໃນຂົງເຂດ ວັດທະນະທຳສັງຄົມ, ຫົວໜ້າ ແລະ ຄະນະອໍານວຍການ ໂຮງຮຽນປະຖົມ ແລະ ມັດທະຍົມ ຕອນຕົ້ນ ແລະ ຕອນປາຍຢູ່ພາຍໃນເມືອງກໍ່ເປັນກຽດເຂົ້າຮ່ວມຢ່າງພ້ອມພຽງ.
ກອງປະຊຸມໄດ້ຜ່ານຜົນສໍາເລັດຂອງການຈັດຕັ້ງປະຕິບັດຂອງວຽກງານການສຶກສາໃນໄລຍະ 1 ປີຜ່ານມາ ຫ້ອງການສຶກສາທິການ ແລະ ກິລາ ເມືອງຊະນະຄາມ ໄດ້ຖືເອົາວຽກງານການສົ່ງເສີມການເຂົ້າເຖິງການສືກສາ ຢ່າງສະເໝີພາບ ແລະ ເທົ່າທຽມ, ການປັບປຸງຄຸນນະພາບການສຶກສາ ແລະ ການປັບປຸງລະບົບການບໍລິຫານການຄຸ້ມຄອງ ການສຶກສາເປັນວຽກບູລິມະສິດໃນການພັດທະນາການສຶກສາ ແຕ່ການສຶກສາກ່ອນໄວຮຽນຮອດມະຫາວິທະຍາໄລ, ເຊິ່ງຜ່ານການຈັດຕັ້ງໃນໄລຍະຜ່ານມາກໍ່ເຫັນໄດ້ວ່າຢູ່ພາຍໃນເມືອງ ອັດຕາການເຂົ້າຮຽນຂອງເດັກ 5 ປີ ເພື້ມຈາກ 81,91% ເປັນ 92,5% ຕາມລໍາດັບ, ອັດຕາຄ້າງຫ້ອງ ແລະ ການປະລະຊັ້ນປະຖົມ ສຶກສາ ຫຼຸດຈາກ 1,8% ເປັນ 0,94% ຕາມລໍາດັບ, ອັດຕາລອດເຫຼືອດຮອດ ປ5 ເພື້ມຈາກ 81,99% ເປັນ 92,95%, ອັດຕາຈົບຊັ້ນປະຖົມບັນລຸໄດ້ 101,55%, ອັດຕາເຂົ້າຮຽນລວມຊັ້ນມັດທະຍົມຕອນຕົ້ນ ຫຼຸດລົງຈາກ 88,37%ເປັນ 87,16%, ສ່ວນອັດຕາລວມການເຂົ້າຮຽນຊັ້ນມັດທະຍົມຕອນປາຍ ກໍ່ໄດ້ເພີມຂື້ນຈາກ 50% ເປັນ 53,97%,ອັດຕາຈົບຊັ້ນລວມ ມັດທະຍົມຕອນຕົ້ນ ບັນລຸໄດ້ 99,51%, ອັດຕາການປະລະການຮຽນ ມັດທະຍົມຕອນຕົ້ນຫຼຸດລົງ 2,09% ແລະ ຕອນປາຍ 4,34%, ອັດຕາການຮູ້ໜັງສືໃຫ້ປະຊາຊົນ ກຸ່ມເປົ້າໝາຍ 15 ປີຂື້ນໄປບັນລຸໄດ້ 98,61%.
ຄຽງຄູ່ກັບການພັດທະນາການສຶກສາ ໃນລະບົບໂຮງຮຽນ ຫ້ອງການສຶກສາທິການ ແລະ ກິລາເມືອງ ຍັງໄດ້ຊຸກຍູ້ ແລະ ຕິດຕາມຈັດການຮຽນການສອນບໍາລຸງຊັ້ນ ມ ຕົ້ນ ໃຫ້ກຸ່ມເປົ້າໝາຍທີ່ພາດໂອກາດທາງການສຶກສາ ຢູ່ບັນດາບ້ານຕ່າງໆ ແລະ ພ້ອມທັງປະກາດເປັນເມືອງຈົບຊັ້ນ ມັດທະຍົມສຶກສາຕອນຕົ້ນບໍາລຸງ ໃນຄັ້ງວັນທີ 22 ທັນວາ 2017 ເປັນຕົ້ນມາ.

Editor: ເມືອງຊະນະຄາມ