ໃນວັນທີ 17 ມັງກອນ 2018 ຜ່ານມານີ້, ຢູ່ທີ່ຫ້ອງປະຊຸມໃຫ່ຍ ລັດວິສາຫະກິດໄຟຟ້າລາວ ໄດ້ມີພິທີເປີດການນຳໃຊ້ໂຄງການສາຍສົ່ງ ແລະ ສະຖານີ 115/22 ກິໂລວັດໂວນ (Kv) ນໍ້າທຸງ-ຫລວງນ້ຳທາ-ນາໝໍ້ ຂື້ນຢ່າງເປັນທາງການ. ໂດຍການພາຍໃຕ້ການເປັນປະທານຂອງ ທ່ານ ປະລິນຍາເອກ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່, ທ່ານ ປະລິນຍາເອກ ເພັງພາວັນ ດາວພອນຈະເລີນ ຮອງເຈົ້າແຂວງ ແຂວງຫຼວງນໍ້າທາ, ທ່ານ ອະເດລ ອາລາເມຍຣ໌ ອຸປະທູດຄູເວດ ປະຈຳ ສປປ ລາວ, ທ່ານ ບຸນອູ້ມ ສີວັນເພັງ ຜູ້ອໍານວຍການໃຫຍ່ ລັດວິສາຫະກິດໄຟຟ້າລາວ, ພ້ອມດ້ວຍບັນດາທ່ານຄະນະພັກ, ອົງການປົກຄອງທ້ອງຖິ່ນຂັ້ນແຂວງ-ຂັ້ນເມືອງ, ແຂກທີ່ມີກຽດ ທັງພາຍໃນ ແລະ ຕ່າງປະເທດກໍ່ໄດ້ເຂົ້າຮ່ວມຢ່າງພ້ອມພຽງ.

ພາຍຫລັງທີ່ໄດ້ດໍາເນີນການກໍ່ສ້າງ ຢ່າງຕັ້ງໜ້າ ແລະ ເຄັ່ງຮ້ອນມາເປັນເວລາ 30 ເດືອນ ຈຶ່ງສາມາດສຳເລັດໂຄງການ ຈຸດປະສົງຂອງໂຄງການກໍ່ເພື່ອຮອງຮັບພະລັງງານຈາກເຂື່ອນໄຟຟ້ານໍ້າທາ1 ແລະ ບັນດາເຂື່ອນໃກ້ຄຽງເພື່ອລໍາລຽງພະລັງງານຈາກເຂດພາກເໜືອເພື່ອຕອບສະໜອງພະລັງງານໄຟຟ້າໃຫ້ກັບ ແຂວງບໍ່ແກ້ວ, ແຂວງຫຼວງນໍ້າທາ ແລະ ແຂວງອຸດົມໄຊ ພ້ອມນີ້ກໍຈະໄດ້ສົ່ງອອກພະລັງງານໄຟຟ້າເພື່ອຈຳໜ່າຍໃຫ້ບັນດາປະເທດໃກ້ຄຽງ ເຊັ່ນ: ປະເທດໄທ, ປະເທດມຽນມາ ແລະ ສປ.ຈີນ ອີກດ້ວຍ.

Editor: ກຳປານາດ ລັດຖະເຮົ້າ