ໃນວັນທີ 9 ມິຖຸນາ ທີ່ຜ່ານມານີ້ ທີ່ສູນການຄ້າວຽງຈັນເຊັນເຕີ້ ໄດ້ຈັດພິທີປະກວດນາງສາວສຸຂະພາບດີ ຮອບຊິງຊະນະເລີດ ໂດຍການເຂົ້າຮ່ວມຂອງທ່ານ ບຸນຕາ ເທບພະວົງ ຮອງເລຂາຄະນະບໍລິຫານງານ ສູນກາງຊາວໜຸ່ມປະຊາຊົນ ປະຕິວັດລາວ, ທ່ານ ທາດາຊິ ນາກາອິ ກຳມະການ ຜູ້ຈັດການບໍລິສັດ ຢູນິຊາມ ປະເທດໄທ ຈໍາກັດ, ທ່ານ ສຸລິຍາ ແກ້ວພິລາວົງ ຫົວໜ້າກົມຂະບວນການຊາວໜຸ່ມ, ສູນກາງຊາວໜຸ່ມປະຊາຊົນ ປະຕິວັດລາວ, ມີສະຫະພັນແມ່ຍິງນະຄອນຫຼວງວຽງຈັນ, ຮອງເລຂາຄະນະບໍລິຫານງານຊາວໜຸ່ມນະຄອນຫຼວງວຽງຈັນ, ພະແນກຖະແຫຼງຂ່າວ ວັດທະນະທໍາ ແລະ ທ່ອງທ່ຽວນະຄອນຫຼວງວຽງຈັນ, ຜູ້ຕາງໜ້າບໍລິສັດທີ່ນໍາເຂົ້າ Sofy Lao ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ຈຸດປະສົງຂອງງານ ເພື່ອຄັດເລືອກເອົາຊາວໜຸ່ມຍິງ ທີ່ມີບຸກຄະລິກດີ ມີຄວາມສາມາດ ມາເປັນພີເຊັນເຕີ້ຂອງຜະລິດຕະພັນໂຊຟີ ຫຼື ເພື່ອພັດທະນາສັກກະຍະພາບຂອງໄວໜຸ່ມໃນ ສປປ ລາວ ດ້ວຍການຈັດກິດຈະກໍານີ້ ເພື່ອຄົ້ນຫາໄວໜຸ່ມຍິງທີ່ມີ ອາຍຸ 15-20 ປີ ມາເປັນ Brand Ambassador ເພື່ອເປີດໂອກາດ ແລະ ທັງເປັນການສົ່ງເສີມໃຫ້ຊາວໜຸ່ມຍິງຜູ້ມີບຸກຄະລິກກະພາບໂດດເດັ່ນ ກ້າສະແດງອອກ ຮູ້ຈັກໃຊ້ເວລາຫວ່າງໃຫ້ເປັນປະໂຫຍດ ເພື່ອເປັນການສ້າງວຽກເຮັດງານທໍາ ແລະ ສ້າງລາຍໄດ້ເສີມໃຫ້ບັນດາຊາວໜຸ່ມຍິງ, ເພື່ອເຜີຍແຜ່ເອກະລັກດ້ານສິລະປະ, ວັດທະນະທໍາ, ການແຕ່ງກາຍຊຸດປະຈໍາຊາດທີ່ສວຍງາມຂອງແມ່ຍິງລາວຕໍ່ສັງຄົມ. ເພື່ອເປັນການຊຸກຍູ້ ແລະ ອົບຮົມໃຫ້ແມ່ຍິງລາວບັນດາເຜົ່າໄດ້ຮັບຮູ້ວິທີການຮັກສາສຸຂະພາບຈະເລີນພັນ ພ້ອມທັງເປີດໂອກາດ ໃຫ້ຍິງໜຸ່ມໄດ້ມີເວທີສະແດງອອກເຖິງຄວາມຮູ້ຄວາມສາມາດຕ່າງໆ. ຈໍານວນຜູ້ເຂົ້າຮອບຄັດເລືອກຄັ້ງນີ້ ທັງໝົດ 30 ຄົນ, ເຊິ່ງໄດ້ຍ່າງເທິງເວທີ ເພື່ອຄະນະກໍາມະການຈະໄດ້ໃຫ້ຄະແນນ ຈາກການຍ່າງໃນຊຸດປະຈໍາຊາດ ແລະ ຊຸດນາງສາວໂຊຟີ ຍ່າງໂຊບຸກຄະລິກກະພາບ ແລະ ຄວາມສາມາດຂອງຕົນ ເພື່ອໃຫ້ຄະນະກຳມະການຕັດສິນ.
ສ່ວນການປະກວດໃນຮອບຊິງຊະນະເລີດ ເຊິ່ງໄດ້ຜ່ານການຍ່າງສະແດງຄວາມສາມາດ, ຕອບຄໍາຖາມ ແລະ ຄະນະກຳມະການໄດ້ຕັດສິນ. ເຊິ່ງລາງວັນຊະນະເລີດແມ່ນ ນາງ ບຸດສະບາ ພິດອານົງ ໄດ້ຮັບທຶນການສຶກສາ 26 ລ້ານກີບ, ພ້ອມທັງເປັນນາງສາວ Sofy Girl 2018, ຮອງຊະເລີດອັນດັບ 1 ແມ່ນ ນາງ ແຮ່ນນ້າ ໂຊເຊັ່ນບູ້ມ ໄດ້ຮັບທຶນການສຶກສາ 13 ລ້ານກີບ, ຮອງຊະນະເລີດອັນດັບ 2 ແມ່ນ ນາງ ປາຣິຍາ ຫຼວງໂຄດ ໄດ້ຮັບທຶນການສຶກສາ 7 ລ້ານ 8 ແສນກີບ ແລະ ນາງ ອັດສະລາ ພັນວັນ ຂັວນໃຈຊ່າງພາບ ໄດ້ຮັບທຶນການສຶກສາ 2 ລ້ານ 6 ແສນກີບ ພ້ອມທັງຮັບຜະລິດຕະພັນໂຊຟີຄູລິ້ງເຟດ 1 ປີນໍາອີກດ້ວຍ.

Editor: ດາວໄຊ ສີວິໄລ