"ສູນປີ່ນປົວ ແລະ ຮັກສາສຸຂະພາບຕາໄດ້ຮັບເຄື່ອງຊ່ວຍຜ່າຕັດ ຈາກມູນນິທີ ອາຍແຄ (EYE CARE) ປະເທດເນເທີແລນ" 

ໃນຕອນບ່າຍ ວັນທີ 19 ສິງຫາ 2016 ນີ້, ມູນນິທີ ອາຍແຄ(EYE CARE) ຈາກປະເທດເນເທີແລນ ໄດ້ນຳເອົາເຄື່ອງຊ່ວຍຜ່າຕັດສາຍຕາ ແລະ ເຄື່ອງຄອມພີວເຕີ ໃຊ້ງານໂຄງການຜ່າຕັດ ມາມອບໃຫ້ສູນປິ່ນປົວ ແລະ ຮັກສາສຸຂະພາບຕາ (ທົ່ງປົ່ງ) ກະຊວງສາທາລະນະສຸກ, ລວມມູນຄ່າທັງໝົດ 11 ພັນ ໂດລ້າສະຫາລັດ ຫລື ປະມານ 90 ລ້ານກວ່າກີບ, ໃນນັ້ນ ເຄື່ອງຊ່ວຍຜ່າຕັດສາຍຕາ ມູນຄ່າ 9 ພັນກວ່າໂດລ້າສະຫາລັດ ຫລື 70 ກວ່າລ້ານກີບ.

ມູນນິທີ ອາຍແຄ ຫລື ກອງທຶນ ອາຍແຄ ເປັນມູນນິທີ ທີ່ບໍ່ຫວັງຝົນກຳໄລ ເນັ້ນການຊ່ວຍເຫລືອພັດທະນາຊີວິດ ແລະ ສຸຂະພາບຂອງປະຊາຊົນ. ເຊີ່ງການຊ່ວຍເຫລືອດັ່ງກ່າວ ແມ່ນເປັນອີກຫນຶ່ງເປົ້າຫມາຍ ແລະ ຈຸດປະສົງທີ່ດີງາມ ທີ່ມູນນິທີອາຍແຄ ມອບໃຫ້ ສູນປິ່ນປົວ ແລະ ຮັກສາສຸຂະພາບຕາ ໄດ້ນຳໃຊ້ເຄື່ອງມືອຸປະກອນທີ່ມີຄວາມທັນສະໄຫມ, ສະດວກວ່ອງໄວ ແລະ ມີຄຸນນະພາບ.

ການຊ່ວຍເຫລືອ ດັ່ງກ່າວ ເປັນການຮ່ວມມື ແລະ ສາຍສຳພັນທີ່ດີງາມ ລະຫວ່າງ ມູນນິທີອາຍແຄ ກັບ ສູນປິ່ນປົວ ຮັກສາສຸຂະພາບຕາ ກະຊວງສາທາລະນະສຸກ, ກໍ່ຄືປະຊາຊົນ ທັງ ສອງປະເທດ ຕະຫລອດມາ.