ໃນວັນທີ 20 ມິຖຸນາ 2018 ນີ້ ໄດ້ມີພິທີປິດບັ້ນເຝິກອົບຮົມວຽກງານສ້າງບ້ານປ້ອມໝັ້ນ-ກຸ່ມບ້ານສູ້ຮົບ ຕິດລຽນ ໃຫ້ອຳນາດການປົກຄອງບ້ານ, ອົງການຈັດຕັ້ງບ້ານ, ກອງຫຼອນ-ປກສ ກຸ່ມບ້ານຫ້ວຍຊາຍນ້ອຍ, ເມືອງຫ້ວຍຊາຍ, ແຂວງບໍ່ແກ້ວ ເລີ້ມແຕ່ວັນທີ່ 6 ມິຖຸນາ 2018 ເປັນຕົ້ນມາ ອີງຕາມ : ມະຕິຕົກລົງຂອງຄະນະປະຈຳພັກເມືອງ ສະບັບເລກທີ່ 182/ຄປພມ ລົງວັນທີ 19 ຕຸລາ 2017. ໂດຍການເປັນປະທານຂອງ ທ່ານ ຄໍາແປງ ໃຈຍະສັກ, ຄະນະປະຈໍາພັກແຂວງ ເລຂາພັກເມືອງ ເຈົ້າເມືອງເມືອງຫ້ວຍຊາຍ ໂດຍການເຂົ້າຮ່ວມຂອງ ທ່ານ ພັນເອກ ຄຳສະເຫວີຍ ສິນທະນູໄຊ ຮອງກົມການທະຫານທ້ອງຖິ່ນ.
ຕະຫຼອດໄລ່ຍະການເຝິກອົບຮົມ ໄດ້ກໍານົດເປັນເວລາ 15 ວັນ ຄະນະຮັບຜິດຊອບຂັ້ນເມືອງ-ແຂວງ, ອຳນາດການປົກຄອງບ້ານພາຍໃນກຸ່ມ ໄດ້ເອົາໃຈໃສ່ສຶກສາອົບຮົມໃຫ້ອົງການຈັດຕັ້ງຂັ້ນຕ່າງໆ, ໂດຍສະເພາະແມ່ນກອງຫຼອນ-ປກສ ແລະ ພໍ່ແມ່ປະຊາຊົນເຂົ້າໃຈເຊື່ອມຊືມຕໍ່ແນວທາງນະໂຍບາຍຂອງພັກ-ລັດ ປຸກລະດົມໃຫ້ລູກ ແລະ ຜົວ ເຂົ້າຮ່ວມອົບຮົມຕາມແຜນການຂອງຂັ້ນເທິງວາງອອກ, ເຊິ່ງມີຈຳນວນຄົນເຂົ້າຮ່ວມຝຶກອົບຮົມໃນຄັ້ງນີ້ລວມທັ້ງໝົດ 167 ສະຫາຍ ຍິງ 5 ສະຫາຍ, ບົດຮຽນທີ່ນໍາມາສິດສອນໃນຄັ້ງນີ້ມີຄື: ເນື້ອໃນການຝືກອົບຮົມ ພາກທິດສະດີ ເຊິ່ງໄດ້ຮັບຜົນ 78% ພາກການທະຫານວິຊາງົດງາມ ເຊິ່ງໄດ້ຮັບຜົນ 81%, ວິຊາຍຸດທະສິນ ວິທີຈັດຕັ້ງ ແລະ ວາງອາວຸດພື້ນຖານ ເຊິ່ງໄດ້ຮັບຜົນ 70%, ວິຊາຍຸດທະວິທີ ຮຽນ 7 ຈັງວະພື້ນຖານ ບຸກຄົນອາໃສ່ພູມີປະເທດ ເຊິ່ງໄດ້ຮັບຜົນ 74% ແລະ ຍັງມີວິຊາການທະຫານອື່ນໆຕື່ມອີກ.
ຜ່ານການຝຶກອົບຮົມຕົວຈິຶ່ງໄດ້ສັງເກດຕີລາຄາບັນດາກອງຫຼອນ-ປກສ ກຸ່ມບ້ານຫ້ວຍຊາຍນ້ອຍ ເຫັນວ່າໄດ້ເອົາໃຈໃສ່ເຝິກຝົນແບບແຜນຍຸດທະວິທີການປ້ອງກັນ ເຊີ່ງມັນໄດ້ສະແດງອອກໃຫ້ເຫັນຄວາມສາມະຄີພາຍໃນ ຫມວດຈຸ, ໄດ້ຮັບການຊີ້ນຳຈາກຄະນະພັກຂັ້ນເທິງເປັນຢ່າງດີ ຄະນະຊີ້ນຳໃຫ້ຄວາມໃກ້ຊິດຕິດແທດ, ມີພະນັກງານວິຊາການຈາກເມືອງ, ແຂວງ ລົງມາສິດສອນໂດຍກົງແຕ່ຕົ້ນຕະຫລອດປາຍ.
ໃນຕອນທ້າຍ ທ່ານ ສົມແປງ ໃຈຍະສັກ ຍັງໄດ້ໂອ້ລົມ ກ່ອນອື່ນທ່ານ ກໍ່ໄດ້ສະແດງຄວາມຍ້ອງຍໍຊົມເຊີຍທີ່ອົງການຈັດຕັ້ງຂອງບ້ານ, ກອງຫຼອນບ້ານ-ປກສ ກຸ່ມບ້ານຫ້ວຍຊາຍນ້ອຍ ໄດ້ເອົາໃຈໃສ່ເຮັດສຳເລັດໜ້າທີ່ ທີໄດ້ມອບໝາຍໃຫ້ ແລະ ທ່ານກໍ່ຍັງໄດ້ເໜັ້ນໜັກໃຫ້ບັນດານັກສຳມະນາກອນ ຈົ່ງນຳເອົາບົດຮຽນທີ່ຖອດຖອນໄດ້ໃນຄັ້ງນີ້ ໄປນຳໃຊ້ຢ່າງສຸດຄວາມສາມາດ ເພື່ອໃຫ້ບັນດາບ້ານ, ເມືອງ ມີຄວາມສະຫງົບສຸກ ແລະ ເປັນລະບຽບຮຽບຮ້ອຍ.

Editor: ປກສ ແຂວງບໍແກ້ວ