ພິທີສະເຫຼີມສະຫຼອງວັນແພດລາວ ວັນທີ 18 ມິຖຸນາ 1965 ຫາ ວັນທີ 18 ມີຖຸນາ 2018 ຄົບຮອບ 53 ປີ ທີ່ເມືອງພູຄູນ ແຂວງຫຼວງພະບາງ ໄດ້ຈັດຂຶ້ນໃນອາທິດຜ່ານມານີ້ ທີ່ສະໂມສອນໃຫ່ຍຂອງເມືອງ ໂດຍການເຂົ້າຮ່ວມຂອງທ່ານ ວຽງທອງ ຫັດສະຈັນ ເຈົ້າເມືອງພູຄູນ, ແຂວງຫລວງພະບາງ ມີຄະນະນຳຂອງເມືອງ, ຫົວໜ້າຫ້ອງການອອ້ມຂ້າງ, ພະນັກງານພາຍໃນຫ້ອງການສາທາລະນະສຸກທົ່ວເມືອງເຂົ້າຮ່ວມ.
ໃນພິທີທ່ານ ຄໍາສີ ນວນສະລອຍ ຫົວໜ້າຫ້ອງການສາທາລະນະສຸກເມືອງ ໄດ້ເລົ່າເຖິງປະຫວັດການກຳເນີດ ແລະ ການເຕີບໃຫ່ຍຂະຫຍາຍຕົວຂອງວຽກງານການແພດສາກົນ ແລະ ສປປ ລາວ ເຊິ່ງການແພດລາວກໍ່ເລີ່ມຂຶ້ນຈາກຂີດໝາຍແຫ່ງການເຕີບໃຫຍ່ຂະຫຍາຍຕົວຂອງເຫຼົ່າຮົບເສນາຮັກ ຕິດພັນກັບຂະບວນການຕໍ່ສູ້ກູ້ຊາດ ແລະ ອີງໃສ່ແນວທາງນະໂຍບາຍການປຽນແປງໃໝ່ຂອງພັກ, ສູນກາງແນວລາວຮັກຊາດ ຈຶ່ງມີມະຕິຕົກລົງສ້າງຕັ້ງພະແນກສາທາລະນະສຸກ ສູນກາງແນວລາວຮັກຊາດ ຂຶ້ນໃນວັນທີ 18 ມິຖຸນາ 1965 ແລະ ໄດ້ກຳນົດເອົາວັນດັ່ງກ່າວ ເປັນວັນແພດລາວ ເພື່ອລະນຶກເຖິງຜົນງານ ແລະ ສັນລະເສີນຄຸນງາມຄວາມດີຂອງແພດລາວ ໃນສະໄໝຕໍ່ສູ້ກູ້ຊາດ ກໍຄືສະໄໝປົກປັກຮັກສາ ແລະ ພັດທະນາປະເທດຊາດ ເພື່ອປຸກລະດົມມວນຊົນໃຫ້ເຫັນໄດ້ຄວາມສຳຄັນ, ເຂົ້າໃຈ ແລະ ເປັນເຈົ້າການໃນການກັນພະຍາດ, ສົ່ງເສີມສຸຂະພາບ ແລະ ຮັກສາສຸຂະພາບຂອງຕົນເອງ, ຄອບຄົວ ແລະ ສັງຄົມ.
ໂອກາດນີ້ ທ່ານເຈົ້າເມືອງພູຄູນ ໄດ້ຮຽກຮ້ອງມາຍັງບັນດາແພດໝໍໃນທົ່ວເມືອງ ຈົ່ງຕັ້ງໜ້າປະຕິບັດວິຊາສະເພາະ ພ້ອມທັງເອົາໃຈ ໃສ່ຝຶກຝົນຫຼໍ່ຫຼອມຕົນເອງທາງດ້ານທັດສະນະຮັບໃຊ້, ຕັດສິນໃຈສູ້ຊົນຍົກລະດັບຄວາມຮູ້ຄວາມສາມາດ ເພື່ອໃຫ້ສາມາດຕອບໂຕ້ບັນດາພະຍາດທີ່ເກີດຂຶ້ນໃໝ່ ຄຽງຄູກັບຈັນຍາທຳ-ຈັນຍາບັນຂອງແພດໝໍ ໃນການບໍລິການປິ່ນປົວຄົນເຈັບ ໂດຍເອົາໃຈໃສ່ປະຕິບັດ 5 ດີ 1 ພໍໃຈ ໃຫ້ປະກົດຜົນເປັນຈິງ ຕາມສະຖານທີ່ບໍລິການສຸຂະພາບພາຍໃນເມືອງ. ປະຈຸບັນ ເມືອງພູຄູນ ມີໂຮງໝໍຊຸມຊົນຂອງເມືອງ 1 ແຫ່ງ, ສຸກສາລາ 4 ແຫ່ງ ເພື່ອບໍລິການກວດ, ປີ່ນປົວ ໃຫ້ແກ່ພໍ່ແມ່ປະຊາຊົນ, ມີບັນດາພະນັກງານແພດ, ໝໍ, ພະຍາບານ ຄອຍບໍລິການຕະຫຼອດເວລາ ເພື່ອຮັບປະກັນທາງດ້ານສຸຂະພາບຂອງປະຊາຊົນໃຫ້ນັບມື້ດີຂຶ້ນ.

Editor: ນັກຂ່າວເມືອງພູຄູນ