ຂະແໜງກະສິກຳ ເປັນອີກຂະແໜງການທີ່ລັດຖະບານ ໄດ້ລົງທຶນໃສ່ຫຼາຍສົມຄວນ ເພື່ອຍົກປະສິດທິພາບ ແລະ ຄຸນນະພາບການຜະລິດຂອງຊາວກະສິກອນ ຢ່າງຕໍ່ເນື່ອງ, ພ້ອມນີ້, ກໍ່ສົ່ງເສີມ ແລະ ເຜີຍແຜ່ການຄົ້ນຄວ້າວິໄຈກ່ຽວກັບການປູກ-ການລ້ຽງ ເພື່ອຍົກຜະລິດຕະພາບ ແລະ ສ້າງຄວາມອາດສາມາດແຂ່ງຂັນໃຫ້ແກ່ຜະລິດຕະພັນພາຍໃນໃຫ້ຫຼາຍຂຶ້ນ. ເຊິ່ງຫຼ້າສຸດ ໃນ 6 ເດືອນຕົ້ນປີຜ່ານມາ ຂະແໜງກະສິກຳມີທ່າອ່ຽງເພີ່ມຂຶ້ນລື່ນຄາດໝາຍເລັກໜ້ອຍ ແລະ ເພື່ອເຮັດໃຫ້ການເຕີບໂຕໄດ້ຢ່າງຕໍ່ເນື່ອງນັ້ນ ລັດຖະບານ ຈະສືບຕໍ່ລົງທຶນໃສ່ຂະແໜງດັ່ງກ່າວໃຫ້ເພີ່ມຂຶ້ນ ຄຽງຄູ່ກັບລົງຕິດຕາມ ແລະ ນຳພາເຮັດຕົວຈິງຢ່າງແທດເຖິງ.
ອີງໃສ່ບົດລາຍງານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ປະຈຳ 4 ເດືອນ, ຄາດຄະເນປະຕິບັດແຜນ 6 ເດືອນຕົ້ນປີ 2018 ແລະ ທິດທາງວຽກງານຈຸດສຸມ ປະຈຳ 6 ເດືອນທ້າຍປີ ຂອງລັດຖະບານ ຕໍ່ກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ VIII ໂດຍສະເພາະແມ່ນທິດທາງຈຸດສົມໃນ 6 ເດືອນທ້າຍປີ 2018 ວ່າ: ລັດຖະບານຈະສືບຕໍ່ຈັດຕັ້ງປະຕິບັດນະໂຍບາຍ ສ້າງການເຕີບໂຕທາງເສດຖະກິດ ໂດຍອີງໃສ່ກຳລັງແຮງ ສັງລວມ ທົ່ວຂົງເຂດເສດຖະກິດ-ສັງຄົມ ເພື່ອໃຫ້ເສດຖະກິດມະຫາພາກມີສະຖຽນລະພາບ ແລະ ເຕີບໂຕ ຢ່າງຕໍ່ເນື່ອງ ການພັດທະນາໂດຍລວມ ໄປຕາມທິດສີຂຽວ ແລະ ຍືນຍົງ. ໃນນັ້ນ: ແມ່ນຈະໄດ້ສືບຕໍ່ຊຸກຍູ້ ຢ່າງແຂງແຮງ ໃຫ້ຂະແໜງການ ແລະ ທ້ອງຖິ່ນ ສູ້ຊົນ ແລະ ຮັບຜິດຊອບຫຼາຍກວ່າເກົ່າ ໃນການປະຕິບັດແຜນຜະລິດ ຕາມລະດູການ ແລະ ຕາມໄຕມາດ ເພື່ອໃຫ້ສາມາດບັນລຸຕາມຄາດໝາຍ ທີ່ວາງໄວ້ໃນປີ 2018 ໂດຍລົງຕິດຕາມ ແລະ ນຳພາເຮັດຕົວຈິງ ຢ່າງແທດເຖິງ;
ກວດຄືນ ແລະ ແກ້ໄຂຂໍ້ຄົງຄ້າງ ທີ່ກີດຂວາງຕໍ່ປະສິດທິພາບ ແລະ ປະສິດທິຜົນ ຂອງການຜະລິດໃຫ້ທັນການ; ຮີບຮ້ອນຈັດສັນຄຸ້ມຄອງການນຳໃຊ້ ແລະ ພັດທະນາທີ່ດິນກະສິກຳ; ຂະຫຍາຍການຜະລິດເປັນກຸ່ມເປັນສະຫະກອນ ຫຼື ຮູບການຮ່ວມມືຂອງປະຊາຊົນແບບອື່ນ; ຍົກປະສິດທິພາບ, ຄຸນນະພາບ ຂອງການຜະລິດ; ກວດເບິ່ງຄືນກົນໄກການຈັດຕັ້ງປະຕິບັດ ການຜະລິດກະສິກຳຕາມສັນຍາທີ່ຫຍຸ້ງຍາກ ລະຫວ່າງ ຊາວກະສິກອນ ແລະ ຜູ້ປະກອບການ; ກະກຽມແຫຼ່ງສິນເຊື່ອຈາກທະນາຄານນະໂຍບາຍ, ທະນາຄານສົ່ງເສີມກະສິກຳ ໃຫ້ຄອບຄົວຊາວກະສິກອນ ຫຼື ຜູ້ປະກອບການ ທີ່ມີຄຸນນະພາບ.
ສືບຕໍ່ຊຸກຍູ້ສົ່ງເສີມການລົງທຶນ ແລະ ການຜະລິດເປັນສິນຄ້າໃນຂະແໜງກະສິກຳ ເພື່ອໃຫ້ປະຊາຊົນ ແລະ ແຮງງານສ່ວນໃຫຍ່ ຢູ່ໃນຂະແໜງກະສິກຳ ໄດ້ມີການເຄື່ອນໄຫວ, ມີວຽກເຮັດງານທຳ ແລະ ມີລາຍຮັບເພີ່ມຫຼາຍຂຶ້ນ; ສືບຕໍ່ສົ່ງເສີມການພັດທະນາອຸດສາຫະກຳປຸ່ງແຕ່ງກະສິກຳ ໂດຍສະເພາະອຸດສາຫະກຳ ອາຫານ ທີ່ມີຄຸນນະພາບ ເພື່ອຫຼດຜ່ອນການນຳເຂົ້າ ແລະ ສົ່ງເສີມການສົ່ງອອກໃຫ້ຫຼາຍຂຶ້ນ; ພ້ອມນີ້, ກໍ່ສົ່ງເສີມ ແລະ ເຜີຍແຜ່ການຄົ້ນຄວ້າວິໄຈກ່ຽວກັບການປູກ-ການລ້ຽງ ເພື່ອຍົກຜະລິດຕະພາບ ແລະ ສ້າງຄວາມອາດສາມາດແຂ່ງຂັນໃຫ້ແກ່ຜະລິດຕະພັນພາຍໃນ.

Editor: ໜັງສືພິມເສດຖະກິດການຄ້າ