ພະແນກກວດກາ ແລະ ຄວບຄຸມຢາເສບຕິດ ປກສ ແຂວງບໍ່ແກ້ວ ສົມທົບ ກັບບໍລິສັດ ພັດທະນາພະລັງງານຊີວະສາດ ລີຮັງ ບໍ່ແກ້ວ ຈໍາກັດ ແລະ ບໍລິສັດ ຈິງເຊິນ ຢາງພາລາ ຈໍາກັດ ໄດ້ລົງເຜີຍແຜ່ໂຄສະນາຜົນຮ້າຍຂອງຢາເສບຕິດໃຫ້ປະຊາຊົນ ບ້ານນໍ້າຟ້າເໜືອ, ເມືອງຕົ້ນເຜິ້ງ ແຂວງບໍ່ແກ້ວ. ໂດຍການນໍາພາຂອງສະຫາຍ ຮ້ອຍໂທ ວິໄຊແກ້ວ ເພັດສະດາ ຮອງຫົວໜ້າພະແນກກວດກາ ແລະ ຄວບຄຸມຢາເສບຕິດ ປກສ ແຂວງບໍ່ແກ້ວ ພ້ອມດ້ວຍຄະນະ,ມີທ່ານຜູ້ອໍານວຍການບໍລິສັດ, ອຳນາດການປົກຄອງບ້ານນໍ້າຟ້າເໜືອ ພ້ອມດ້ວຍພໍ່ແມ່ປະຊາຊົນບ້ານນໍ້າຟ້າເໜືອເຂົ້າຮ່ວມ.
ເຊິ່ງເອກະສານທີ່ນໍາມາເຜີຍແຜ່ໂຄສະນາໃນຄັ້ງນີ້ ແມ່ນໄດ້ເວົ້າເຖິງຄວາມໝາຍ, ປະເພດ, ຜົນຮ້າຍ ແລະວິທີການສະກັດກັ້ນຂອງຢາເສບຕິດ. ຢາເສບຕິດແມ່ນສານກະຕຸ້ນ ຫຼື ລະງັບລະບົບປະສາດທີ່ໄດ້ມາຈາກພືດ ຫຼື ສານສັງເຄາະຈາກເຄມີ ເມື່ອເສບເຂົ້າໄປແລ້ວກໍ່ຈະສົ່ງຜົນກະທົບຢ່າງຮຸນແຮງຕໍ່ຮ່າງກາຍ, ຈິດປະສາດ ແລະ ຈະມີຄວາມຕ້ອງການເພີ່ມຂື້ນເລື້ອງໆ. ຢາເສບຕິດປະກອບມີ 2 ປະເພດຄື: ຢາເສບຕິດເກືອດຫ້າມທີ່ຜິດກົດໝາຍ ແລະ ຢາເສບຕິດ ແລະ ສານເຄມີທີ່ຖືກຄວບຄຸມນໍາໃຊ້. ນອກນັ້ນ, ຢາເສບຕິດຍັງສົ່ງຜົນຮ້າຍຕໍ່ຜູ້ເສບ ເຮັດໃຫ້ສຸຂະພາບອ່ອນເພຍ-ຮ່າງກາຍຊຸດໂຊມຈ່ອຍຜອມ, ນອນບໍ່ຫຼັບ, ສະໝອງຖືກທໍາລາຍ, ປະສາດຫຼອນ, ຫວາດລະແວງ, ຄວາມຈໍາເຊື່ອມ ກາຍເປັນຄົນບ້າເສຍຈິດ ຮ້າຍແຮງໄປກວ່ານັ້ນອາດຈະເຮັດໃຫ້ຕົນເອງ ແລະ ຄົນອ້ອມຂ້າງເສຍຊີວິດໄດ້, ຕໍ່ຄອບຄົວເກີດມີຄວາມວຸ້ນວາຍ, ທຳລາຍຊີວິດ-ຊື່ສຽງ ແລະ ຊັບສິນໃນຄອບຄົວ, ຕໍ່ສັງຄົມເກີດມີປະກົດການຫຍໍ້ທໍ້ໃນສັງຄົມ, ສັງຄົມບໍ່ມີຄວາມສະຫງົບສຸກ, ຕໍ່ປະເທດຊາດເກີດເປັນອັນຕະລາຍຕໍ່ຄວາມໝັ້ນຄົງຂອງຊາດ, ເສຍບົດບາດ. ຕໍ່ຜູ້ຜະລິດ, ຄອບຄອງ ຄ້າຂາຍ ແລະ ຂົນສົ່ງເຮັດໃຫ້ເສຍກຽດ-ເສຍອານາຄົດ, ຈະຖືກດໍາເນີນຄະດີ ແລະ ລົງໂທດຕາມລະບຽບກົດໝາຍ.
ວິທີສະກັດກັ້ນຢາເສບຕິດ ແມ່ນໄດ້ໂຄສະນາເຜີຍແຜ່ຜົນຮ້າຍຂອງຢາເສບຕິດໃຫ້ແກ່ປະຊາຊົນໄດ້ຮັບຮູ້ເຂົ້າໃຈ, ສຶກສາອົບຮົມຜູ້ເສບ-ຜູ້ຂາຍ, ຫ້າມ-ບໍ່ອະນຸຍາດໃຫ້ປູກ, ຜະລິດ-ປຸງແຕ່ງ, ຊື້-ຂາຍ, ຄອບຄອງ, ຂົນສົ່ງຢາເສບຕິດ. ການມີສວ່ນຮ່ວມຂອງຄອບຄົວ ເຊັ່ນ: ໃຫ້ຄວາມອົບອຸ່ນແກ່ສະມາຊິກໃນຄອບຄົວ, ສຶກສາອົບຮົມ-ແນະນໍາ ແລະ ໃຫ້ຄໍາປຶກສາຫາລືເຊິ່ງກັນ ແລະ ກັນ, ສັງຄົມຕ້ອງມີສ່ວນຮ່ວມໂຄສະນາເຜີຍແຜ່ຜົນຮ້າຍຂອງຢາເສບຕິດ, ສ້າງກິດຈະກໍາຕ່າງໆ ເພື່ອສົ່ງເສີມໃຫ້ຫ່າງໄກຈາກຢາເສບຕິດ, ມີການພົວພັນຮ່ວມມືກັບພາກພື້ນ ແລະ ສາກົນກ່ຽວກັບການຄວບຄຸມ, ສະກັດກັ້ນ ແລະ ຕ້ານຢາເສບຕິດດ້ວຍຫຼາຍຮູບການ.
ຈາກນັ້ນ, ກໍ່ໄດ້ມອບແຜ່ນ CD ຈໍານວນ 5 ແຜ່ນ ແລະ ໂພດສະເຕີ ຜົນຮ້າຍຂອງຢາເສບຕິດ ຈໍານວນ 15 ໃບ, ຜ້າຫົ່ມກັນໜາວ 100 ຜືນ ແລະ ມຸ້ງກັນຍຸງ 100 ຜືນໃຫ້ແກ່ປະຊາຊົນບ້ານນໍ້າຟ້າເໜືອ ອີກດ້ວຍ.

Editor: ປກສ ແຂວງບໍແກ້ວ