ກອງປະຊຸມສະຫຼຸບວຽກງານຈັດຕັ້ງ, ກໍ່ສ້າງພັກ-ພະນັກງານ ປະຈໍາປີ 2017 ຂອງເມືອງໂພນທອງ, ຫລວງພະບາງ ໄດ້ຈັດຂື້ນ ໃນວັນທີ່ 9 ກໍລະກົດ 2018 ນີ້ ທີ່ສະໂມສອນໃຫ່ຍຂອງເມືອງ ໂດຍການເປັນປະທານ ຂອງສະຫາຍ ສີແພງ ສຸອຸໄທ, ກໍາມະການພັກເມືອງ, ຫົວໜ້າຄະນະຈັດຕັ້ງເມືອງ, ມີ ສະຫາຍ ສົມມາລີ ຄໍາເກັ່ງ, ກໍາມະການພັກແຂວງ, ເລຂາຄະນະບໍລິຫານງານພັກເມືອງ, ເຈົ້າເມືອງ-ເມືອງໂພນທອງ, ມີຄະນະປະຈໍາພັກເມືອງ, ກຳມະການພັກເມືອງ, ສະມາຊິກພັກສົມບູນ ແລະ ສຳຮອງ ພ້ອມດ້ວຍພະນັກງານລັດຖະກອນທົ່ວເມືອງເຂົ້າຮ່ວມ.
ສະຫາຍ ສີແພງ ສຸອຸໄທ ກຳມະການພັກເມືອງ ຫົວໜ້າຄະນະຈັດຕັ້ງເມືອງໂພນທອງ ໄດ້ກ່າວເປີດກອງປະຊຸມວ່າ: ກອງປະຊຸມຄັ້ງນີ້ ຈະໄດ້ທົບທວນຄືນກ່ຽວກັບ ການຈັດຕັ້ງປະຕິບັດ ແນວທາງຂອງພັກ ເປັນຕົ້ນ ບັນດາມະຕິຄໍາສັ່ງ, ຂໍ້ກໍານົດຕ່າງໆ ຂອງວຽກງາານຈັດຕັ້ງໃນ 1 ປີຜ່ານມາ ທີ່ພົ້ນເດັ່ນ, ເພື່ອຊອກໃຫ້ເຫັນບັນຫາຢ່າງສັດຈະວິພາກ, ຮອບດ້ານ ແລະ ຄົບຖ້ວນ, ນັບທັງດ້ານຕັ້ງໜ້າ ແລະ ສິ່ງຫຍໍ້ທໍ້ຕ່າງໆ ລວມໄປເຖິງຄວາມຮັບຜິດຊອບ ຂອງຄະນະພັກ, ຄະນະຈັດຕັ້ງແຕ່ລະຂັ້ນ ຕະຫຼອດຮອດສະມາຊິກພັກ, ພະນັກງານ, ພ້ອມທັງຊອກໃຫ້ເຫັນ ບັນດາສາເຫດທີ່ຕັ້ງໜ້າ ແລະ ປັດໄຈໃໝ່ ເພື່ອເສີມຂະຫຍາຍອັນດີ ແລະ ແກ້ໄຂຈຸດອ່ອນທີ່ຄົງຄ້າງ ພ້ອມກັນຫາວິທາງແກ້ໄຂຢ່າງເລິກເຊິ່ງ ແລະ ທັນການ. ຄົ້ນຄ້ວາ, ປຶກສາຫາລື ແລະ ປະກອບຄວາມຄິດເຫັນ ໃຫ້ເປັນເອກະພາບ ຕໍ່ທິດທາງແຜນການທີ່ຈະໄດ້ສຸມໃສ່ປະຕິບັດ ໃນປີຕໍ່ໄປ ແລະ ຄົ້ນຄ້ວາປະກອບຄວາມຄິດເຫັນ ໃສ່ຮ່າງເອກະສານຈໍານວນໜຶ່ງ ກ່ຽວກັບວຽກງານກໍ່ສ້າງພັກ-ພະນັກງານ ແລະ ວຽກງານປັບປຸງກົງຈັກການຈັດຕັ້ງ. ຈາກນັ້ນ ສະຫາຍ ສົມມາລີ ຄໍາເກັ່ງ ໄດ້ເຜີຍແຜ່ ມະຕິຂອງກົມການເມືອງສູນກາງພັກ ວ່າດ້ວຍການສ້າງພັກໃຫ້ປອດໃສ ເຂັ້ມແຂງ ໜັກ ແໜ້ນ ແລະ ຄໍາສັ່ງຂອງຄະນະເລຂາທິການສູນກາງພັກ ວ່າດ້ວຍການກະກຽມດຳເນີນກອງປະຊຸມໃຫ່ຍ ອົງຄະນະພັກກະຊວງ ອົງການ ແຂວງ-ນະຄອນຫລວງ, ເມືອງ ແລະ ກະກຽມກອງປະຊຸມ ຂອງອົງຄະນະພັກໃນທົ່ວປະເທດ,ເວົ້າລວມ ເວົ້າສະເພາະ ກໍ່ຄື ການຫ້າງຫາກະກຽມກອງປະຊຸມໃຫ່ຍ ຄັ້ງທີ 2 ຂອງອົງຄະນະພັກເມືອງໂພນທອງ,
ໂອກາດນີ້ ສະຫາຍ ໄດ້ເນັ້ນໃຫ້ຜູ້ເຂົ້າຮ່ວມ ຈົ່ງປະກອບຄວາມຄິດເຫັນ ຕາມຄຳຖາມເຈາະຈີ້ມ ແລະ ລົງເລິກບັນຫາຕ່າງໆ ເປັນຕົ້ນແມ່ນລົງເລິກວຽກງານ ຜັນຂະຫຍາຍຜົນສຳເລັດຂອງບັ້ນດໍາເນີນຊີວິດການເມືອງ ໃນປີ 2017 ທີ່ສັງຄົມໄດ້ສ່ອງແສງ ຕໍ່ອັນລວມຂອງເມືອງ ຕ້ອງພ້ອມກັນຕັ້ງໜ້າແກ້ໄຂ ໃຫ້ມີຜົນສໍາເລັດ ແລະ ມີການຫັນປ່ຽນຢ່າງຕັ້ງໜ້າ, ເອົາໃຈໃສ່ປັບປຸງ ແລະ ຂະຫຍາຍພັກໃຫ້ສອດຄ່ອງ ເພື່ອເຮັດໃຫ້ວຽກງານກໍ່ສ້າງພັກ-ພະນັກງານມີຄຸນນະພາບ ກໍ່ສ້າງໜ່ວຍພັກແຂງຮູ້ນໍາພາຮອບດ້ານ ໃຫ້ໄດ້ຮັບຜົນສໍາເລັດ ຕາມ 4 ເນື້ອໃນ 4 ຄາດໝາຍ ໂດຍຫັນເອົາພະນັກງານລົງສູ່ຮາກຖານ ຢ່າງແທດເໝາະກັບທ້ອງຖີ່ນ. ກອງປະຊຸມ ໄດ້ດໍາເນີນເປັນເວລາ 2 ວັນຈິ່ງສໍາເລັດ.

Editor: ເມືອງໂພນທອງ