ໃນວັນທີ 6 ກໍລະກົດ 2018 ຜ່ານມາ ທີ່ຫ້ອງປະຊຸມຊັ້ນ III ຫ້ອງວ່າການປົກຄອງເມືອງ ວຽງທອງ ແຂວງ ບໍລິຄຳໄຊ ໄດ້ມີພິທີປະກາດອະນຸມັດໃຫ້ພະນັກງານ-ລັດຖະກອນອອກພັກຜ່ອນຮັບອຸດໜຸນບຳນານ ແລະ ປະກາດສັບປ່ຽນບ່ອນປະຈຳການໃໝ່ຂອງພະນັກງານ ໂດຍເປັນກຽດເຂົ້າຮ່ວມຂອງ ທ່ານ ວົງສີ ທອງສີອິດທິປັນຍາ, ກຳມະການພັກແຂວງ, ເລຂາພັກເມືອງ-ເຈົ້າເມືອງວຽງທອງ, ມີຄະນະປະຈຳພັກເມືອງ, ຫົວໜ້າຫ້ອງການ, ຮອງຫ້ອງການ, ສະມາຊິກພັກ ແລະ ພະນັກງານຫ້ອງການທີ່ກ່ຽວຂ້ອງເຂົ້າຮ່ວມ.
ໃນພິທີ ທ່ານ ທອງລິດ ສິດທິອໍາພາ ກໍາມະການພັກເມືອງ, ຫົວໜ້າຄະນະຈັດຕັ້ງເມືອງ ໄດ້ໃຫ້ກຽດຂື້ນຜ່ານ ຂໍ້ຕົກລົງ ກະຊວງຊັບພະຍາກອນທຳມະຊາດ ແລະ ສີ່ງແວດລ້ອມ ເລກທີ 1253/ກຊສ ລົງວັນທີ 27 ມີນາ 2018 ວ່າດ້ວຍການອະນຸມັດໃຫ້ພະນັກງານ-ລັດຖະກອນອອກພັກຜ່ອນຮັບອຸດໜຸນບໍານານ ເຊີ່ງໄດ້ອະນຸມັດໃຫ້ ທ່ານ ມະນີວອນ ສີພະໃຊ ຮອງຫົວໜ້າຊັບພະຍາກອນທຳມະຊາດ ແລະ ສີ່ງແວດລ້ອມ ອອກພັກການຮັບອຸດໜຸນບຳນານ, ຜ່ານຂໍ້ຕົກລົງ ເຈົ້າເມືອງ ວຽງທອງ ເລກທີ 366/ຈມວທ ວ່າດ້ວຍການແຕ່ງຕັ້ງຜູ້ວ່າການຫົວໜ້າຫ້ອງການຊັບພະຍາກອນ-ທໍາມະຊາດ ແລະ ສີ່ງແວດລ້ອມເມືອງ ເຊີ່ງໄດ້ແຕ່ງຕັ້ງ ທ່ານ ຄຳພຸດ ຈະເລີນຈິດ ຮອງຫົວໜ້າຫ້ອງການໂຍທາທິການ ແລະ ຂົນສົ່ງເມືອງ ໄປຮັບໜ້າທີໃໝ່ເປັນຜູ້ວ່າ ການຫົວໜ້າຫ້ອງການຊັບພະຍາກອນ-ທຳມະຊາດ ແລະ ສີ່ງແວດລ້ອມເມືອງ ແລະ ຜ່ານຂໍ້ຕົກລົງ ຂອງເຈົ້າເມືອງ ວຽງທອງ ເລກທີ 378/ຈມວທ ວ່າດ້ວຍແຕ່ງຕັ້ງຮອງຫົວໜ້າຫ້ອງການໂຍທາທິການ ແລະ ຂົນສົ່ງເມືອງ ເຊີ່ງໄດ້ແຕ່ງຕັ້ງທ່ານ ກອງແກ້ວ ທຳມະວົງ ຫົວໜ້າໜ່ວຍງານຄຸ້ມຄອງທາງບົກ, ທາງນ້ໍາ ແລະ ເຄຫາຜັງເມືອງ ຫ້ອງການໂຍທາທິການ ແລະ ຂົນສົ່ງເມືອງ ຂື້ນເປັນຮອງຫົວໜ້າຫ້ອງການໂຍທາທິການ ແລະ ຂົນສົ່ງເມືອງວຽງທອງ.
ຕອນທ້າຍພິທີຍັງໄດ້ຮັບຟັງການໂອ້ລົມໃຫ້ທິດເຍື່ອງທາງແກ່ຜູ້ອອກພັກການຮັບອຸດໜຸນບຳນານ ແລະ ຜູ້ທີ່ຖືກແຕ່ງຕັ້ງໃໝ່ ຕ້ອງໄດ້ສືບຕໍ່ເອົາໃຈໃສ່ຕໍ່ໜ່າທີ່ວຽກງານ ທີ່ ພັກ-ລັດ ຂັ້ນເທີ່ງມອບໝາຍໃຫ້ ກ່ອນອື່ນຕ້ອງໄດ້ສືກສາອົບຄວາມສາມັກຄີອ້າຍນ້ອງ ແລະ ວຽກທີ່ຈະໄດ້ສືບຕໍ່ໃນການປັບປຸງການເຮັດວຽກແບບແຜ່ນ ແລະ ວິທີນຳພາເປັນໝູ່ຄະນະໃຫ້ມີປະສິດທິພາບສູງໃນຕໍ່ໜ້າ.

Editor: ເມືອງວຽງທອງ