ກອງປະຊຸມພົບປະຢ້ຽມຢາມ ແລະ ແລກປ່ຽນບົດຮຽນວຽກງານປ້ອງກັນຊາດ-ປ້ອງກັນຄວາມສະຫງົບ ລະຫວ່າງ ກອງບັນຊາການ ປກສ ແຂວງ ບໍລິຄໍາໄຊ ສປປ ລາວ ແລະ ອົງການຜູ້ຕາງໜ້າກະຊວງຕໍາຫຼວດ ສ.ສ ຫວຽດນາມ ໄດ້ຈັດຂື້ນ ໃນຕອນເຊົ້າ ວັນທີ 12 ກໍລະກົດ 2018 ນີ້ ຢູ່ທີກອງບັນຊາການ ປກສ ແຂວງ ບໍລິຄໍາໄຊ, ຝ່າຍລາວ ນໍາໂດຍ ທ່ານ ພັນເອກ ທອງໃບ ລໍວັນໄຊ ເລຂາຄະນະພັກ, ຫົວໜ້າກອງບັນຊາການ ປກສ ແຂວງ ບໍລິຄໍາໄຊ, ຝ່າຍ ສ.ສ ຫວຽດນາມ ນໍາໂດຍ ທ່ານ ພົນຈັດຕະວາ ຮວ່າງ ກວາງ ເຫືອງ ຫົວໜ້າອົງການຜູ້ຕາງໜ້າ ກະຊວງຕໍາຫຼວດ ສ.ສ ຫວຽດນາມ ພ້ອມດ້ວຍຄະນະຜູ້ແທນທັງສອງຝ່າຍເຂົ້າຮ່ວມ.
ໃນທີ່ປະຊຸມທັງສອງຝ່າຍ ຕ່າງກໍ່ໄດ້ລາຍງານສະພາບທີ່ຕັ້ງຈຸດພິເສດ ແລະ ການເຄື່ອນໄຫວວຽກງານດ້ານຕ່າງໆໃຫ້ກັນຊາບ ເປັນຕົ້ນແມ່ນສະພາບການເຄື່ອນໄຫວຂອງກຸ່ມຄົນບໍ່ດີທີ່ຫວັງມ້າງເພທໍາລາຍຄວາມສະຫງົບສຸກຂອງທັງສອງປະເທດ ກໍ່ຄືສອງກໍາລັງ, ວຽກງານພົວພັນຮ່ວມມື ປ້ອງກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນສັງຄົມ ໃນໄລຍະຜ່ານມາ ທັງສອງກໍາລັງ ປກສ ໄດ້ປະສານສົມທົບກັນຮ່ວມມືແກ້ໄຂສະພາບການຕ່າງໆ ເປັນຕົ້ນແມ່ນບັນຫາການຍົກຍ້າຍຕັ້ງພູມລໍາເນົ່າທີ່ບໍ່ຖືກຂອງປະຊາຊົນ, ການລັກລອບເຂົ້າ-ອອກເມືອງຜິດກົດໝາຍ, ການແຕ່ງດອງຂອງປະຊາຊົນທັງສອງປະເທດທີ່ບໍ່ຖືກຕ້ອງ ແລະ ສະພາບປະກົດການຫຍໍ້ທໍ້ຕ່າງໆທີເກີດຂື້ນເຊັ່ນ: ການກໍ່ອາຊະຍາກໍາ, ຄ້າ-ຂາຍຢາເສບຕິດ, ຄ້າ-ຂາຍສິນຄ້າເຖື່ອນ, ການຄ້າມະນຸດ ແລະ ອື່ນໆ ເຊິ່ງສະແດງອອກໃນໄລຍະ 1 ປີຜ່ານມາ ປກສ ແຂວງ ບໍລິຄໍາໄຊ ໄດ້ສົມທົບກັບເຈົ້າໜ້າທີ່ທະຫານຊາຍແດນ ແຂວງຮ່າຕິ່ງ ສສ ຫວຽດນາມ ມ້າງລາຍຄະດີຄ້າ-ຂາຍຢາເສບຕິດລາຍໃຫຍ່ໄດ້ 2 ລາຍ, ຍຶດຂອງກາງປະເພດກັນຊາ ໄດ້ 1.028 ກິໂລກຼາມ, ປະເພດຢາບ້າ ຈໍານວນ 60 ມັດ, ເຮໂລອິນ 40 ແທ່ງ, ກັກຕົວຜູ້ກະທໍາຜິດໄດ້ 7 ຄົນ, ປະສານສົມທົບຮ່ວມກັບພາກສ່ວນທີ່ກ່ຽວຂ້ອງມອບ-ສົ່ງປະຊາຊົນເຜົ່າມົ້ງຫວຽດນາມກັບຄືນປະເທດ ມີ 1 ຄອບຄົວ ຈໍານວນ 6 ຄົນ, ຍິງ 2 ຄົນ, ທັງນີ້ກໍ່ເພື່ອແນ່ໃສ່ ເປັນການແລກປ່ຽນ,ຖອດຖອນບົດຮຽນຮ່ວມກັນ ກ່ຽວກັບວຽກງານຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຕາມຊາຍແດນ ແລະ ຄວາມສະຫງົບທາງສັງຄົມຂອງທັງສອງປະເທດ, ເພີ່ມທະວີສາຍພົວພັນຮ່ວມມືລະຫວ່າງກັນໃຫ້ແໜ້ນແຟ້ນຂື້ນກວ່າເກົ່າ, ປະສານສົມທົບໃຫ້ການຊ່ວຍເຫຼືອເຊິ່ງ ແລະ ກັນຢ່າງສະໝໍ່າສະເໝີ ບໍ່ວ່າຈະເປັນວຽກງານປ້ອງກັນຊາດ-ປ້ອງກັນຄວາມສະຫງົບ, ວຽກງານເສດຖະກິດ-ສັງຄົມ ແລະ ວັດທະນະທໍາຂອງທັງສອງປະເທດໃຫ້ພັດທະນາກ້າວຂື້ນໄປເລື້ອຍໆ.
ໃນໂອກາດດຽວກັນທັງສອງຝ່າຍກໍ່ໄດ້ມອບຂອງຂວັນໃຫ້ເຊິ່ງກັນ ແລະ ກັນ ເພື່ອເປັນທີ່ລະນຶກ ໃນໂອກາດພົບປະຢ້ຽມຢາມ ແລະ ແລກປ່ຽນວຽກງານໃນຄັ້ງນີ້ອີກດ້ວຍ.

Editor: ຄຳໄຊ