ໃນວັນທີ 10 ກໍລະກົດ 2018 ນີ້ ພະແນກສະກັດກັ້ນ ແລະ ຕ້ານຢາເສບ ປກສ ແຂວງບໍ່ແກ້ວໄດ້ຮັບແຈ້ງຂ່າວຈາກພົນລະເມືອງດີ ວ່າ: ມີການຄ້າຂາຍຢາເສບຕິດຢູ່ສວນຢາງພາລາ ເຂດບ້ານຫ້ວຍດິນຈີ່ ເມືອງຫ້ວຍຊາຍ ແຂວງບໍ່ແກ້ວ. ຈາກນັ້ນ, ຈຶ່ງໄດ້ແຕ່ງຕັ້ງເຈົ້າໜ້າທີ່ວິຊາສະເພາະ ລົງຕິດຕາມ-ກວດກາເປົ້າໝາຍ ເຫັນວ່າມີມູນຄວາມຈິງ ຈຶ່ງໄດ້ປະກອບສຳນວນສົ່ງໃຫ້ອົງການໄອຍະການ ປະຊາຊົນ ແຂວງບໍ່ແກ້ວ ເພື່ອຂໍອານຸຍາດທຳການກວດຄົ້ນ. ໂດຍສົມທົບກັບ ອໍານາດການປົກຄອງບ້ານຫ້ວຍດິນຈີ່ ແລະ ປກສ ກຸ່ມບ້ານ ເຂົ້າທຳການກວດຄົ້ນສະຖານທີ່ຕາມຄໍາສັ່ງກວດຄົ້ນເຄຫະສະຖານຂອງໄອຍະການປະຊາຊົນແຂວງ ສະບັບເລກທີ 36/ອຍກ.ບກ ລົງວັນທີ 9 ກໍລະກົດ 2018.
ຜ່ານການກວດຄົ້ນຊ່ອງໜ້າກັບເຈົ້າຂອງເຄຫະສະຖານ ແລະ ອໍານາດປົກຄອງບ້ານ ໄດ້ພົບເຫັນຢາເສບຕິດປະເພດເຮໂລອິນ ຈໍານວນ 90 ຄູ່ ເທົ່າກັບ 180 ແທ່ງ ມີນໍ້າໜັກ 69,5 ກິໂລກຼາມ ແລະ ຢາເສບຕິດປະເພດຢາບ້າ ຈໍານວນ 2.495 ມັດ ເທົ່າກັບ 4.990.000 ເມັດ ມີນໍ້າໜັກ 538,8 ກິໂລກຼາມ ຊຸກເຊື່ອງຢູ່ໃນຖັງຢາງທີ່ຝັງດິນໄວ້ຢ່າງດີ ຢູ່ໃນຄອກຈອດລົດຂອງເຈົ້າຂອງເຄຫະສະຖານ ຊື່ທ້າວ ເນັງຍົງທໍ່ ອາຍຸ 36 ປີ ຊົນເຜົ່າມົ້ງ ອາຊີບເຮັດສວນຢາງ ຢູ່ບ້ານ ພູຂຽວ ເມືອງໄຊ ແຂວງອຸດົມໄຊ ເຊິ່ງໄດ້ມາເຮັດວຽກສວນຢາງຢູ່ບ້ານຫ້ວຍດິນຈີ່ ເມືອງຫ້ວຍຊາຍ ແຂວງບໍ່ແກ້ວ.
ຜ່ານການສືບສວນ-ສອບສວນໃນເບື້ອງຕົ້ນຜູ້ກ່ຽວຮັບສາລະພາບ ວ່າ: ຢາເສບຕິດຈໍານວນດັ່ງກ່າວ ແມ່ນຂອງຜູ້ກ່ຽວແທ້ ເຊິ່ງເອົາມາຈາກຄົນສັນຊາດຈີນ ຢູ່ເຂດຊາຍແດນປະເທດມຽນມາ ແລະ ຈະເອົາໄປສົ່ງໃຫ້ຜູ້ຮ່ວມຂະບວນການຢູ່ເຂດຊາຍແດນປະເທດເພື່ອນບ້ານ. ດັ່ງນັ້ນ, ທາງເຈົ້າໜ້າທີ່ຈຶ່ງໄດ້ກັກຕົວຜູ້ກ່ຽວ ພ້ອມຂອງກາງຢາເສບຕິດ ປະເພດ ເຮໂລອິນ ຈໍານວນ 180 ແທ່ງ ແລະ ຢາບ້າ ຈໍານວນ 2.495 ມັດ ໄວ້ເພື່ອທຳການສືບສວນ-ສອບສວນ ຂະຫຍາຍຜົນຫາກຸ່ມແກ້ງຄ້າຂາຍຢາເສບຕິດລາຍນີ້ ມາດຳເນີນຄະດີຕາມລະບຽບກົດໝາຍຕໍ່ໄປ.
Editor: ປກສ ແຂວງບໍແກ້ວ
