ໃນວັນທີ່ 16 ກໍລະກົດ 2018 ຢູ່ຫ້ອງການກະສິກໍາ-ປ່າໄມ້ ເມືອງ ວຽງທອງ, ແຂວງ ບໍລິຄໍາໄຊ ໄດ້ມີພິທີເປີດຝຶກອົບຮົມວຽກງານກວດກາລາດຕາເວນໃຫ້ອາສາສະໝັກປ່າໄມ້ບ້ານເປົ້າໝາຍຂອງໂຄງການທີ່ເມືອງ ວຽງທອງ, ແຂວງ ບໍລິຄໍາໄຊ. ໂດຍເປັນກຽດເຂົ້າຮ່ວມຂອງ ທ່ານ ວົງສີ ທອງສີອິນທິປັນຍາ ກໍາມະການພັກແຂວງ, ເລຂາພັກເມືອງ, ເຈົ້າເມືອງ ວຽງທອງ, ທ່ານ ພັນລອນ ແກ້ວວິເສດ ຮອງຫົວໜ້າພະແນກກະສິກໍາ-ປ່າໄມ້ແຂວງ, ມີຫົວໜ້າຫ້ອງການກະສິກໍາ-ປ່າໄມ້ເມືອງ, ຄະນະທີມງານຂອງໂຄງການຄຸ້ມຄອງປ່າປ້ອງກັນແຫ່ງຊາດ ນໍ້າມ່ວນ-ນໍ້າຍວງ( ເຂດຍອດນໍ້າມ່ວນ ໂດຍການນໍາທີມງານຂອງ ທ່ານ ຊົມພູ ຈູມມາລາວົງ ແລະ ຜູ້ອາສາສະໝັກປ່າໄມ້ 10 ບ້ານເປົ້າໝາຍ ຄື: ບ້ານ ຈອມທອງ, ບ້ານ ເມືອງມ່ວນ, ບ້ານ ນໍ້າຕ້ອງ, ບ້ານ ນາເພີນ, ບ້ານ ສີວິໄລ, ບ້ານ ທອງມີໄຊ, ບ້ານ ໂຮມຈະເລີນ, ບ້ານ ນໍ້າກູ້, ບ້ານ ວັງພຽງ ແລະ ບ້ານ ນາຍາງ ເຂົ້າຮ່ວມ.
ການຝຶກອົບຮົມຄັ້ງນີ້ ຜູ້ເຂົ້າຝຶກຈະໄດ້ຮຽນຮູ້ກ່ຽວກັບຫຼັກການທົ່ວໄປ ໃນການຄຸ້ມຄອງປ່າສະຫງວນ ແລະ ປ່າປ້ອງກັນ, ວຽກງານພາວະການເປັນຜູ້ນໍາພາທີມຢູ່ພາກສະໜາມ, ວຽກງານການຮັກສາສິ່ງແວດລ້ອມໃນເວລາຢູ່ພາກສະໜາມ, ການນໍາໃຊ້ ຈີພີເອັສ ( GPS ), ເຂັມທິດ, ແຜນທີ່, ການບັນທຶກແບບຟອມເກັບກໍາຂໍ້ມູນ, ວຽກງານການຈັດຕັ້ງປະຕິບັດກົດໝາຍເຂົ້າໃນວຽກງານກວດກາລາດຕາເວນ, ວຽກການສືບສວນ-ສອບສວນ, ພື້ນຖານການນໍາໃຊ້ອາວຸດ ແລະ ວຽກງານການປະຖົມພະຍາບານເບື້ອງຕົ້ນ ເພື່ອເປັນບ່ອນອິງໃຫ້ແກ່ການຈັດຕັ້ງປະຕິບັັດວຽກງານລາດຕາເວນພາກຕົວຈິງໃນຕໍ່ໜ້າ ເປັນຕົ້ນ ແມ່ນການອະນຸລັກຮັກສາຄຸ້ມຄອງຊັບພະຍາກອນທໍາມະຊາດ-ສິ່ງແວດລ້ອມ ແລະ ສັດປ່າ ໃຫ້ມີຄວາມຍືນຍົງ ນັບມື້ມີຄວາມອຸດົມສົມບູນຕະຫຼອດໄປ. ວາລະການຝຶກອົບຮົມໃນຄັ້ງນີ້ແມ່ນຈະໄດ້ດໍາເປັນເວລາ 5 ວັນເລີ່ມແຕ່ວັນທີ 16-20 ຈຶ່ງຈະປິດ.

Editor: ເມືອງວຽງທອງ