ປີນີ້ ພະແນກກະສິກຳ ແລະ ປ່າໄມ້ ນະຄອນຫລວງວຽງຈັນ ຈະຊຸກຍູ້ຜູ້ປະກອບການ ກໍ່ຄື ປະຊາຊົນລ້ຽງສັດປະເພດຕ່າງໆ ໃຫ້ຫລາຍຂຶ້ນ ເພື່ອສາມາດຕອບສະໜອງທາດຊີ້ນ ຕາມຄວາມຮຽກຮ້ອງ ຕ້ອງການຂອງ ຕະຫລາດ ພາຍໃນນະຄອນຫລວງ ທັງສົ່ງອອກໄປ ຕ່າງແຂວງ, ອີກຈຳນວນໜຶ່ງສຸມໃສ່ສ້າງວຽກເຮັດງານທຳ, ສ້າງລາຍຮັບໃຫ້ປະຊາຊົນມີການພັດທະນາ ແລະ ຫລຸດພົ້ນອອກຈາກ ຄວາມທຸກຍາກເປັນກ້າວໆ. ຕາມແຜນການ ພັດທະນາວຽກງານການລ້ຽງສັດ ຂອງພະແນກກະສິກຳ ແລະ ປ່າໄມ້ ນະຄອນຫລວງວຽງຈັນ ຊີ້ໃຫ້ເຫັນວ່າ: ປີນີ້ ນະຄອນຫລວງ ຈະຊຸກຍູ້ຜູ້ປະກອບການປູກຫຍ້າ ແລະ ລ້ຽງງົວແບບ ເປັນຟາມ (ແບບອຸດສາຫະກຳ), ລ້ຽງເປັນກຸ່ມ, ລ້ຽງເປັນສະມາຄົມ ໂດຍມີການປັບປຸງ ພັນສັດ, ພັນຫຍ້າ, ປູກພືດອາຫານສັດທັງມີວິທີປ້ອງກັນ-ຮັກສາສຸຂະພາບສັດ ແລະ ຄຸ້ມຄອງການລ້ຽງສັດແບບໃໝ່ ທີ່ໃຫ້ຜົນຜະລິດສູງ ສາມາດສະ ໜອງທາດຊີ້ນໄດ້ພຽງພໍ ແລະ ມີສ່ວນແຮ່ໄວ້, ສະໜອງໃຫ້ໂຮງງານ ອຸດສາຫະກໍາປຸງແຕ່ງ ແລະ ສົ່ງອອກ ຈຳນວນໜຶ່ງໄປຕ່າງແຂວງ. ຄຽງຄູ່ກັບການ ລ້ຽງງົວແບບເປັນຟາມ ຕ້ອງໄດ້ສົ່ງເສີມຊາວກະສິກອນຂະຫຍາຍການປູກຫຍ້າ ອາຫານສັດຢ່າງກວ້າງຂວາງ ຄາດໝາຍບໍ່ໃຫ້ຫລຸດ 15.000 ເຮັກຕາ, ສົ່ງເສີມການນຳໃຊ້ສິ່ງເສດເຫລືອ ຈາກການປູກຝັງ ແລະ ອຸດສາຫະກຳປຸງແຕ່ງເປັນອາຫານສັດ. ສູ້ຊົນຂະຫຍາຍຝູງສັດໃຫ້ໄດ້ໃນລະດັບ 4-6% ຄື: ງົວ 91.200 ກວ່າໂຕ, ຄວາຍກວ່າ 14.500 ໂຕ, ແບ້ກວ່າ 21.800 ໂຕ, ໝູກວ່າ 162.700 ໂຕ, ສັດປິກ ທົ່ວໄປ ລວມປະມານ 2 ລ້ານກວ່າໂຕ, ການລ້ຽງປາ (ໜອງ 6.000 ກວ່າ ເຮັກຕາ, ລ້ຽງປາກະຊັງ, ທຳມະຊາດໃຫ້ໄດ້ກວ່າ 99.800 ເຮັກຕາ). ອັດຕາສະເລ່ຍ ການບໍລິໂພກ ທາດຊີ້ນ, ປາ, ໄຂ່ ໃຫ້ໄດ້ 65 ກິໂລ/ຄົນ/ປີ. ນອກຈາກທີ່ກ່າວມານັ້ນແລ້ວ, ຍັງຈະຊຸກຍູ້ ດ້ານການປູກພືດຜັກ ໃນເນື້ອທີ່ 3.900 ກວ່າເຮັກຕາ, ຄາດຄະເນຜະລິດ ຕະພາບສະເລ່ຍ ກວ່າ 9 ໂຕນ/ເຮັກຕາ, ຄາດຄະເນຜົນຜະລິດ 39.070 ກວ່າໂຕນ. ປູກໄມ້ກິນໝາກ ໃຫ້ໄດ້ກວ່າ 600 ເຮັກຕາ ໂດຍເລັ່ງໃສ່ 5 ຕົວເມືອງເປັນຕົ້ນຕໍ ຄື: ເມືອງໄຊທານີ, ຫາດຊາຍຟອງ, ສັງທອງແລະ ເມືອງປາກງື່ມ. ການຊຸກຍູ້ດັ່ງກ່າວ ເພື່ອເປັນການຈັດຕັ້ງປະຕິບັດ ມະຕິກອງປະຊຸມ ໃຫຍ່ຄັ້ງທີ X ຂອງພັກ ກໍ່ຄື ແຜນພັດທະນາ ເສດຖະກິດ-ສັງຄົມ ແຫ່ງຊາດ 5 ປີຄັ້ງທີ VIII ໃຫ້ບັນລຸຕາມ ລະດັບຄາດໝາຍ ທີ່ພັກ-ລັດຖະບານວາງອອກ.
Editor: ຕະວັນ ແສງສະຫວັນ
