ຜ່ານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມໃນ 6 ເດືອນຂອງສົກປີ 2015-2016 ເຫັນວ່າ ສະພາບເສດຖະກິດ-ສັງຄົມ ແຂວງຫລວງພະບາງ ແມ່ນມີທ່າແຮງກ້າວຂື້ນ ໂດຍສະເພາະບັນຍາກາດການລົງທຶນ 6 ເດືອນຕົ້ນ ສາມາດດຶງດູດການລົງທຶນຂອງລັດມີມູນຄ່າ 80 ຕືກວ່າກີບ
ອິງຕາມການລາຍງານຂອງພະແນກແຜນການ ແລະການລົງທຶນ ແຂວງຫລວງພະບາງບາງໃຫ້ຮູ້ວ່າ ສຳລັບບ້ວງການລົງທຶນຂອງລັດມີຈຳນວນ 115 ໂຄງການ ມີມູນຄ່າ 59.65 ຕື້ກີບ ໃນນັ້ນຂົງເຂດເສດຖະກິດມີຈຳນວນ 37 ໂຄງການ ລວມມູນຄ່າ 15.31 ຕື້ກີບ ຂົງເຂດວັດທະນະທຳ-ສັງຄົມ 32 ໂຄງການ ລວມມູນຄ່າ 13.25 ຕື້ກີບ ຂົງເຂດສຳນັກງານ-ຫ້ອງການ ແລະອື່ນໆ ມີ 43 ໂຄງການ ລວມມູນຄ່າ 26.08 ຕື້ກີບ ແລະໂຄງການເປົ້າຫມາຍສະເພາະມີ 3 ໂຄງການ ລວມມູນຄ່າ 5 ຕື້ກີບ
ສ່ວນການລົງທຶນຂອງລັດ ບ້ວງການພັດທະນາເມືອງໃຫມ່ ເມືອງໂພນທອງມີ 25 ໂຄງການ ມູນຄ່າ 13.35 ຕື້ກີບ ໃນນັ້ນຂົງເຂດເສດຖະກິດ ມີ 9 ໂຄງການ ມູນຄ່າ 7.45 ຕື້ກີບ ຂົງເຂດວັດທະນະທຳ-ສັງຄົມ ມີຈຳນວນ 10 ໂຄງການ ລວມມູນຄ່າ 3.79 ຕື້ກີບ ແລະຂົງເຂດ ສຳນັກງານ-ຫ້ອງການມີ 6 ໂຄງການ ມູນຄ່າ 2.11 ຕື້ກີບ
ພ້ອມກັນນັ້ນ ຍັງມີບ້ວງຂອງການພັດທະນາຊົນນະບົດ ແລະລຶບລ້າງຄວາມທຸກຍາກ ມີຈຳນວນ 22 ໂຄງການມູນຄ່າ 5.3 ຕື້ກີບ ເສດຖະກິດ ມີ 10 ໂຄງການ ລວມມູນຄ່າ 2.73 ຕື້ກີບ ຂົງເຂດວັດທະນະທຳ-ສັງຄົມ 8 ໂຄງການ ມູນຄ່າ 1.97 ຕື້ກີບ ແລະຂົງເຂດສຳນັກງານ-ຫ້ອງການ ຈຳນວນ 45 ໂຄງການ ລວມມູນຄ່າ 6 ຮ້ອຍລ້ານກີບ
ການລົງທຶນຂອງລັດ ເບື້ອຈັດສັນພູມລຳເນົາ ແລະບ່ອນທຳມາຫາກິນມີຈຳນວນ 30 ໂຄງການ ມູນຄ່າລວມ 3.5 ຕື້ກີບ ໃນນັ້ນຂົງເຂດເສດຖະກິດ 23 ໂຄງການ ມູນຄ່າ 2.68 ຕື້ກີບ ວັດທະນະທຳ-ສັງຄົມ 4 ໂຄງການ ມູນຄ່າ 400 ລ້ານກີບ ສຳນັກງານ-ຫ້ອງການ ຈຳນວນ 3 ໂຄງການ ມູນຄ່າ 300 ລ້ານກີບ ນອກຈາກນີ້ ຍັງມີບ້ວງການລົງທຶນໃສ່ໃນການພື້ນຟູຊົນລະປະທານ ເພື່ອຕອບສະຫນອງແກ່ການຜະລິດ ໃນລະດູແລ້ງ ແລະ ລະດູຝົນ ໃນຈຳນວນ 3 ໂຄງການ ມູນຄ່າ 900 ລ້ານກວ່າກີບ
