ຜົນສໍາເລັດກອງປະຊູມໃຫຍ່ຄັ້ງທີ X ຂອງ ແນວລາວສ້າງຊາດພ້ອມແຕ່ງຕັ້ງຄະນະນໍາຊຸດໃໝ່ ພາຍຫລັງໄດ້ດໍາເນີນມາເປັນເວລາ 2 ວັນ ( 8-9 ມິຖຸນາ 2016) ຂອງ ກອງປະຊູມໃຫຍ່ຄັ້ງທີ X ຂອງແນວລາວສ້າງຊາດ ເຊິ່ງກອງປະຊຸມດັ່ງກ່າວປິດລົງດ້ວຍຜົນສໍາເລັດຢ່າງຈົບງາມໃນວັນທີ 9 ມິຖຸນານີ້ ແລະໄດ້ເຫັນດີເປັນເອກະພາບຮັບຮອງເອົາຄະນະນໍາຊຸດໃໝ່ດັ່ງນີ້ 

ແຕ່ງຕັ້ງທ່ານ ໄຊສົມ ພອນ ພົມວິຫານ ເປັນປະທານສູນ ກາງແນວລາວສ້າງຊາດ, ເລືອກເອົາຮອງປະທານຈໍານວນ 6 ທ່ານ, ແລະຄະນະກໍາມະການ ສູນກາງແນວລາວສ້າງຊາດ ຈໍານວນ 10 ທ່ານ ຈາກຜູ້ສະໝັກ 224 ທ່ານ, ຍິງ 47 ທ່ານ, ພະສົງ 15 ອົງ ພ້ອມນີ້ ຜູ້ແທນກອງປະຊຸມໄດ້ເປັນເອກະພາບຮັບຮອງເອົາຄາດໝາຍສູ້ ຊົນການນໍາພາຂອງຄະນະກໍາມະການສູນກາງແນວ ລາວສ້າງ ຊາດຂອງຕົນແຕ່ນີ້ ຮອດປີ 2030 ແລະ ແຜນຍຸດທະສາດ 10 ປີຕໍ່ໜ້າ 2016-2025 ປະຕິບັດ 6 ແຜນງານຕົ້ນຕໍຄື

ສຶກສາອົບຮົມ, ເຕົ້າໂຮມ ແລະ ກໍ່ສ້າງກ້ອນກໍາລັງສາມັກຄີປອງດອງທົ່ວວົງ ຄະນາຍາດແຫ່ງຊາດ, ເປັນໃຈກາງປະສານສົມທົບກັບພາຄີ ແລະພາກສ່ວນຕ່າງໆ ຊຸກຍູ້ຂະບວນແຂ່ງຂັນຮັກຊາດ ແລະພັດທະນາ, ເຂົ້າຮ່ວມຂະບວນກໍ່ສ້າງຮາກຖານການເມືອງ ແລະພັດທະນາຊົນນະບົດຮອບດ້ານ, ປະຕິບັດ 4 ເນື້ອໃນ 4 ຄາດໝາຍ ຕາມທິດ 3 ສ້າງ, ບົນຈິດໃຈບຸກທະລຸທັງ 4 ດ້ານ, ສ້າງບ້ານສາມັກຄີ, ສ້າງກອງທຶນພັດທະນາຂັ້ນບ້ານ ແລະສ້າງລາຍຮັບທີ່ຖືກຕ້ອງຕາມກົດໝາຍ

ເສີມຂະຫຍາຍສິດເປັນເຈົ້າຂອງປະຊາຊົນ  ແລະປົກປັກຮັກສາຮີດຄອງປະເພນີອັນດີງາມຂອງຊາດ ແລະເອກະລັກຂອງແຕ່ລະຊົນເຜົ່າ, ພ້ອມທັງປັບປຸງກົງຈັກ ແລະແບບແຜນວິທີເຮັດວຽກ ຂອງອົງການແນວລາວສ້າງຊາດແຕ່ລະຂັ້ນ, ພັດທະນາພື້ນຖານໂຄງລ່າງຂອງແນວລາວສ້າງຊາດ ແລະຫັນເປັນທັນສະໄໝ, ເພີ່ມທະວີການທູດປະຊາຊົນຄວາມສາມັກຄີທົ່ວປວງຊົນ ແລະສໍາລັບ 5 ປີຕໍ່ໜ້າຈະຫັນບາດລ້ຽວທີ່ສໍາຄັນທີ່ສຸດຄືນໍາພາປະເທດຊາດອອກຈາກ ສະຖານະພາບປະເທດດ້ອຍພັດທະນາ