"ການສະເຫຼີມສະຫຼອງວັນປະຊາກອນໂລກ 11 ກໍລະກົດ ປະຈຳປີ 2016"
ເມື່ອວັນທີ 11 ກໍລະກົດ 2016 ນີ້ ຢູ່ທີ່ນະຄອນຫຼວງວຽງຈັນ ໄດ້ຈັດພິທີການສະເຫຼີມສະຫຼອງວັນປະຊາກອນໂລກ ປະຈຳປີ 2016 ຂື້ນ ພາຍໃຕ້ ຫົວຂໍ້: "ການລົງທຶນໃສ່ໄວໜຸ່ມຍິງ". ໂດຍພາຍໃຕ້ການເປັນປະທານຂອງ ທ່ານ ປະລິນຍາເອກ ສຸພັນ ແກ້ວມີໄຊ ລັດຖະມົນຕີ ກະຊວງແຜນການ ແລະ ການລົງທຶນ, ທ່ານນາງ ອິນລາວັນ ແກ້ວບຸນພັນ ປະທານ ສູນກາງສະຫະພັນແມ່ຍິງລາວ, ທ່ານ ປະລິນຍາເອກ ສອນທະນູ ທຳມະວົງ ເລຂາທິການ ປະທານສູນກາງຊາວໜຸ່ມ ປະຊາຊົນປະຕິວັລາວ, ທ່ານ ຮອງສາດສະດາຈານ ປະລິນຍາເອກ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ, ທ່ານ ຮອງສາດສະດາຈານ ກອງສີ ແສງມະນີ ຮອງລັດຖະມົນຕີກະຊວງສຶກສາທິການ ແລະ ກິລາ, ທ່ານ ເຟຣເດິຣິ ເມເຈີ ຜູ້ຕາງໜ້າ ອົງການສະຫາປະຊາຊາດ ກອງທຶນສຳລັບປະຊາກອນ, ຫລື UNFPA ປະຈຳ ສປປ ລາວ, ມີບັນດາຄູ່ຮ່ວມພັດທະນາ, ສື່ມວນຊົນ, ນ້ອງນັກຮຽນ ແລະ ແຂກຜູ້ມີກຽດເຂົ້າຮ່ວມ.
ເນື່ອງໃນໂອກາດວັນສະເຫຼີມສະຫຼອງວັນປະຊາກອນໂລກ ຄົບຮອບ 29 ປີ, ທ່ານ ປະລິນຍາເອກ ສຸພັນ ແກ້ວມີໄຊ ລັດຖະມົນຕີ ກະຊວງແຜນການ ແລະ ການລົງທຶນ ໄດ້ກ່າວວ່າ: "ຕ້ອງລົງທຶນໃສ່ໄວໜຸ່ມຍິງໃຫ້ຫຼາຍຂຶ້ນໃນທຸກຂະແໜງການ". ການລົງທຶນໃສ່ໄວໜຸ່ມຍິງ ຈະນຳຜົນປະໂຫຍດຢ່າງໃຫຍ່ຫຼວງມາສູ່ການພັດທະນາໃນ ສປປ ລາວ ຫຼາຍກວ່າ 50% ຂອງປະຊາກອນລາວ ໃນໄວອາຍຸຕໍ່າກວ່າ 25 ປີ. ໂຄງປະກອບປະຊາກອນທີ່ໜຸ່ມນ້ອຍ ຈະສົ່ງຜົນກະທົບທາງບວກ ໃນດ້ານປະຊາກອນ ໃຫ້ແກ່ ສປປ ລາວ, ໃນຕໍ່ໜ້າ ແລະ ເພື່ອເພີ່ມທະວີຜົນປະໂຫຍດດັ່ງກ່າວ ທີ່ມາຈາກການມີປະຊາກອນໄວໜຸ່ມຫຼວງຫຼາຍ ສະນັ້ນ, ຈຳເປັນຕ້ອງລົງທຶນໃສ່ການພັດທະນາຊັບພະຍາກອນມະນຸດ ໂດຍສະເພາະໄວໜຸ່ມໃນມື້ນີ້.
ໃນໄລຍະຜ່ານມາ ວຽກງານດັ່ງກ່າວມີຄວາມຄືບໜ້າທີ່ເພິ່ງພໍໃຈ ໃນດ້ານການສຶກສາ ແລະ ສາທາລະນະສຸກ. ແຕ່ວ່າເດັກຍິງໃນເຂດຊົນນະບົດ ແລະ ຈາກຄອບຄົວທີ່ທຸກຍາກ ຍັງປະເຊີນໜ້າກັບສິ່ງທ້າທາຍທີ່ຫຼາກຫຼາຍ ແລະ ຍັງມີອີກຈຳນວນໜຶ່ງ ບໍ່ໄດ້ເຂົ້າໂຮງຮຽນ ຫຼື ອອກໂຮງຮຽນ, ບໍ່ໄດ້ຮັບຂໍ້ມູນ ແລະ ການບໍລິການສຸຂະພາບ, ຖືກເອົາລັດເອົາປຽບ, ຈຳແນກສະເພາະເປັນແມ່ຍິງ ແລະ ມີອາຍຸນ້ອຍ. ການແຕ່ງງານໄວແມ່ຢູ່ໃນອັນດັບສູງ ໃນ ສປປ ລາວ ຖ້າທຽບໃສ່ປະເທດອື່ນໃນພາກພື້ນ ແມ່ຍິງຈຳນວນ 1 ໃນ 10 ຄົນ ແມ່ນ ແຕ່ງງານແຕ່ອາຍຸ 15 ປີ. ການແຕ່ງງານໄວແມ່ນກ່ຽວພັນກັບການຖືພາແຕ່ອາຍຸຍັງນ້ອຍ, ດັ່ງນັ້ນ ສປປ ລາວ, ກໍມີອັດຕາການຖືພາໃນໄວໜຸ່ມສູງ ທຽບໃສ່ຢູ່ໃນຂົງເຂດພາກພື້ນ. ແມ່ຍິງ ອາຍຸລະຫວ່າງ 15-19 ປີໃນຈຳນວນ 1,000 ຄົນ, ຈະມີ ຈຳນວນ 94 ຄົນເກີດລູກ.
