"ການອະນຸລັກ ສັດນ້ຳ-ສັດປ່າ ແມ່ນໜ້າທີ່ຂອງທົ່ວປວງຊົນລາວເຮົາທຸກຄົນ"

ວັນທີ 13 ກໍລະກົດ ຂອງທຸກໆປີ ເປັນວັນປ່ອຍປາ ແລະ ອະນຸລັກສັດນ້ຳ-ສັດປາແຫ່ງຊາດ, ມາຮອດປະຈຸບັນເຫັນໄດ້ວ່າ ວຽກງານດັ່ງກ່າວໄດ້ກາຍເປັນຂະບວນການຂອງທົ່ວປວງຊົນ ແລະ ຫຼາຍພາກສ່ວນໃນສັງຄົມ ກໍ່ໄດ້ມີສ່ວນຮ່ວມເປັນຢ່າງດີ, ເປັນການປະກອບສ່ວນເຂົ້າໃນສັງຄົມ ມີຄວາມເຂົ້າໃຈກ່ຽວກັບຄວາມໝາຍ, ຄວາມສຳຄັນ ຂອງການຄຸ້ມຄອງຊັບພະຍາກອນປາ ແລະ ສັດນ້ຳ ໃຫ້ມີຄວາມຍືນຍົງ. ລວມທັງເປັນການປະກອບສ່ວນໃນນການພັດທະນາຂະແໜງການປະມົງ ໃຫ້ສາມາດບັນລຸຄາດໝາຍສູ້ຊົນຕ່າງໆ ທີ່ໄດ້ວາງອອກເປັນການປະກອບສ່ວນຕໍ່ບັນດາແຜນງານບຸລິມະສິດຂອງ ກະຊວງກະສິກຳ ແລະ ປ່າໄມ້ ກໍຄື ຂອງລັດຖະບານໃນການຄ້ຳປະກັນດ້ານສະບຽງອາຫານ, ການລຶບລ້າງຄວາມທຸກຍາກ ແລະ ກ້າວໄປສູ່ການນຳເອົາປະເທດຊາດຫຼຸດພົ້ນອອກຈາກສະຖານະພາບປະເທດດ້ອຍພັດທະນາໃນປີ 2020.

ສະເພາະ 2016 ນີ້, ໄດ້ວາງຄາດໝາຍໃນຂອບເຂດທົ່ວປະເທດ ປ່ອຍປາ ຈຳນວນ 40 ລ້ານໂຕ ໃສ່ແຫຼ່ງນ້ຳທຳມະຊາດ ຕ່າງໆເຊັ່ນ: ແມ່ນ້ຳຂອງ ແລະ ແມ່ນ້ຳສາຂາ, ອ່າງເກັບນ້ຳເຄື່ອນໄຟຟ້າ, ອ່າງເກັບນ້ຳຊົນລະປະທານ, ໜອງ ແລະ ບຶງທຳມະຊາດ, ໜອງປາຊຸມຊົນ ແລະ ດິນບໍລິເວນນ້ຳ ປະເພດຕ່າງໆຢ່າງເປັນຂະບວນຟົດຟື້ນ.

ເພື່ອເຮັດໃຫ້ການຈັດຕັ້ງປະຕິບັດ ຂະບວນການດັ່ງກ່າວ ມີຜົນສຳເລັດ, ທາງພາກສ່ວນກ່ຽວຂ້ອງໂດຍສະເພາະກົມລ້ຽງສັດ ແລະ ການປະມົງໄດ້ຮຽກຮ້ອງໃຫ້ປະຊາຊົນ ຫັນມາເຫັນຄວາມສຳຄັນຂອງການອະນຸລັກສັດນ້ຳ-ສັດປ່າ, ການປົກປັກຮັກສາ, ຄຸ້ມຄອງ ແລະ ພັດທະນາການປະມົງແບບຍືນຍົງ ແລະ ປຸກລະດົມຂົນຂວາຍອົງການຈັດຕັ້ງທັງພັກລັດ ແລະ ເອກະຊົນ ໃນການຈັດກິດຈະກຳຕ່າງໆ ເພື່ອໃຫ້ສັງຄົມເອົາໃຈໃສ່ປ່ອຍປາລົງໃສ່ໜອງ, ບຶງ, ແມ່ນ້ຳລຳເຊ, ອ່າງນ້ຳ, ເຂື່ອນໄຟຟ້ານ້ຳຕົກ, ແຫຼ່ງທ່ອງທ່ຽວນ້ຳຕົກຕາດຕ່າງໆ ແລະ ປ່ອຍສັດປ່າ ທີ່ໄດ້ມາຈາກການເພາະພັນ, ຢຶດຈາກການຫາ, ລ່າ ຫຼື ການຄ້າຂາຍສັດປ່າຜິດກົດໝາຍ ເຂົ້າໃນປ່າສະຫວຽນຕ່າງໆ ທີ່ເຫັນວ່າມີຄວາມປອດໄພ ແລະ ສາມາດອອກແມ່ແຜ່ລູກໄດ້ໃຫ້ເປັນຂະບວນກ້ວາງຂວາງ, ຫ້າມບໍ່ໃຫ້ຈັບ, ຊື້-ຂາຍ ສັດນ້ຳ ແລະ ລ່າສັດປ່າ ປະເພດຫວງຫ້າມທີ່ຍັງມີຊີວິດ, ຊາກ, ຊິ້ນສ່ວນ ແລະ ອະໄວຍະວະຕ່າງໆ ຂອງສັດອອກຈາກຖິ່ນທີ່ຢູ່ອາໃສ ຫຼື ແຫຼ່ງກຳເນີດມາໄວ້ໃນຄອບຄອງກໍລະນີພົບເຫັນຜູ້ລະເມີດ. ຂໍ້ຫ້າມດັ່ງກ່າວ ໃຫ້ສົມທົບກັບພາກສ່ວນທີ່ກ່ຽວຂ້ອງດຳເນີນມາດຕະການກ່າວເຕືອນສຶກສາອົບຮົມ, ປັບໃໝດຳເນີນຄະດີຕາມແຕ່ລະກໍລະນີໜັກ-ເບົາ ທີ່ໄດ້ກຳນົດໄວ້ໃນກົດໝາຍວ້າດ້ວຍການປະມົງ ແລະ ກົດໝາຍວ່າດ້ວຍສັດນ້ຳສັດປ່າ.