ຄະນະບັນນາທິການຫນັງສືພີມພາສາຕ່າງປະເທດ ຮ່ວມກັບ ສະມາຄົມນັກຂ່າວ ແຫ່ງ ສປປ ລາວ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ຈັດສຳມະນາກ່ຽວກັບອາຊຽນ ແລະ ການພົວພັນການຄ້າສາກົນ ຂື້ນໃນວັນທີ 5 ກໍລະກົດ 2016 ຜ່ານມາ ທີ່ສໍານັກງານຫນັງສືພິມພາສາຕ່າງປະເທດ. ໂດຍການເປັນປະທານເປີດພິທີ ຂອງ ທ່ານ ສະຫວັນຄອນ ຣາດຊະມຸນຕີ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ເຂົ້າຮ່ວມມີ ຜູ້ອຳນວຍການໂທລະພາບແຫ່ງຊາດລາວ, ມີຜູ້ຕາງຫນ້າກົມອາຊຽນ ກະຊວງການຕ່າງປະເທດ, ຕາງຫນ້າກົມການຄ້າ ກະຊວງອຸດສາຫາກຳ ແລະ ການຄ້າ, ມີຄະນະບັນນາທິການຫນັງສືພີມທຸກສຳນັກ, ສື່ມວນຊົນຈາກທຸກຂະແຫນງການວິທະຍຸ, ໂທລະພາບ ແລະ ຫນັງສືພີມ ເຂົ້າຮ່ວມ.

ໃນພິທີ ທ່ານ ຮອງລັດຖະມົນຕີ ກະຊວງ ຖວທ ກ່າວວ່າ: ສື່ຂອງລາວແມ່ນເປັນກະບອກສຽງຂອງພັກ-ລັດ ແລະ ເປັນເວທີ ຂອງມະຫາຊົນ, ສະນັ້ນ ນັກຂ່າວຈະຕ້ອງຮຽນຮູ້ຮອບດ້ານ, ຍຶດຫມັ້ນໃນຈັນຍາບັນຂອງຕົນ, ຫມາຍຄວາມວ່າ ຂ່າວທີ່ກະຈາຍອອກໄປຕ້ອງຖືກຕ້ອງເລິກເຊີ່ງແນບນຽນ, ແຫລມຄົມ, ຖືກຕ້ອງຊັດເຈນ, ເປັນທຳ ແລະ ທັນກັບສະພາບເຫດການ. ພ້ອມກັນນັ້ນ ຂ່າວຕ້ອງມີລັກສະນະຕົວຈິງ, ລັກສະນະຕໍ່ສູ້, ສຶກສາອົບຮົມ ແລະ ຊີ້ນຳຢ່າງຖືກຕ້ອງ. ການສຳມະນາຄັ້ງນີ້ ແມ່ນມີ 2 ຫົວຂໍ້:

1. ການຫັນວິໄສທັດໃຫ້ເປັນຮູບປະທຳ ເພື່ອຄວາມເຂັ້ມແຂງຂອງປະຊາຄົມອາຊຽນ

2. ການພົວພັນການຄ້າກັບສາກົນ ຂອງ ສປປ ລາວ ໃນໄລຍະໃໝ່.

ສຳລັບວິທະຍາກອນທີ່ມາແລກປ່ຽນບົດຮຽນ ແມ່ນໄດ້ເຊື້ອເຊີນມາຈາກກົມອາຊຽນ ກະຊວງການຕ່າງປະເທດ ແລະ ກົມການຄ້າ ກະຊວງອຸດສາຫະກຳ ແລະ ການຄ້າ. ເຊິ່ງເປັນຜູ້ທີ່ມີຄວາມຮູ້-ຄວາມສາມາດ ແລະ ເຮັດວຽກຕົວຈິງ ທັງພາຍໃນລາວ ແລະ ຢູ່ຕ່າງປະເທດເປັນເວລາຫລາຍປີ. ການສຳມະນະນາຄັ້ງນີ້, ຈຸດປະສົງຫລັກ ເພື່ອນຳສະເຫນີຂໍ້ມູນໃຫ້ແກ່ບັນດານັກຂ່າວ ໄດ້ເຂົ້າໃຈຢ່າງເລິກເຊິ່ງ ແລະ ນຳສະເຫນີຂ່າວໄດ້ຢ່າງຖືກຕ້ອງຊັດເຈນ ກ່ຽວກັບອາຊຽນ ໃນໄລຍະທີ່ ສປປ ລາວ ເປັນປະທານອາຊຽນ ແລະ ເປັນປີທຳອິດທີ່ອາຊຽນກ້າວເຂົ້າສູ່ການເປັນປະຊາຄົມ ແລະ ເປັນປີທຳອິດທີ່ໄດ້ຈັດຕັ້ງປະຕິບັດວິໄສທັດອາຊຽນ ແລະ ແຜນແມ່ບົດ ທັງ 3 ເສົາຄ້າ (ການເມືອງຄວາມຫມັ້ນຄົງ, ເສດຖະກິດ ແລະ ວັດທະນະທຳ-ສັງຄົມ). ການສຳມະນາ ໃນຄັ້ງນີ້ ດຳເນີນເປັນເວລາ 1 ວັນ ຈິ່ງໄດ້ປິດລົງດ້ວຍຜົນສຳເລັດອັນດີງາມ.