"ໃນ 5 ປີຜ່ານມາ "ສື່" ໃນ ສປປ ລາວ ໄດ້ເພີ່ມຂຶ້ນຢ່າງໄວວາ"
ໃນສະພາບສັງຄົມຍຸກປັດຈຸບັນທີ່ສາມາດເອີ້ນໄດ້ວ່າເປັນ ສັງຄົມຍຸກສື່ສານ. ເຊິ່ງຄວາມຈະເລີນກ້າວໜ້າ ຫຼື ຄວາມຢູ່ລອດຂອງສັງຄົມຂຶ້ນຢູ່ກັບຄົນໃນສັງຄົມ ໄດ້ຮັບຮູ້ຂໍ້ມູນ-ຂ່າວສານທີ່ຖືກຕ້ອງ, ທັນເວລາ ແລະ ປັບຕົວໄດ້ຢ່າງເໝາະສົມ "ສື່ມວນຊົນ" ຈິ່ງມີບົດບາດສຳຄັນໃນການສະເໜີຂ່າວສານທີ່ເປັນປະໂຫຍດຕໍ່ສັງຄົມ ຕະຫຼອດຈົນຊີ້ນຳຄວາມຄິດຂອງຄົນໃນສັງຄົມອີກດ້ວຍ.
ໃນວັນທີ 12 ກໍລະກົດ 2016 ຢູ່ທີ່ຫ້ອງປະຊຸມ ສະຖານີວິທະຍຸກະຈາຍສຽງແຫ່ງຊາດ ນະຄອນຫຼວງວຽງຈັນ, ໄດ້ຈັດກອງປະຊຸມວິຊາການວຽກງານຖະແຫຼງຂ່າວ-ສື່ມວນຊົນທົ່ວປະເທດຂື້ນ ເພື່ອເສີມຂະຫຍາຍວຽກງານສື່ມວນຊົນຂອງລາວ ແລະ ພັດທະນາສື່ມວນຊົນລາວໃຫ້ມີຄຸນພາບ, ເປັນລະບົບ, ທັນສະໄໝ, ວ່ອງໄວ ແລະ ຊັດເຈນ.
"ທ່ານ ປິ່ນປາດຖະໜາ ພັນທະມາລີ" ຫົວໜ້າກົມສື່ມວນຊົນ ກະຊວງຖະແຫຼງຂ່າວ, ວັດທະນະທໍາ ແລະ ການທ່ອງທ່ຽວ ໄດ້ກ່າວສະຫຼຸບຜົນງານທີ່ພົ້ນເດັ່ນຂອງວຽກງານຖະແຫຼງຂ່າວ-ສື່ມວນຊົນ ໃນໄລຍະ 5 ປີ ຜ່ານມາວ່າ: ສື່ມວນຊົນໄດ້ເຮັດບົດບາດໂຄສະນາເຫດການສໍາຄັນຄື: ປະກອບສ່ວນຢ່າງໃຫຍ່ຫຼວງໂຄສະນາເຜີຍແຜ່ເນື້ອໃນຈິດໃຈກອງປະຊຸມໃຫຍ່ຄັ້ງທີ IX ຂອງພັກ ແລະ ສ່ອງແສງໃຫ້ເຫັນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຂອງລັດ, ວຽກງານ 3 ສ້າງ, ຄຽງຄູ່ກັນນັ້ນໄດ້ໂຄສະນາແກ່ການກະກຽມໄຂກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X ຂອງພັກ.
ສໍາລັບສື່ສິ່ງພິມຕ່າງໆ ແມ່ນໄດ້ເພີ່ມຂຶ້ນ 4 ສະບັບ, ວາລະສານ 30 ສະບັບ ແລະ ໃບຂ່າວ 1 ສະບັບ, ຮອດປີ 2015 ສາມາດສະຫຼຸບໄດ້ດັ່ງນີ້:
ສື່ສິ່ງພິມ: ທັງໝົດ 127 ສະບັບ, ໜັງສືພິມ 27 ສະບັບ. ໃນນັ້ນ, ມີໜັງສືພິມລາຍວັນ 11 ສະບັບ.
ສື່ວາລະສານ: ວາລະສານ ຈໍານວນ 100 ສະບັບ.
ສື່ວິທະຍຸກະຈາຍສຽງ: ໃນປັດຈຸບັນທົ່ວປະເທດມີສະຖານີວິທະຍຸ ຈໍານວນ 63 ສະຖານີ. ໃນນັ້ນ, ຢູ່ສູນກາງ 11 ສະຖານີ, ຢູ່ແຂວງ 19 ສະຖານີ, ຢູ່ເມືອງ 33 ສະຖານີ, ເຊິ່ງສາມາດກະຈາຍສັນຍານຄຸມພື້ນທີ່ທົ່ວປະເທດໄດ້ປະມານ 95%.
ສື່ໂທລະພາບ: ປັດຈຸບັນໃນທົ່ວປະເທດມີສະຖານີໂທລະພາບ 37 ສະຖານີ. ໃນນັ້ນ, ຢູ່ສູນກາງ 9 ສະຖານນີ້, ຢູ່ແຂວງ 17 ສະຖານີ ແລະ ຢູ່ເມືອງ 11 ສະຖານີ, ເຊິ່ງກະຈາຍຈາກພື້ນດິນ ແລະ ສາມາດຄວບຄຸມພື້ນທີ່ທົ່ວປະເທດໄດ້ 80% ແລະ ສະຖານີໂທລະພາບສູນກາງ 6 ຊ່ອງ ໄດ້ກະຈາຍດາວທຽມ ທີ່ມີສັນຍານກວມເອົາ 100% ຂອງພື້ນທີ່ທົ່ວປະເທດ.
