ຈາກການຈັດອັນດັບຂອງວາລະສານ ການທ່ອງທ່ຽວ "ວັນເດິລັດ" ຂອງປະເທດອັງກິດ ລະບຸວ່າ: ເມືອງຍອດນິຍົມຂອງທ່ອງທ່ຽວຊັ້ນນຳຂອງໂລກ ຫລື ເມືອງທີ່ເປັນຈຸດຫມາຍປາຍທາງຂອງນັກທ່ອງທ່ຽວ ໃນປີ 2016 "Wanderlust travel awards 2016" ອັນດັບ 1 ແມ່ນເມືອງຮອຍອານ Hoi an, ປະເທດຫວຽດນາມ. ຊຶ່ງໄດ້ຄະແນນ 98.5% ອັນດັບ 2 ແມ່ນເມືອງທອມໂຊ Tromso, ປະເທດນ໊ອກແວ ດ້ວຍຄະແນນ 98.33% ແລະ ອັນດັບ 3 ແມ່ນເມືອງບາການ, ປະເທດ ມຽນມາ ດ້ວຍຄະແນນ 96.92%. ສຳລັບ ເມືອງ ຫລວງພະບາງ ແມ່ນມີຄະແນນ 94.67 % ຕົກມາຢູ່ໃນອັນດັບ 8 ໃນປີ 2016 ນີ້. ໃນສ່ວນຜົນງານທີ່ຜ່ານມາຂອງ ເມືອງ ຫລວງພະບາງ ໄດ້ຖືກຄັດເລືອກໃຫ້ເປັນເມືອງຍອດນິຍົມ ຂອງນັກທ່ອງທ່ຽວ 3 ປີຊ້ອນ ຄື: ປີ 2006, 2007, 2008 ຊຶ່ງຈັດໂດຍ ວາລະສານການ ທ່ອງທ່ຽວ "ວັນເດິລັດ" ຂອງປະເທດອັງກິດ ແລະ ລາງວັນດັ່ງກ່າວໄດ້ຕົກມາເປັນຂອງ ເມືອງຫລວງພະບາງ ອີກໃນປີ 2010, 2011, 2012. ຫລັງຈາກນັ້ນ ປີ 2014 ເມືອງ ຫລວງພະບາງ ໄດ້ຖຶກຈັດຢູ່ໃນອັນດັບ 2 ຂອງເມືອງຍອດນິຍົມຂອງທ່ອງທ່ຽວໃນໂລກ ແລະ ໃນປີ 2015 ຫລວງພະບາງໄດ້ກັບມາເປັນອັນດັບ 1 ອີກຄັ້ງ. ແຕ່ເປັນທີ່ຫນ້າເສຍດາຍ ໃນປີ 2016 ເມືອງ ຫລວງພະບາງ ຕົກມາຢູ່ໃນອັນດັບ 8 ຂອງເມືອງຍອດນິຍົມຂອງນັກທ່ອງທ່ຽວ. ໄປເບີ່ງກັນວ່າ ເມືອງຫລວງພະບາງ ມີສະເໜ່ທີ່ບ່ອນໃດ, ຊຶ່ງຫລວງພະບາງເປັນເມືອງທີ່ມີຮີດຄອງປະເພນີ, ວັດທະນະທຳ, ວິຖີການດຳລົງຊີວິດ, ອາຫານການກິນທີ່ຫລາກຫລາຍ ແລະ ສະຖານທີທ່ອງທ່ຽວທຳມະຊາດ ແລະ ບູຮານເກົ່າແກ່ຫລາຍແຫ່ງ, ເປັນເມືອງທີ່ມີຄວາມສະຫງົບ, ມີຮອຍຍີ້ມໄມຕີຂອງປະຊາຊົນແບບເປັນກັນເອງ ຊຶ່ງເຮັດໃຫ້ນັກທ່ອງທ່ຽວເກີດຄວາມຫລົງໄຫລ ໃນມົນສະເໜ່ຂອງເມືອງຫລວງພະບາງແຫ່ງນີ້ ແລະ ອີກບໍ່ນານຄິດວ່າ ເມືອງຫລວງພະບາງ ຕ້ອງກັບມາຄອງຄວາມເປັນຫນຶ່ງອີກຄັ້ງແນ່ນອນ.
PHOTO: Tourismluangprabang & Yoy Freestyler
