ນັກປະພັນລາວຈຳນວນສອງທ່ານ ຄື:ທ່ານ ແສງຟ້າ ໂຫລານະພາບ ນັກປະພັນບົດເລື່ອງສັ້ນ “ເງິນ ຫຼື ອຸດົມການ”ແລະ ທ່ານ ບຸນທັນ ພົງພິຈິດ ນັກປະພັນນະວະນິຍາຍເລື່ອງ “ລົມຫາຍໃຈ”ຮັບລາງວັນ ວັນນະກຳແມ່ນ້ຳຂອງປີ 2016 ປີນີ້ແມ່ນ ສປ ຈີນ ເປັນເຈົ້າພາບຈັດຂຶ້ນຢ່າງສົມກຽດທີ່ນະຄອນຄຸນໝິງ ເມື່ອວັນທີ 10 -13 ມີຖຸນາ ທີ່ຜ່ານມານີ້ ສະນັ້ນເພື່ອເປັນການຊົມເຊີຍຜົນງານດັ່ງກ່າວ ໃນຕອນບ່າຍຂອງວັນທີ 15 ມີຖຸນາ ທີ່ຜ່ານມານີ້ ໄດ້ມີພິທີຖະແຫຼງຂ່າວຜົນສຳເລັດຂອງການເຂົ້າຮ່ວມຮັບລາງວັນອັນຊົງກຽດນີ້ ທີ່ມະຫາວິທະຍາໄລແຫ່ງຊາດລາວ ໂດຍມີທ່ານ ລຳໄມ ພິພັກຄະວົງ ຮອງອະທິການບໍດີ ມະຫາວິທະຍາໄລແຫ່ງຊາດ, ທ່ານ ທອງໃບ ໂພທິສານ ປະທານສະມາຄົມ ນັກປະພັນລາວ, ມີນັກປະພັນລາວ ໄດ້ຮັບລາງວັນ ວັນນະກຳແມ່ນ້ຳຂອງ ແລະ ນັກສຶກສາເຂົ້າຮວ່ມ.
ໃນປີນີ້ນັກປະພັນໄດ້ສົງຜົນງານຂອງຕົນເຂົ້າຮ່ວມການຄັດເລືອກເປັນຈຳນວນຫຼວງຫຼາຍເຊິ່ງມີທັງໝົດບົດນະວະນິຍາຍ, ບົດເລື່ອງສັ້ນ ແລະ ບົດກາວີ, ຜ່ານການຕັດສິນຂອງຄະນະກຳມະການເຫັນວ່າ ບົດນະວະນິຍາຍ “ລົມຫາຍໃຈ” ແລະ ບົດເລື່ອງສັ້ນ “ເງິນ ຫຼື ອຸດົມການ” ມີເນື້ອໃນທີ່ແທດເໝາະກັບຍຸກສະໄໝ, ມີສາລະທີ່ເປັນປະໂຫຍດກັບຜູ້ອ່ານຈິງເໝາະສົມທີ່ໄດ້ ຮັບລາງວັນ ວັນນະກຳແມ່ນ້ຳຂອງປະຈຳປີນີ້ ຂອງສາທາລະນະລັດ ປະຊາທິປະໄຕ ປະຊາຊົນລາວ ເຊິ່ງນອກຈາກນັກປະພັນລາວກໍຍັງມີນັກປະພັນຈາກ 6 ປະເທດແມ່ນ້ຳຂອງກໍ່ໄດ້ຮັບລາງວັນນີ້ເຊັ່ນກັນ. ໃນປັດຈຸບັນຢູ່ ມີນັກປະພັນສາທາລະນະລັດ ປະຊາທິປະໄຕ ປະຊາຊົນລາວ ທີ່ໄດ້ຮັບລາງວັນນີ້ ຈຳນວນ 25 ທ່ານ.
ລາງວັນ ວັນນະກຳແມ່ນ້ຳຂອງເປັນລາງວັນທີ່ມີຄວາມໝາຍຄວາມສຳຄັນໃນການເສີມສ້າງສັນຕິພາບ, ມິດຕະພາບ ແລະ ການຮ່ວມມືດ້ານການປະພັນວັນນະຄະດີຂອງບັນດາປະເທດທີ່ມີຊາຍແດນຕິດກັບແມ່ນ້ຳຂອງເຊັ່ນ:ຫວຽດນາມ, ລາວ, ກຳປູເຈຍ,ໄທ, ມຽນມາ ແລະ ສປ ຈີນ, ທັງເປັນເວທີການພົບປະສົນທະນາ, ເສີມສ້າງຄວາມເຂົ້າອົກເຂົ້າໃຈເຊິ່ງກັນ ແລະ ກັນ ລະຫວ່າງນັກປະພັນ, ນັກກະວີດ້ວຍກັນໃຫ້ນັບມື້ກ້ວາງຂວາງ ແລະ ເລິກເຊິ່ງກວ່າເກົ່າ ເພື່ອພ້ອມກັນກ້າວໄປຂ້າງໜ້າດ້ວຍອະ ນາຄົດອັນສົດໃສ ແລະ ໝັ້ນຄົງ.ພ້ອມກັນນັ້ນກໍ່ເປັນການເສີມສ້າງອະລິຍະທຳທາງດ້ານຈິດໃຈ, ຄວາມຮັ່ງມີທາງດ້ານສິລະປະວັນນະຄະດີໃຫ້ແກ່ປະຊາຊົນບັນເຜົ່າຂອງຕົນ ຢູ່ແຕ່ລະປະເທດໃຫ້ສົມບູນຢ່າງບໍ່ຢຸດຢັ້ງ.
