"ຮອງນາຍົກລັດຖະມົນຕີ ແຫ່ງ ສປປ ລາວ ເຄື່ອນໄຫວພົບປະທີ່ ສປ ຈີນ"

ໃນການເດີນທາງໄປເຂົ້າຮ່ວມຮ່ວມງານຕະຫຼາດນັດ ທີ່ຄຸນໝິງ ຄັ້ງທີ 24 ແລະ ງານວາງສະແດງ ຈີນ-ອາຊີໃຕ້ ຄັ້ງທີ IV ທີ່ນະຄອນຄຸນໝິງ, ແຂວງຢຸນນານ, ສປ ຈີນ ໃນລະຫວ່າງວັນທີ 11-17 ມິຖຸນາ 2016, ຄະນະຜູ້ແທນລາວ ນໍາໂດຍ ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ ແຫ່ງ ສປປ ລາວ ກໍ່ໄດ້ມີໂອກາດພົບປະເຮັດວຽກ ກັບ "ທ່ານ ວາງ ຢາງ", ຮອງນາຍົກລັດຖະມົນຕີ ແຫ່ງ ສປ ຈີນ. ໃນການພົບປະຄັ້ງນີ້, ຝ່າຍຈີນ ໄດ້ຕີລາຄາສູງ ຕໍ່ການເດີນທາງມາເຂົ້າຮ່ວມ 2 ງານດັ່ງກ່າວ, ຂອງຄະນະຜູ້ແທນ ແລະ ຜູ້ປະກອບການ ແຫ່ງ ສປປລາວ ເຊິ່ງເປັນການປະກອບສ່ວນ ເຂົ້າໃນການເສີມຂະຫຍາຍ ການພົວພັນຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນ ສອງຊາດ ຈີນ-ລາວ ກໍ່ຄືຕໍ່ການເຊື່ອມໂຍງເສດຖະກິດຂອງຈີນ ໂດຍສະເພາະ ຂອງແຂວງຢຸນນານ ເຂົ້າກັບເສດຖະກິດຂອງພາກພື້ນອາຊີໃຕ້ ແລະ ອາຊີອາຄະເນ ຕາມນະໂຍບາຍ “ກ້າວອອກໄປສູ່ໂລກ” ກໍ່ຄືນະໂຍບາຍ “ໜຶ່ງແລວທາງ ໜຶ່ງເສັ້ນທາງ” ຂອງລັດຖະບານຈີນ ວາງອອກ. ພ້ອມດຽວກັນນັ້ນ, ສອງຝ່າຍ ຍັງໄດ້ແຈ້ງສະພາບພົ້ນເດັ່ນຂອງປະເທດຕົນ ໃຫ້ກັນ ແລະ ກັນຊາບ ແລະ ມີຄວາມເປັນເອກະພາບນໍາກັນສູງ ຕໍ່ບັນຫາຕ່າງໆ ທີ່ມີຄວາມສົນໃຈນໍາກັນ ໂດຍສະເພາະ ທັງສອງຝ່າຍ ເຫັນວ່າ: ມິດຕະພາບ ແລະ ການຮ່ວມມືອັນເປັນມູນເຊື້ອ ລະຫວ່າງສອງຊາດ ລາວ-ຈີນ ໄດ້ມີການພັດທະນາຂະຫຍາຍຕົວຂຶ້ນ ຢ່າງບໍ່ຢຸດຢັ້ງ, ການຮ່ວມມືໃນຂະແໜງ ການຕ່າງໆ ໄດ້ດໍາເນີນໄປຕາມທິດນໍາ ຂອງການເປັນຄູ່ຮ່ວມຍຸດທະສາດຮອບດ້ານ, ການນໍາຂັ້ນສູງຂອງສອງປະເທດ ໄດ້ມີການແລກປ່ຽນການໄປມາຫາສູ່ກັນ ຢ່າງເປັນປົກກະຕິ ຊ່ຶງໄດ້ນຳເອົາຜົນປະໂຫຍດມາສູ່ປະຊາຊົນສອງຊາດ ລາວ-ຈີນ ໄດ້ຢ່າງຫຼວງຫຼາຍ ແລະ ປີ 2016 ກໍ່ແມ່ນອີກປີໜຶ່ງ ທີ່ມີຄວາມໝາຍສໍາຄັນແຫ່ງການພົວພັນຮ່ວມມື ລາວ-ຈີນ ເຊິ່ງສອງຝ່າຍໄດ້ຮ່ວມກັນ ໃນ ການຈັດກິດຈະກໍາຕ່າງໆ ເພື່ອສະເຫຼີມສະຫຼອງ ວັນສ້າງຕັ້ງສາຍພົວພັນການທູດ ລາວ-ຈີນ ຄົບຮອບ 55 ປີ. ອີກດ້ານນ່ຶງ, ທັງສອງຝ່າຍ ໄດ້ສະແດງຄວາມປິຕິຍິນດີ ທີ່ເຫັນວ່າ ການຮ່ວມມືດ້ານເສດຖະກິດ-ເຕັກນິກ ແລະ ການຄ້າ ລະຫວ່າງ ລາວ-ຈີນ ໃນຊຸມປີຜ່ານມາ ໄດ້ຮັບການຊຸກຍູ້ສ່ົງເສີມຂຶ້ນ ຢ່າງບໍ່ຢຸດຢັ້ງ ເປັນຕົ້ນ ມູນຄ່າການຄ້າລາວ-ຈີນ ໄດ້ມີອັດຕາການຂະຫຍາຍຕົວເພີ່ມຂຶ້ນ ບໍ່ຫຼຸດ 20 ສ່ວນຮ້ອຍ, ເປັນເວລາ 7 ປີ ຕໍ່ເນື່ອງກັນ, ການລົງທຶນຈາກຈີນ ຢູ່ ສປປ ລາວ ກໍ່ມີທ່າກ້າວຂະຫຍາຍຕົວເປັນລໍາດັບ. ມາເຖິງປັດຈຸບັນ, ສປ ຈີນ ໄດ້ກາຍເປັນອັນດັທີ 1 ຂອງການລົງທຶນຕ່າງປະເທດ ຢູ່ ສປປ ລາວ, ໂດຍມີໂຄງການລົງທຶນຂອງຈີນ 834 ໂຄງການ, ມີມູນຄ່າການລົງທຶນ 5,48 ຕື້ໂດລາສະຫະລັດ ເຂົ້າໃນຂະແໜງການຫຼັກຕ່າງໆ ເຊັ່ນ: ບໍ່ແຮ່, ພະລັງງານໄຟຟ້າ, ກະສິກຳ, ບໍລິການ ແລະ ຂະແໜງອື່ນໆ ເຊິ່ງໄດ້ປະກອບສ່ວນເຂົ້າໃນການຂະຫຍາຍຕົວຂອງເສດຖະກິດແຫ່ງຊາດລາວເຮົາ. ນອກຈາກນັ້ນ, ລັດຖະບານ ສປ ຈີນ ຍັງສືບຕໍ່ໃຫ້ການຊ່ວຍເຫຼືອ ໃນຫຼາຍຮູບແບບ ແກ່ ສປປ ລາວ ຊ່ຶງມີແນວໂນ້ມເພີ່ມຂຶ້ນໃນແຕ່ລະປີອີກດ້ວຍ ໂອກາດນີ້, ໂດຍຕາງໜ້າ ໃຫ້ ພັກ-ລັດ ແລະ ປະຊາຊົນລາວ, ທ່ານ ສອນໄຊ ສີພັນດອນ ໄດ້ກ່າວສະແດງຄວາມຂອບໃຈຢ່າງຈິງໃຈ ມາຍັງ ພັກ-ລັດ ແລະ ປະຊາຊົນຈີນ ທີ່ໄດ້ໃຫ້ການຊ່ວຍເຫຼືອ, ສະໜັບສະໜູນ ແລະ ການຮ່ວມມື ຢ່າງຕັ້ງໜ້າ ຕະຫຼອດໄລຍະທີ່ຜ່ານມາ ແລະ ຫວັງຢ່າງຍິ່ງວ່າ ຝ່າຍຈີນ ຈະສືບຕໍ່ໃຫ້ການຊ່ວຍເຫຼືອສະໜັບສະໜູນ ເພື່ອເຮັດໃຫ້ໂຄງການກໍ່ສ້າງທາງລົດໄຟ ສຳເລັດໄປດ້ວຍດີ ຕາມແຜນການທີ່ໄດ້ວາງໄວ້. ນອກຈາກນີ້, ທ່ານ ສອນໄຊ ສີພັນດອນ ພ້ອມດ້ວຍຄະນະ ຍັງໄດ້ເດີນທາງໄປຢ້ຽມຢາມສະຖານທີ່ສໍາຄັນຈໍານວນໜຶ່ງ ຂອງແຂວງຢຸນນານ ເຊັ່ນ: ທະນາຄານພັດທະນາແຫ່ງຊາດຈີນ ສາຂາຄຸນໝິງ, ຢ້ຽມຊົມກຸ່ມບໍລິສັດ ກໍ່ສ້າງ-ລົງທຶນຢຸນນານ ຊຶ່ງເປັນວິສາຫະກິດໜຶ່ງ ທີ່ໄດ້ມີການຈັດຕັ້ງປະຕິບັດຫຼາຍໂຄງການ ຢູ່ ສປປ ລາວ; ຢ້ຽມຊົມຫໍວາງສະແດງຜະລິດຕະພັນສິນຄ້າກະສິກຳ ແລະ ໂຮງງານຜະລິດຕະພັນກາເຟ ຂອງກຸ່ມບໍລິສັດນິຄົມແຂວງຢຸນນານ; ຢ້ຽມຢາມພົບປະກັບອໍານາດການປົກຄອງ ເມືອງຢຸ້ຍສີ່ ແລະ ເຂດພັດທະນາຕົວເມືອງໃໝ່ ຂອງເມືອງດັ່ງກ່າວ