ເພື່ອຈັດຕັ້ງປະຕິບັດນະໂຍບາຍການສົ່ງເສີມການຜະລິດເປັນສີນຄ້າ ແລະ ການໂຄສະນາສີນຄ້າໃຫ້ແກ່ບັນດາຫົວໜ່ວຍທຸກລະກິດຂະໜາດນ້ອຍ-ຂະນາດກາງ ທົ່ວປະເທດ ເວົ້າລວມ ເວົ້າສະເພາະທີ່ຢູ່ນະຄອນຫຼວງວຽງຈັນໃຫ້ມີ ຜະລິດຕະພັນພາຍໃນ ແລະ ເສີມສ້າງທ່າແຮງໃຫ້ແກ່ສີນຄ້າ ໜຶ່ງເມືອງ ໜຶ່ງຜະລິດຕະພັນ (ODOP) ທີ່ ຖືກຄັດເລືອກໃຫ້ເປັນສີນຄ້າກາໝາຍ "ໂອດ໋ອບ" ພ້ອມທັງເປັນການສ້າງບັນຍາກາດຕ້ອນຮັບວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ ທີ່ຈະມາເຖິງໃນມໍ່ໆນີ້.
ໃນວັນທີ 27 ພຶດສະພາ 2016 ທີ່ ສູນການຄ້າລາວໄອເຕັກ (LAO-ITECC) ນະຄອນຫຼວງວຽງຈັນຈຶ່ງໄດ້ມີການຈັດງານ ວາງສະແດງສີນຄ້າ ໜຶ່ງເມືອງ ໜຶ່ງຜະລິດຕະພັນຂື້ນ. ໂດຍການເປັນປະທານຂອງ "ທ່ານ ນ. ເຂັມມະນິດ ພົນເສນາ" ລັດຖະມົນຕີ ກະຊວງອຸດສາຫະກຳ ແລະ ການຄ້າ, "ທ່ານ ແກ້ວພິລາວັນ ອະໄພລາດ" ຮອງເຈົ້າຄອງນະຄອນຫຼວງວຽງຈັນ ພ້ອມດ້ວຍ ການນຳຈາກກະຊວງອ້ອມຂ້າງ, ເຈົ້າເມືອງ, ຮອງເຈົ້າເມືອງ, ຫົວຫນ້າພະແນກ, ຫົວຫນ້າຫ້ອງການ ແລະ ແຂກທີ່ຖືກເຊີນເຂົ້າຮ່ວມຢ່າງພອມພຽງ.
ພາຍໃນງານໄດ້ມີການສະແດງສີລະປະຈາກນ້ອງຫລານນ້ອຍ, ຟ້ອນ-ຮ້ອງເພງ ເພື່ອສ້າງສີສັນພາຍໃນງານໃຫ້ມີຄວາມຟົດຟື້ນມ່ວນຊື່ນ, ນອກນັ້ນໄດ້ມີການກ່າວເປີດ ເຊິ່ງໃຫ້ຮູ້ວ່າ: ການວາງສະແດງ ແລະ ຈຳໜ່າຍສີນຄ້າໜຶ່ງເມືອງໜຶ່ງຜະລິດຕະພັນໃນຄັ້ງນີ້ ມີຈໍານວນ ຫົວໜ່ວຍທຸລະກິດເຂົ້າຮ່ວມທັງໝົດ 126 ຫົວໜ່ວຍ, ສົມທຽບໃສ່ປີ 2015 ເພີ່ມຂື້ນ 58 ສ່ວນຮ້ອຍ, ມີທັງສີນຄ້າ ໜຶ່ງເມືອງໜຶ່ງຜະລິດຕະພັນ, ສີນຄ້າຈາກຄອບຄົວຕົວແບບ ແລະ ສິນຄ້າຈາກພາກສ່ວນອື່ນໆອີກຫຼາກຫຼາຍ, ພິເສດໃນງານຄ້ງນີ້ ຍັງໄດ້ມີການປະກວດສີນຄ້າ ໜຶ່ງເມືອງໜຶ່ງຜະລິດຕະພັນ ພ້ອມທັງມອບລາງວັນ ຜະລິດຕະພັນດີເດັ່ນ ປະຈຳປີ 2016 ໃຫ້ແກ່ຜະລິດຕະພັນທີ່ໄດ້ຮັບລາງວັນດັ່ງກ່າວ. ຕອນທ້າຍ "ທ່ານ ນ. ເຂັມມະນີ ພົນເສນາ" ລັດຖະມົນຕີກະຊວງອຸດສາຫະກຳ ແລະ ການຄ້າ ພ້ອມດ້ວຍ "ທ່ານ ແກ້ວພິລາວັນ ອະໄພລາດ" ຮອງເຈົ້າຄອງ ນະຄອນຫຼວງວຽງຈັນ ໃຫ້ກຽດຕັດແຖບຜ້າ ເພື່ອເປີດງານວາງສະແດງສີນຄ້າໜຶ່ງເມືອງ ໜຶ່ງພະລິດຕະພັນ ແລະ ສີນຄ້າຄອບຄົວຕົວແບບ ຄັ້ງທີ III ປະຈໍາປີ 2016 ຂື້ນ ຢ່າງເປັນທາງການ.
ພາບ ແລະ ຂ່າວ: ສິງຫາ
