"ທ່ານ ນາຍົກລັດຖະມົນຕີ ໄດ້ຮ່ວມປູກຕົ້ນໄມ້ 4 ລ້ານຕົ້ນ ເພື່ອຄືນຄວາມສົມດຸນໃຫ້ທຳມະຊາດ"
"ທ່ານ ທອງລຸນ ສີສຸລິດ" ນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດເຂົ້າຮ່ວມພິທີປູກໄມ້ຢູ່ທີ່ແຫຼ່ງທ່ອງທ່ຽວທຳມະຊາດ ນ້ຳຕົກຕາດຊອນ ແດນຫົງພູສູງ ສວນອຸທິຍານພຶກສາສາດ ຊຸມຊົນສະມາຄົມອາຊຽນ, ບ້ານນາຍາງ ເມືອງນາຊາຍທອງ, ພ້ອມນີ້ຍັງມີທ່ານລັດຖະມົນຕີກະຊວງຕ່າງໆ ທີ່ກ່ຽວຂ້ອງ ແລະ ແຂກຖຶກເຊີນ ຈາກພາຍໃນ ແລະ ສາກົນ ພະນັກງານ, ທະຫານຕຳຫລວດ, ພໍ່ແມ່ປະຊາຊົນ ເຂົ້າຮ່ວມຈຳນວນຫລວງຫລາຍ. ຂະນະທີ່ "ທ່ານ ຄຳໄພ ສົມຊະນະ" ປະທານ ກຸ່ມບໍລິສັດ ຄໍາໄພຊະນະ ໄດ້ລາຍງານວ່າ: ກຸ່ມບໍລິສັດ ພວກເຮົາມີຈຸດປະສົງ ປູກຕົ້ນໄມ້ຈຳນວນ 4 ລ້ານຕົ້ນ ຢູ່ບໍລິເວນ ສະຖານທີ່ທ່ອງທ່ຽວທຳມະຊາດ ນ້ຳຕົກຕາດຊອນ ແດນຫົງພູສູງ ສວນອຸທິຍານ ພຶກສາສາດ ຊຸມຊົນສະມາຄົມອາຊຽນ (ເຂດບ້ານນາຍາງ ເມືອງນາຊາຍທອງ ນະຄອນຫຼວງວຽງຈັນ) ເປົ້າຫມາຍເພື່ອໂຄສະນາເຜີຍແຜ່ ໃຫ້ທຸກພາກສ່ວນທົ່ວສັງຄົມ ເຫັນໄດ້ ຄວາມໝາຍຄວາມສຳຄັນຂອງຕົ້ນໄມ້ ແລະ ປ່າໄມ້ ຕໍ່ກັບການດຳລົງຊີວິດປະຈຳວັນຂອງມະນຸດ, ສ້າງເປັນຕົວແບບໃນ ການປູກໄມ້ ແລະ ຟື້ນຟູປ່າ ໃນເຊີງອະນຸລັກໃຫ້ມີຄວາມຫຼາກຫຼາຍດ້ານຊະນິດພັນໄມ້, ຊີວະນາໆພັນ, ມີອາກາດທີ່ສະອາດ, ເປັນປອດຫາຍໃຈຂອງນະຄອນຫຼວງວຽງຈັນ ເພື່ອເຮັດໃຫ້ປ່າໄມ້ໃນປະເທດເຮົາ ກໍ່ຄືນະຄອນຫຼວງວຽງຈັນ ມີຄວາມອຸດົມສົມບູນ ແລະ ກາຍເປັນປະເທດສີຂຽວຕາມຄຳຂວັນທີ່ວ່າ “ຮ່ວມແຮງຮ່ວມໃຈປູກໄມ້ເປັນປ່າ ພັດທະນາສີຂຽວໃຫ້ຍືນຍົງ”.
ເພື່ອເປັນການປະກອບສ່ວນຈັດຕັ້ງປະຕິບັດຕາມເນື້ອໃນຈິດໃຈວິໃສທັດຮອດປີ 2030 ກ່ຽວກັບການພັດທະນາຕາມທິດສີຂຽວ ແລະ ຍືນຍົງ ທີ່ກຳນັດໄວ້ໃນມະຕິກອງປະຊຸມໃຫຍ່ຄັ້ງທີ X ຂອງພັກ, ແຜນພັດທະນາປ່າໄມ້ຮອດປີ 2020 ທີ່ກຳນົດໄວ້ ຄືຍົກລະດັບຄວາມປົກຫຸ້ມປ່າໄມ້ໃຫ້ໄດ້ 70% ໃນປີ 2020 ໂດຍການຟື້ນຟູປ່າທຳມະຊາດໃຫ້ໄດ້ 6 ລ້ານເຮັກຕາ ແລະ ປູກໄມ້ໃຫ້ໄດ້ 5 ແສນເຮັກຕາ, ແຜນການປູກໄມ້ ແລະ ຟື້ນຟູປ່າທົ່ວປະເທດຂອງກະຊວງກະສິກຳ ແລະ ປ່າໄມ້ ປະຈຳປີ 2016. ການປູກຕົ້ນໄມ້ໃນຄັ້ງນີ້ທາງ ກຸ່ມບໍລິສັດ ຄຳໄພຊະນະ ໄດ້ກະກຽມເນື້ອທີ່ຈຳນວນ 10 ເຮັກຕາ, ສ່ວນຕົ້ນໄມ້ທີ່ຈະນຳມາປູກໃນຄັ້ງນີ້ແມ່ນພັນໄມ້ພື້ນເມືອງຂອງລາວເຮົາຄື: ໄມ້ດູ່ 1 ແສນຕົ້ນ, ຂະຍຸງ 1 ແສນຫ້າຫມື່ນຕົ້ນ, ໄມ້ເກດສະຫນາ 1 ລ້ານຫົກແສນຕົ້ນ, ໄມ້ສັກ 1 ແສນຕົ້ນ, ໄມ້ແຕ້ຄ່າ 5 ຫມື່ນຕົ້ນ, ໄມ້ດູ່ລາຍ 1 ແສນຕົ້ນ, ໄມ້ຄຳພີ້ 1 ແສນຕົ້ນ, ໄມ້ຍາງ 2 ຫມື່ນຕົ້ນ, ໄມ້ແດງ 50 ພັນຕົ້ນ, ໄມ້ແຄນເຮືອ 1 ແສນຕົ້ນ, ໄມ້ຍົມຜາ 5 ຫມື່ນຕົ້ນ ນອກຈາກນີ້ ຍັງມີໄມ້ປະດັບ ແລະ ໄມ້ໃຫ້ໝາກ 5 ຫມື່ນຕົ້ນ ລວມຕົ້ນໄມ້ທີ່ຈະປູກປີ 2016 ນີ້ມີຈຳນວນທັງໝົດ 4 ລ້ານຕົ້ນ.
