ເພື່ອເຮັດໃຫ້ວັງວຽງ ເປັນເມືອງທີ່ສະອາດສວຍງາມ ລັດຖະບານໄດ້ສ້າງແຜນຄຸ້ມຄອງເມືອງວັງວຽງ ຂື້ນມາ ເພື່ອຕອບສະຫນອງການຂະຫຍາຍຕົວຂອງຕົວເມືອງ, ຄວາມຕ້ອງການຂອງປະຊາຊົນ ແລະ ນັກລົງທຶນ, ຮັບປະກັນຄຸນນະພາບທາງດ້ານການບໍລິການ, ການປົກປັກຮັກສາທຳມະຊາດ-ສິ່ງແວດລ້ອມ ແລະ ເພື່ອເປັນຈຸດດຶງດູດນັກທ່ອງທ່ຽວ ທັງພາຍໃນ ແລະ ຕ່າງປະເທດ. ທັງນີ້ກໍ່ເພື່ອໃຫ້ສົມກັບຄຳເວົ້າທີ່ວ່າ: "ເມືອງວັງວຽງ ຍີ້ມແຍ້ມແຈ່ມໃສ, ນ້ຳໄຫລໃສງາມ, ລຳທານປ່າໄມ້ຂຽວ, ທ່ອງທ່ຽວປອດໄພ, ນ້ຳໃຈເອື້ອເຟື້ອເຜື່ອແຜ່ ເຫັນແກ່ສ່ວນລວມ, ຮ່ວມໃຈສາມັກຄີ, ມີມິດຕະພາບ, ພາບພົດລືຊາ, ພັດທະນາວ່ອງໄວ ແລະ ນ້ຳໃຈຊາວເມືອງປະເສີດ". ເວົ້າໂດຍລວມ ເມືອງວັງວຽງເປັນເມືອງທີ່ສວຍງາມ ມີເອກະລັກຄວາມພິເສດສະເພາະ ແລະ ຕັ້ງຢູ່ຈຸດຍຸດທະສາດທີ່ສຳຄັນ ລະຫວ່າງ 2 ເມືອງທ່ອງທ່ຽວ ທີ່ລືຊື່ ຂອງ ສປປ ລາວ. ພ້ອມຍັງມີທິວທັດທຳມະຊາດທີ່ສວຍງາມ ມີສາຍນ້ຳຊອງໄຫລຜ່ານ, ມີພູຝາ ແລະ ພູຫີນປູນ ນ້ອຍ-ໃຫຍ່ ຢັງຢາຍສະຫລັບສັບຊ້ອນ. ມີວັດທະນະທຳທີ່ມີຄຸນຄ່າ ເຊີ່ງເຮັດໃຫ້ເມືອງວັງວຽງ ບໍ່ແມ່ນແຕ່ເປັນຈຸດພັກຜ່ອນຂອງນັກທ່ອງທ່ຽວ ແຕ່ຍັງມີຄຸນຄ່າສຳຄັນໃນຈຸດຫມາຍປາຍທາງຂອງການທ່ອງທ່ຽວ ທັງພາຍໃນ ແລະ ຕ່າງປະເທດ ນັບມື້-ນັບຫລາຍຂື້ນ.
ການທ່ອງທ່ຽວສືບຕໍ່ຂະຫຍາຍຕົວຢ່າງບໍ່ຢຸດຍັ້ງ ແລະ ຄາດຄະເນວ່ານັກທ່ອງທ່ຽວເຂົ້າມາຢ້ຽມຢາມເມືອງວັງວຽງ ຫລາຍກວ່າ 5 ແສນກວ່າເທື່ອຄົນ ໃນປີ 2020 ໃກ້ໆນີ້. ພ້ອມດ້ວຍກັນ ເມືອງ ວັງວຽງ ຍັງມີການຂະຫຍາຍຕົວໃນຫລາຍດ້ານ. ເຊິ່ງອາດມີສ່ວນສົ່ງຜົນກະທົບຕ່າງໆ ເຊັ່ນ: ຜົນກະທົບຈາກນັກທ່ອງທ່ຽວກ່ຽວກັບສິ່ງແວດລ້ອມ, ຜົນກະທົບຈາກການພັດທະນາ ໃນບາງດ້ານຈາກຫົວຫນ່ວຍບໍລິການ ແລະ ອື່ນໆ.
ເພື່ອໃຫ້ສອດຄ່ອງກັບເປົ້າໝາຍແຜນພັດທະນາ ແລະ ການຄຸ້ມຄອງ, ອົງການພັດທະນາ ແລະ ບໍລິຫານຕົວເມືອງ ໄດ້ມີການວາງແຜນເພື່ອຮອງຮັບຕໍ່ການເຕີບໃຫຍ່ຂະຫຍາຍຕົວຂອງຕົວເມືອງ ແລະ ລວມໄປເຖິງການເຜີຍແຜ່ໃຫ້ປະຊາຊົນ ໄດ້ຮັບຮູ້ ແລະ ເຂົ້າໃຈເຖິງແຜນພັດທະນາຕົວເມືອງ, ການວາງຜັງເມືອງ, ບັນດາສະຖານທີ່ຕັ້ງສິ່ງປຸກສ້າງໃຫມ່ ໂດຍໃຫ້ຄຳນຶງເຖິງການຮັກສາເອກະລັກຂອງທຳມະຊາດທີ່ສວຍງາມ, ຄຸນນະພາບການບໍລິການທີ່ດີ ຄວາມມີນ້ຳໃຈເອື້ອເພື້ອເພື່ອແຜ່, ຄວາມສາມັກຄີ ແລະ ຍົກສູງພາບພົດຂອງຕົວເມືອງວັງວຽງ.
ໃນປີ 2020 ເມືອງວັງວຽງ ຈະກາຍເປັນຈຸດເປົ້າໝາຍການທ່ອງທ່ຽວ ໃນລະດັບໂລກ ທີ່ປະກອບດ້ວຍຫລາກຫລາຍກິດຈະກຳ ເພື່ອຕອບສະຫນອງກັບການທ່ອງທ່ຽວແບບພະຈົນໄພ ແລະ ການພັກຜ່ອນທີ່ມີຄວາມສະໜກສະໜານ, ພ້ອມດຽວກັນນັ້ນ ກໍ່ຍັງຈະສ້າງໃຫ້ເປັນການທ່ອງ ທ່ຽວທີ່ມີຄວາມຮັບຜິດຊອບ ຮູ້ເຖິງຄຸນຄ່າຂອງທຳມະຊາດ ແລະ ມໍລະດົກທາງວັດທະນະທຳ. ເພື່ອເປັນການຂະຫຍາຍວິໄສທັດດັ່ງກ່າວ ໃຫ້ປະກົດຜົນເປັນຈິງ, ລັດຖະບານໄດ້ກຳນົດເອົາບັນດາຫລັກການຕ່າງໆ ຕໍ່ການວາງແຜນແບບຢືນຍົງ ເຮັດໃຫ້ເສດຖະກິດຂອງເມືອງວັງວຽງ ມີຄວາມເຂັ້ມແຂງ ຊີວິດການເປັນຢູ່ຂອງປະຊາຊົນ ນັບມື້ນັບດີຂື້ນ. ພ້ອມດຽວກັນນັ້ນຍັງໄດ້ມີການອະນຸລັກ ປົກປັກຮັກສາທຳມະຊາດ ອັນສວຍງາມ.
